'ರಾಮಕಿರೋಡಿಯಾನೆರ್ ತುಳು ಇನ್ನಿ ಸ್ವಚ್ಛ ಬಾಸೆದ ನಾಟಕ ಬರೆಪಿನಕ್ಷೆಡ್ ಸುರುತ್ತ 3 ಸಾಲ್ಗ್ ಸಂದುವೆರ್. ತುಳು ಸಾಹಿತ್ಯ ಗಾದೆದ ಪಾತೆರ, ಅಡ್ಡಕತೆನ್ ಕೇನೊಡಾಂಡ ಕಿರೋಡಿಯಾನೆರೆನ ನಾಟಕ ಓದೊಡು. ತುಳು ತುಳು ಇಂದ್ ಬೊಬ್ಬೆ ಪಾಡುನ ಜನ ಒರ ರಾಮಣ್ಣನ ಕೈತಲ್ ಪೋದು, ಅರೆಡ ಉಪ್ಪುನ ಸಬ್ದ ಭಂಡಾರದ ವಿಚಾರ ತೆರಿಯರ ಸಾಧ್ಯ ಉಂಡು, ಆರೆನ್ ನಾಟಕಕಾರ ಟೈಲರ್ ಪಂಡ್ದ್ ಅರೆನ ಕೃತಲೆ ಪೋಪರ್, ಆರ್ ಒಂಜಿ ತುಳು ಸಬ್ದ ಭಂಡಾರದ ಅಪೂರ್ವ ಆಸ್ತಿ.ಇಂದ್ದ್ ಏರಾ ಪೋಪುಜೆರ್. ಆರ್ ಬರೆತಿನ ನಾಟಕ ಪೂರಾ ಅಚ್ಚಿದ ಇಲ್ಡ್ ಸೇರ್ಂಡ ಅವು ತುಳು ಸಾಹಿತ್ಯಗು ಮಾಮಲ್ಲ ಕೊಡುಗೆ, ಆಸ್ತಿ. ಆರೆನ ಕೆಲವು ನಾಟಕೊಲೆಗ್ ಪದ್ಯ ರಚನೆ ಯಾನ್ಹಾ ಮಲ್ಲೆ. ಸುರುಸುರುಟ್ ಆರ್ ಹಾಸ್ಯ ಪ್ರಧಾನ ನಾಟಕೊಲೆನ್ ಬರವೊಂದಿತ್ತೆರ್. ಬೊಕ್ಕ ಉಡಲ್ ನಾಟುನ ನಾಟಕೊಲೆನ್ ಬರೆಯರ ಸುರುಮಲ್ಲೆರ್. ಆರ್ ಬರೆತಿನ ಕನ್ನಡ ನಾಟಕ 'ಧನೇಶ್ವರ' ಪೂನಾದ ಕೈತಲ್ ನಡತಿನ ಒಂಜಿ ಸತ್ಯಕತೆ, ಭಕ್ತಿ ಪ್ರಧಾನ ಕತೆ. ಆರ್ ಬರೆತಿನ ತುಳು ಪದ್ಮಲು ಕ್ರಮೇಣ ಸಿನೇಮಾ ಜಗದ್ಗಾ ಸೇರ್ಂಡ್, 'ದಾನೆ ಪೊಣ್ಣೆ' ಇನ್ನಿನಾ ಪದ ಇನಿಲಾ ಜನೊಕ್ಲನ ಕೆಬಿಟ್ ನಲಿತೊಂದುಂಡು. ತೆಲಿತೊಂದುಂಡು. ಆರೆನ ಅಗು ಎನ್ನ ಸೊಲು. ಜಾನಪದ ವಿದ್ವಾಂಸ, ತುಳು ಕನ್ನಡ ಕವಿ, ತುಳು ಅಕಾಡೆಮಿದ ಸದಸ್ಯರಾಯಿನ ಪ್ರೊ. ಅಮೃತ ಸೋಮೇಶ್ವರ ಇಂಚ ಬರೆಪೆರ್- "ತುಳು ಬಾಸೆಡ್ ಸಾವಿರಗಟ್ಟಲೆ ನಾಟಕೊಲೆನ್ ಬರೆತೆರ್, ಆಂಡ ಅಯಿಟ್ ತುಳುನಾಡ್ದ ನಿಜವಾಯಿನ ಬದ್ನ್ ಬಿಂಬಿಸಾವುನ, ತುಳುನಾಡ್ದ ಸಂಸ್ಕೃತಿಲೆನ್ ತೋಜಿಪಾವುನ, ತುಳುತ್ತ ತಿರ್ಲ್, ಪೊರ್ಲುನು ತೋಜಾವುನ ನಾಟಕೊಲು ಕಡಿಮೆ. ಕೆಲವು ನಾಟಕೊಲೆನ್ ದಿಢೀರ್ ಪಂಡ್ದ್ ಬರೆಪೆರ್, ಗೊಬ್ಬುವರ್, ಮದಪುವೆರ್, ಒಂಜಿ ಸಿನೇಮಾ ತೂಂಡ ಯಾವು. ಅವನೇ ಕತೆಬರೆದ್ ನಾಟಕ ಗೊಬ್ಬುವೆ, ಪುದರ್ಗ್ ತುಳು ನಾಟಕ, ಆಂಡ ತುಳುತ್ತ ಸತ್ತೋನು ಸೇರಾದ್ ಬರೆತಿನ ನಾಟಕ ಪಂಡ ಕಿರೋಡಿಯಾನ ಬರೆತಿನ ನಾಟಕ. ಇಂಚ ಬರೆಪಿನಕ್ಕು ತುಳುಟು ಕೆಲವ ಮಾತ್ರ. ಅಂಚಿನ ಸತ್ವಶಾಲಿ ಲೇಖಕ- ಶ್ರೀ ಕಿರೋಡಿಯಾನೆರ್." ಸುಮಾರ್ 52 ನಾಟಕ ಬರೆತಿನ ಆರೆನ ನಾಟಕದ ಕಥಾವಸ್ದ ವ್ಯಾಪ್ತಿ ಬಾರಿ ಮಲ್ಲೆ. ಬೇತೆ ಬೇತೆ ಸಾಮಾಜಿಕ, ಐತಿಹಾಸಿಕ, ಜಾನಪದ, ಪೌರಾಣಿಕ ನಾಟಕೊಲೆನ್ ಬರತ. ಆರ್ ನಾಟಕ ರಚನೆ ಮಲ್ತಿನ ಮಾತ್ರ ಅತ್ತ್. ದಿಗ್ದರ್ಶನಲಾ ಮಲ್ಲೆರ್, ಸಿನೇಮಾ 39
