ಇಂಚ 'ಈ ಪೊಸ ರಾಕಿ ಕಾರ್ಗ್ ಕಟ್ದ್ ಗೆಂಡ ದೊಂಕುಂಡ, ಕಾರ್ದ ಅಡಿ ಪೊತ್ತುಜಿ' ಪಂದ್. ಅಂಚನೆ ಪಂಡೆ ಎನ್ನ ಅಪ್ಪೆಡ. "ಬಾಸೆದಾಂತಿನ, ಪರಕೆ ಪಂಡಿನಗುಲು ಗೆಂಡ ದೊಂಕುವೆರ್ ಬಜಿ ಕಾರ್ಡ್. ಬಾಕಿದಗುಲು ತುವರೆ ಪೋಪೆರ್. ಆರ್ ಪನ್ನಿ ಉತ್ಸವೊಗು ಪೋವರೆ ಪೊಸ ರಾಕಿ ಕೊರ್ಲ ಪಂದ್" ಪಂದ್ ಎನ್ನ ಅಪ್ಪೆ ಪಂಡೆರ್ ಪನ್ಕ.
ಎನ್ನ ಅಪ್ಪೆಗೊಂಜಿ ಅಭ್ಯಾಸ ಉಂಡು ಪನ್ಪಿನ (ಎಂಕುಲು ಒಂಜಿ ಕೋಡಿದ್ ಉಂತುದು ಪಾತೆರ್ಜಡ) "ಇ ಒಂಜಿ ಕುಡ್ಡಲಕ್ಕ ಪಾತೆರೊಂದು ಪಾತೆರೊಂದು ಪೋಪಿನಿ ಒಡೆಗ್" ಪಂದ್. ಇತ್ತೆ ಅಪಗ ಕುಡ್ಡ ನಾಯ್ಕೆರ್ನ ಪಾತೆರದ ಶೈಲಿ ನಿಗಲೆ ಪನೊಡ್ಡುಂಬು, ಆರ್ನ ಆ 'ಮೋಸ್ಟ್ ಅಡ್ವಾನ್ಸ್ಡ್ ಟೆಕ್ನಿಕ್'ದ ಬಗ್ಗೆ ಒಂತೆ ಪನೊಡು ಆಪುಂಡು. ಕುಡ್ಡ ನಾಯ್ಕೆರ್ 'ಬಿಲ್ ಗೇಟ್' ಪುಟ್ಟೊಡ್ದುಂಬೆ ಈ 'ಪ್ರಿ-ರೆಕಾರ್ಡೆಡ್ ಮೆಸ್ಸೆಜ್'ದ ಕಲ್ಪೆನೆಗ್ ಸಾಕಾರ ರೂಪ ಕೊರ್ತಿನ ಮಹಾನ್ ವಿಜ್ಞಾನಿ. ಇತ್ತೆ ಯಾಪಲ ಒರ ಊರುಗು ಪೊನ್ ಮಲ್ತರ್ಡ ಕೇನುಜಾ "ಈ ಮಾರ್ಗವು ಸದ್ಯ ಕಾರ್ಯ ನಿರತವಾಗಿದೆ. ದಯವಿಟ್ಟು ಸ್ವಲ್ಪ ಸಮಯದ ನಂತರ ಪ್ರಯತ್ನಿಸಿ" ಪಂದ್ ಒರ್ತಿ ಪೊನ್ನು ಮಗಲ್ ಪನ್ನಿನಾ? ಉಂದೇ
ಟೆಕ್ನಿಕ್ ಕುಡ್ಡ ನಾಯ್ಕೆರ್ ಅಜ್ಜ ವರ್ಸೊಡ್ಡು ದುಂಬು (ಯಾನ್ ಕೇನ್ದ್ ನಲ್ಪ ವರ್ಸ ಅಂಡ್) ಸುರು ಮಲ್ತ್ದ್ ಇತ್ತೆರ್. ವ್ಯತ್ಯಾಸ ಈತೆ, ಇತ್ತೆದ ರೆಕಾರ್ಡೆಡ್ ಮೆಸೆಜ್ "ದುಗ್ಗ ಸೆಟ್ರೆ..." "ಅಬ್ಬಾಸ್ ಸಾಯಿಬೆರೆ..." ಅತ್ತ್ ಡ "ಮೆನ್ನೊಡ್ದಿಯೆ..." ಪಂದ್ ಇರ್ನ ಪುದರ್ ಲೆತ್ತ್ ದ್ ಮೆಸೆಜ್ ಪನ್ಪುಜಿ. ಆ ಇತ್ತೆದ ಮೆಸೆಜ್ಗ್ ಜಾತಿ, ನೀತಿ ಲಿಂಗ ಭೇದ ದಾಲ ಇಜ್ಜಿ, ನಪುಸಂಕ ಲಿಂಗ ಮಾತ್ರ. ಕುಡ್ಡ ನಾಯ್ಕೆರ್ನ 'ಮೊಬೈಲ್, ಪ್ರಿ-ರೆಕಾರ್ಡೆಡ್ ಮೆಸೆಜ್' ಕೇನ್ಲೆ. ಪಾಡ್ದಲ್ಲ್ ಬೊಕ್ಕ ಪೊಸಕ್ಕೆಲ್ ದ ಮದ್ಯೊಡು ನಡಿಯಾಕ್ಯರ್ದ ಪುನಿಟ್ ಸುರು ಮಲ್ತೆರ್ಡ "ಹಾಂ, ದಾನೆಗೆ ನೀಲೊಡ್ಡಿಯೇ? ಸೌಖ್ಯನಾ? ನಾಯಿಲು ತುಚ್ಚುವನಾ? ನಾಯಿಲು ಕೊರಪಂದೆ ಬೊಕ್ಕ ಏರ್ ಮನ್ಸೆ ಕೊರೆಪುನಾ? ಯಾನ್ ಉಲ್ಲೆ,
ಅಂಚಿ ಸೈಯಂದಿಲೆಕ್ಕ, ಇಂಚಿ ಬದ್ಕಂದಿಲಕ್ಕ. ದುಂಬುದಲ್ಕ ಆಪುಜಿಯ ಮರಡ್ದ್ ಬೂರಿ ಬೊಕ್ಕ. ನಾಲ್ ಕಟ್ಟ್ ಬಚ್ಚಿರೆ ಇತ್ತ್ಂಡ್, ಅವ್ವೆನ್ ಪತೊಂದು ಬೈಲೂರ್ದ ಸಂತೆಗ್ ಪೋಯೆ, ದಾಲ ಬೈಯದ ಪುಲಿಕ್ ತಿಕ್ಕುಂಡಾ ಪಂದ್. ಮರುವಾಯಿ ಬಂಗ್ಡೆ ಚಕ್ರೊಗ್ ಪದಿನೈನ್ಗೆ. ಬೊಕ್ಕ ಯಾನ್ ಒಂಜಿ ಚಕ್ರದ ಬೂತಾಯಿ ಕಂತಿನಿ. ಮಲ್ಲ ಪಲ್ಲಾಯಿಡ್ ಗೋರ್ದ್ ಪಾಡಿಯೆರ್ ಗುಲಾಂ ಸಾಯಿಬೆರ್. ಏತ್ ಉಂಡು ಪಂದ್ ಇಲ್ಲಡ್ ಪೋದು ಗೆನ್ಪೊಡು. ಬರ್ಸ ದಾಲ ನಾಲ್ ಪನಿ ಕುಡ್ಪುನ ಅಂದಾಜಿ ತೋಜುಜಿ. ಒಂತೆ ಸುಗ್ಗಿದ ಕಂಡೊಗು ನೀರ್ ಒಯಿಪುನೈಕ್ ಆತು. ಕೆಯಿ ಸಾದಾರ್ನ ಉಂಡುಯೆ.
107
