ಒರ ವರ್ಸೊಗೊರ) ಅವ್ವೆನೆ ಪನ್ನಿನಿ" ಎಂಕೊಂಜಿ ಉಣಸ್ (ಓಟು) ಪಾಡಿಯೆಡ, ನಿಕ್ಕೊಂಜಿ ಬಡವು (ಬಡಪತ್ತ್) ಆವಂದಿಲೆಕ್ಕ (ಬರಂದಿಲೆಕ್ಕ) ಮಾತ್ರೆ (ಸೇವೆ) ಕೊರ್ಪೆ" ಪಂದ್. ದಾಯೆಗಪ್ಪಾ ನಮ ಉಣಸ್ ಪಾಡೊಡು, ನಿನಡ ಇತ್ತಿನ ಆ ಮಾತ್ರೆ ದಿಂಗ್ ದ್ ನಿನ್ನ ಬಡವು/ ಬಡತನ ದೂರ ಮಲ್ಪು. ದೇಶ ಸೇವೆ ಮಲ್ಪರೆ ಓಟುಡು ಗೆಂದ್ದೆ ಬರೊಡ? ನನೊರ ನಿಗಲೆ ಊರುಗು ಬತ್ತೆರ್ಡ ಈ ಬಾಸೆದಾಂತಿನ ನಾಯ್ಕೆರ್ನಗುಲೆಡ, ಕೇನ್ಲೆ “ಇ ಉಂತನಾ (ಉಣಸ್ ಮಲ್ದನಾ, ಅತ್ತ್ ಡ ಕಡೆ ಮುಟ್ಟ ಉಂತನಾ)?" ಪಂದ್. ಬಜಿ ಬಂಜಿಡ್ ಸೇವೆ ಏತ್ ಪೊರ್ತು ಮಲ್ಪೊಲಿ, ಕಡೆಕ್ ತರೆ ತಿರ್ಗ್ ದ್ ಬುರುಜೆರಾ? ನಮ್ಮ ಸೇವೆ ಮಲ್ಪರೆ ಗೆಂದದ್ ಮಿತ್ತ್ ಕಡಪುಡ್ನ ಬುಡ್ಡು, ಇಂಚ ಬಜಿ ಬಂಜಿಡ್ ಬೆನ್ಪದ್ ಮಿತ್ತ್ ಕಡಪುಡ್ನ ಸರಿಯಾ ಪನ್ಲೆಗೆ?
ಮಾಮಿನ (ಕಂಡ್ಯಾನನ ಅಪ್ಪೆ), ಬಾವನ (ಕಂಡ್ಯಾನನ ಪಲಯೆ), ಮೈತಿದಿನ (ಕಂಡ್ಯಾನನ ಪಲ್ದಿ) ಪುದರ್ ಪನರ ಬಲ್ಲಿ ಪನ್ಪಿ ಶಾಸ್ತ್ರ ನಮ್ಮ ತುಳುವೆರ್ಡ್ ಒಂಜಿ ಮುಪ್ಪ ಒರ್ಸ ದುಂಬು ಜೋರ್ ಇತ್ತ್ಂಡತ್ತೆ. ಎನ್ನ ಮಲ್ಲ ತಮ್ಮಲೆನ ಮೈತಿದಿನ ಬಾವೆ ಸೇಕರೆ, ಮಾಮಿ ಕಾಲಿ, ಪೊಸ ಮದ್ಮಲ್ ಪೋಯಿನಾರ್ ಚಾ ಮಲ್ಪರೆ ಸಕ್ಕರೆದ ಡಬ್ಬಿದ ಬಾಯಿ ದತ್ತ್ ದ್ ಮಾಮಿನ್ ಲೆತ್ತೆರ್ಗೆ "ಮಾಮಿಯೆ, ಮಾಮಿಯೆ, ಸಕ್ಕರೆ ಡಬ್ಬಿ ಕಾಲಿ” ಪಂದ್. ಮಾಮಿ ಮುಕ್ಕುರು ದಕಿಯೆರ್ಗೆ "ಎಂಚಿನದೆ...". ಮರ್ಮಲ್ ಕುಡ ಒರ ಪಂಡೆರ್ "ಸಕ್ಕರೆ ಕಾಲಿ". "ಇನಿ ಕೊಡೆದ ಪೊನ್ನುಲೆಗ್ ಪರ ಪಗ್ ರ್ ಇಜ್ಜಿ, ಬಾಸೆ ಐಡ್ದ್ ದುಂಬು ಇಜ್ಜಿ” ಪಂದ್ ಮಾಮಿ ಮಣ ಮಣ ಪಂಡೆರ್ಗೆ. ಅಂಚಾದೆ ಎನ್ನ ಅಜ್ಜಿ ಪನೊಂದು ಇತ್ತಿನಿ "ಆಜಿಲ ಬೊಕ್ಕೊಂಜಿ", "ಇನಿತ ಮರ್ದಿನ", ದಾಯೆ ಪನ್ಲೆಗೆ? ಅರೆಗ್ 'ಏಲ್' ಅತ್ತ್ ಡ 'ಎಲ್ಲೆ' ಪನರೆ ಆಪುಜಿ, ಅವು ಆರೆನ ಬಾವನ ಪುದರ್ 'ಎಲ್ಲಪ್ಪ'ಗ್ ಕೂಡುಂಡು. ಅಂಚೆನೆ ಆರ್ 'ಮೀನ್' ಅತ್ತ್ ತಿನೊಂದು ಇತ್ತಿನಿ, 'ಪಡ್ಡಾಯಿದ. ಮರಕಾಲ್ಡಿ ಪಡ್ಡಾಯಿಡ್ದ್ ಅತ್ತ ಕನಪಿನಿ ಮೀನ್. ಎನ್ನ ಅಪ್ಪೆನ ಕಾಲೊಗಾನಗ 'ಸೈಕಲ್ದ' ತಿನರೆ ಪತಿಯೆರ್ ಅಪ್ಪೆಲಾ, ಮಗಲ್ಲಾ. ಈ 'ಸೈಕಲ್ಡ್' ಜಂಬುಲಿ ಕಟ್ದ್ ಮೀನ್ ಕನವೊಂದು ಇತ್ತಿನ ಗುಲಾಂ ಸಾಯಿಬೆರ್ ಮಲ್ಪೆಡ್ದ್ ಬೈಲೂರುಗು ಬನ್ನಗ 'ಪಡ್ಡಾಯಿ' ಅಂಡಲಾ, ಬೈಲೂರುಡ್ದ್ ಎಂಕಲ್ನ ಇಗರ್ಜಿ ಪೇಂಟೆಗ್ ಬನ್ನಗ ಬಡಕಾಯಿ ಆಪುಂಡು ತೂಲೆ. ಅಂಚಾದ್ 'ಪಡ್ಡಾಯಿದ' ಪನ್ಪಿನೈಟ್ ಅರ್ತ ಇಜ್ಜಿ. ಉಂದು ಮಾತ ದಾಯೆಗ್ ಪಂಡ ಎನ್ನ ಅಜ್ಜಿನ ಬೊಕ್ಕ ಅಪ್ಪೆನ ಮಾಮಿಯಲ್ಲೆನ (ತಿದ್ದಪ್ಪೆ ಪೆರಿಯಪ್ಪೆಡ್) ಪುದರ್ 'ಮೀನು'. ಒರ ಎನ್ನ ಮೆಗ್ಯೆ ಪಂಡೆ "ಮಿತ್ತಲ್ಲ ಕೋರಿಯಕ್ಕೆ ತೀರಿಯರ್ಗೆ, ಅಮ್ಮ ಪಂಡೆರ್".
103
