ತುಳು ತುಡರ್
ಶಶಿರಾಜ್ ರಾವ್ ಕಾವೂರ್
ಬೆಳಗಡೇಪಲ ಇಂಚ ನಮ್ಮ ತುಳು ತುಡರ್ |
ನಲಿಪಡ್ ಲೋಕೋರ್ಮ ಈ ಪೆರ್ಮ ಪುದರ್ || ಬೆಳಗಡ್ ||
ಉಡಲ ತಿಬಿಲೆಡ್ ನಿಲಿಕೆ | ಮೋಕೆ ದಿಂಜಿನ ತಿರಿಕ್
ಪ್ರೀತಿದೆಣ್ಣೆನ್ ಮೈತಿನಾ ನಿನೆತ ತುಡರ್
ಕಡಲ್ಡ್ದ್ಲಾ ಮಲ್ಲ ಮನಸಿತ್ತಿ ತುಳುವೆರೆನ
ಗೇನ ದಿಂಜಿನ ಬೊಲ್ಲು ತಲ್ಲುನಾ ತುಡರ್ || ಬೆಳಗಡ್ ||
ಬೈಲ್ ಕಂಡದ ಬೆನ್ನಿ| ಬುಳೆಯಿ ಪಚ್ಚೆದ ಪೈರ್
ಬೆಂದಿ ಬಂಜಿದ ಪಡಿಟ್ | ತೆಲಿಗಂಜಿದಾ ಕರೆಟ್
ಕಿದೆಟ್ ಚೆತ್ತೆದರೆದುನಾ ಪೆತ್ತದಾ ಸೊರಟ್
ಉಪ್ಪು ನೀರ್ದ, ಪೊಯ್ಯೆ ದಿಂಜಿದಿ | ಕರೆ ಬರಿಟ್ || ಬೆಳಗಡ್ ||
ತಟ್ಟೆ ಕಿರಿಟದ ವೇಷ | ಚೆಂಡೆದುರ್ಲಿಕೆ ದೊಟ್ಟು
ತಾರಾಯಿದಾ ಕಟ್ಟ |ಕೋರ್ದ ಪೆಟ್ಟ್ದ ಕಳೊಟು
ಊದು ವಾದ್ಯೊಲು ದಿಂಜಿ | ಬೊಟ್ಟು ತಾಸೆದ ಗೌಜಿ
ಪಿಲಿತ ನಲಿಪಾಟಿಕೆಡ್ | ಎರುಲೆ ಬಲಿಪಾಟಿಕೆಡ್ || ಬೆಳಗಡ್ ||
ಬಲಿಪಾಡ್ಯ, ದೀಪೊಳಿ | ತುಳಸಿ ಪೂಜೆಗ್ ಪುಡವು
ಎಲಿ ಮರ್ದ್, ನೆಲ ಗುಮ್ಮೆ | ಪಟಾಕಿದಬ್ಬರದೊಟ್ಟು
ಪಜ್ಜೆ ಪಜ್ಜೆಗ್ ಪರ್ಬ ಮಲ್ತ್ಪಡೆವುನ ಕುಸಿಟ್
ದೈವದನುಗ್ರಹ ತತ್ತ್ ಪೋವಂದಿನಾ ದಿಸೆಟ್ || ಬೆಳಗಡ್ ||
ನೆಯಿ-ಪೇರ್ /83
