ಒಂಜಪ್ಪೆ ಬಾಲೆಲೆಂಕುಲು ನಾಗ ಬಿರ್ಮೆರೆ ಪುರ್ಲೆಲು
• ಡಾ ಇಂದಿರಾ ಹೆಗ್ಗಡೆ, ಬೆಂಗಳೂರು
ಆದಿ ಆಲಡೆ ಮೂಲತಾನದ ಜೋಕುಲೆಂಕುಲು ತುಳುವೆರ್
ಒಂಜಪ್ಪೆ ಬಾಲೆಲೆಂಕುಲು ನಾಗ ಬಿರ್ಮೆರೆ ಪುರ್ಲೆಲು
ನಾಗ ಜಿಡೆ ಪಾಡಿದಾ ಏಳೆದೆ ಗುಂಡದಾ
ಧರ್ಮ ತಳತ ಮಣ್ಣ್ಡ್ ಉದ್ಯಬೆಂದಿ ಜೋಕುಲೆಂಕುಲು
ಮೂಲತಾನದ ತುಳುವೆರ್
ಬಿರುವೆ ಬಾರಗೆ, ಕೊರಗೆ ಮುಗೆರೆ ಮಾರಿ ಮನ್ಸೆ ಕಿಲೆಸಿ ಮಡ್ಡೆಲೆ
ಪೆದ್ದಿ ಅಪ್ಪೆ ಪತ್ತೆ ಆಂಡ ತಾಂಕಿ ಅಪ್ಪೆ ಎಂಕ್ಲೆಗೊಂಜಿ
ಜಾತಿ ಇಜ್ಜಂದಿ ಆದಿ ಕಾಲದ ಜೋಕುಲೆಂಕುಲು ತುಳುವೆರ್
ಮೂಲತಾನದ ಬಾಲೆಲೆಂಕುಲು ನಾಗ ಬಿರ್ಮೆರೆ ಪುರ್ಲೆಲು
ಪತ್ತಪ್ಪೆ ಜೋಕುಲೆನ್ ಜಕ್ಕೆಲ್ ಮಾನಾದ್
ಸಿರೆ ಮಿರೆತ ನುರೆ ಪೇರ್ ಪರ್ಪಾದ್ ಬಾಮಿದ್
ಬಾನದ ತೆಡಿಲ್ಗ್ ಅಡ್ಡಣೆ ಜೆಡೆ ಅರತ್
ಅದುರುನ ಬಾಮಿಗ್ ಮುನ್ನಿನ್ ಜಪುಡಾದ್
ಮಾನಾವು ಬಿರ್ಮೆರ್ ಮೂಲದ ಬಿರ್ಮೆರ್
ಬುಲೆದಾಂತಿ ಮಣ್ಣ್ಗ್ ಬುಲೆ ಕೊರ್ಪಿ ಬಿರ್ಮೆರ್
ಫಲದಾಂತಿ ಪೊಣ್ಣಗ್ ಫಲ ಕೊರ್ಪಿ ಬಿರ್ಮೆರ್
ಮೈಯ್ಯಾರೆ ಮೈ ಜಿಂಜಿದ್ ಬಾಯಾರೆ ನುಡಿ ಕೊಬ್ಬಿ
ಆದಿ ಆಲಡೆ ಮೂಲದ ಬಿರ್ಮೆರ್.
ಮೂಲದ ಮಣ್ಣ್ಡ್ ಸುಗ್ಗಿದ ಕಾಲೊಡು
ಕಂಬುಲ ಗೋರಾದ್ ಪೂಕಾರೆ ಪಾಡಾದ್
ಐಯ್ಯೊಲಿ ಪಯ್ಯಲಿ ಸಿರಿಕುಲೆ ಗೊಬ್ಬಾದ್
ಸುಗ್ಗಿ ಕೈ ದುಂಬು ದೈಯೊಲೆ ನಲ್ಕೆ
<<center|ನೆಯಿ-ಪೇರ್ /73}}
