ಅಪ್ಪೆ ತುಳುವೆದಿ
ರೂಪಕಲಾ ಶೆಟ್ಟಿ
ದೇಯಿ ಬಾರತಿ ಪೆರ್ಮೆದಾಮರ ಎಗ್ಗೆ ಅಪ್ಪೆ ತುಳುವೆದಿ |
ಕುಡರಿ ರಾಮನ ಸೃಷ್ಟಿ ಬಿರ್ದ್ದ ಪುಗರ್ತೆ ಪಡೆಯಿನ ಬಿರ್ಸೆದಿ ||
ಕಡಲ್ದ ಸೆರೆಕುಲು ಪುಣ್ಯ ತುದೆಕುಲು ಗಟ್ಟೊ ಸಾಲ್ದ ಬೇಲಿಡ್
ಕಂಗ್ ತಾರಿದ ತಾರೆ ಬಾರೆದ ಬಾರರಿತ ಬುಳೆ ಜಾಲ್ಡ್ |
'ಗಡಿ'ತ ಗತ್ತ್ಡ್ 'ಬರಿ'ತ ಮರ್ಜಿಡ್ ಅಳಿಯಕತಟ್ಟ್ದ ಸೋಬೆಡ್
ಜಾತಿ ದರ್ಮೊದ ಪೊಲಿಗೆ ತೋಜುಜಿ ಬದ್ಕ್ ಮುಡೆಯಿನ ಪೊರ್ಲುಡೂ||ದೇಯಿ ಬಾರತಿ||
ಆಟಿ ಕೆಡ್ಡಸ ಪುದ್ವಾರ್ ಬಿಸುಕಣಿ ಅಷ್ಟೆಮಿಲ ಸಿರಿ ಪರ್ಬೊಲು
ನಂಬು ನಲಿಕೆಡ್ 'ಇಲ್ಲಿಲ್ಲ್' ತಿರ್ಗುವ ಮಾರಿಕಲೆಪುನ ಶಕ್ತಿಲು ||
ಸಂದಿ ಪಾಡ್ದನ ತಾಳೊಮದ್ದಳೆ ಆಟೊ ಕೂಟೊದ ಕಮ್ಮೆನೊ
ಕೋಲ ತಂಬಿಲ ಗೊಬ್ಬು ಕಂಬುಲ ಕೋರಕಟ್ಟದ ತಮ್ಮನೊ ||ದೇಯಿ ಬಾರತಿ... ||
ಅಗೋಳಿ ಮಂಜಣೆ ಅಮರ್ ಬೀರೆರ್ ಸಿರಿಲ ದರಿತ್ದ್ ಮೆರೆಯೆರ್
ದೇಸೊ ಒರಿಪೆರೆ ಸೊಂದ್ ಬೆಂದ್ದ್ ಕಾಯೊ ಬುಡಿಯೆರ್ ಬಿರ್ಸೆರ್ |
ಸತ್ಯ ದರ್ಮೊಲು ನೇಮ ನಿಷ್ಟೆಲು ನ್ಯಾಯೊ ಕಾತಿನ ಗುತ್ತುಡೂ
ನಾಗಬೆಮ್ಮೆರೆ ಸಾನೊ ಆಲಡೆ ಮೆರೆದ್ ತೋಜಂಡು ಮೈಮೆಡ್ ||ದೇಯಿ ಬಾರತಿ||
ನೆಯಿ-ಪೇರ್ /68
