ತುಳುನಾಡ್
ಶೀಲಾ ಕೆ. ಶೆಟ್ಟಿ ಎರ್ಮಾಳ್
ಏರ್ ಮಲ್ತಿನ ಪುಣ್ಯ ಈ ಭೂಮಿ ತುಳುನಾಡ್,
ಏರ್ ಬರೆತಿನ ಬರವು ತುಳು ಪಾತೆರಾ... ||ಪಲ್ಲವಿ||
ಅರಸು ಬಾಲೆಲೆ ಸೋರ್ಕು ಸಿರ್ಕಾಯಿನ ಭಾರ್ಗವೆರ್,
ಕುಡರಿ ದಕ್ದಿನ ಜಾಗ್ ಪೊಸ ಭೂಮಿ ತೋಜಾಯೆರ್,
ಬರಗಾಲ, ನೆರೆ, ಬೊಲ್ಲ ಇಜ್ಜಾಂದಿ ವರ ಕೊರುದು,
ಪರಶುರಾಮೆರ್ ಕೊರಿನ ದಾನದುಂಬಳಿ ನಂಕ್||೧||
ಮುಡಯಿ ತೋಜುನ ಕಾಡ್, ಗಂಧ ದಂತದ ಬೂಡು,
ಕಡಲ್ದಪ್ಪೆನೆ ಕೊರಿನ ಕೊಪ್ಪರಿಗೆ ಮೀನ್...
ಬೊಟ್ಟು ಬೈಲ್ದ ನಡುಟು, ದಪ್ಪುನಾಯನ ಒರಲ್,
ನಟ್ಟಿಕಂಡೊಡು ಕೇನ್ಲೆ ತುಳು ಪಾಡ್ಡನಾ...||೨||
ಮುಟ್ಟುಗೊಂಜಿಯೆ ನಮ್ಮ ಕೋಡ್ಡಬ್ಬು ಬಾರಗೆರ್,
ಕಟ್ಟ್ನಿಟ್ಟ್ದ ದೈವ ಧೂಮಾವತೀ...
ಭೂತನಾಥೆಲ ಉಲ್ಲೆ, ಪೀತಾಂಬರೆಲ ಉಲ್ಲೆ,
ಮಾತ ದೇವೆರೆ ಮೈಮೆ ಒಟ್ಟಾನಗ... ||೩||
ತುಳುನಾಡ್ಡ ಸಿರಿ ಜೊತೆಕ್ ಅಬ್ಬಗೆ ದಾರಗೆಲ,
ಬಲವಂತೆ ಕೋಟಿ-ಚೆನ್ನಯೆ ಮರೆಯರಾ...
ಧರ್ಮ ಭೂಮಿಲ ಉಂದು, ನಾಗದೇವೆರೆ ಮಣ್ಣ್
ಕರ್ಮದಾ ಫಲ ಚಣೊಟು ತೋಜಿ ಬರ್ಪಿನ ಕಣ್ಣ್||೪||
ದಾನ ಕೊರ್ಪಿನ ದಾನಿ, ಬೇಲೆ ಬೆನ್ಪಿನ ಕೂಲಿ,
ಜಾತಿ ಕಸುಬುದ ಪೆರ್ಮೆ ಈ ಭೂಮಿದಾ...
ಹಿಂದು ದೇವರೆ ಬಲಿಕ್ ಕೊಂಬು ವಾದ್ಯದ ಸಾಬೆ,
ಜಾತಿ ಭೇದದ ಕೆಸರ್ ತಟ್ಟಂದ್ ನಮಕ್...||೫||
ಕೋರೊಟ್ಟ,ಕಂಬುಳದ ಪೆರ್ಮೆ ತೋಜುನ ಗೊಬ್ಬು
ಬಯಲಾಟ, ಕೋಲಾಟ, ಕಲೆತ್ತ ತಂಪು...
ಬಡಕಲುದ ಬಾರ್ಕೂರು, ತೆಂಕಯಿದ ಮಂಗ್ಳೂರು,
ನಡುಟು ತುಳುವೆರೆ ಪೊರ್ಲು ತುಳು ಮಲ್ಲಿಗೇ... ||೬||
ನೆಯಿ-ಪೇರ್ /67
