ಓಲುಲ ಉಪ್ಪುಲ ಎಂಚಲಾ ಉಪ್ಪುಲ
ಡಾ. ಅನಸೂಯ, ಬಿ. ಸಾಲಿಯಾನ್
ಓಲುಲ ಉಪ್ಪುಲ ಎಂಚಲಾ ಉಪ್ಪುಲ
ತುಳು ಬಾಲೆ ಆದ್ ಪೊರ್ಲುಡೇ ಉಪುಲ
ಬರ್ಸದಾ ಪನಿಪನಿ ಒಂಜಾದ್ ಸೇರ್ದ್
ಭೂಮಿಡ್ ಸುಧೆ ಆದ್ ಕಡಲ್ ಸೇರಿಲೆಕ
ಓಲುಲ ಉಪ್ಪುಲ ಒಲ್ಫಲಾ ಉಪ್ಪುಲ
ತುಳು ಅಪ್ಪೆ ಬಾಲೆ ಆದ್ ಪೊರ್ಲುಡೇ ಉಪ್ಪುಲ
ತುಳು ಅಪ್ಪೆ ಪುದರ್ನ್ ಊರೊರ್ಮೆ ಮೆರೆಪಾಲ...
ನಾಗತಂಬಿಲ ನಾಗದರ್ಶನ ಸಾನ ಗರಡಿದ
ಗುಡಿ ಗುಂಡ ಪಲ್ಲಿ ಇಂಗ್ರೇಜಿದ ನಮ್ಮ ಊರು
ಕೆಡ್ಡಸದಾ ಕಡ್ಲೆ ಪದೆಂಗಿ ಕುಡು ಅರಿತ ರುಚಿ
ಮಾರ್ನೆಮಿದಾ ಪಿಲಿತೇಸ ಆಟಿದಾ ಕಳಂಜೆ
ಸೋನದಾ ಮದಿಮಾಲ್ ಬರ್ಸದಾ ಉಪ್ಪಡಚ್ಚಿರ್
ಅಷ್ಟೆಮಿದ ಮಸುರುಡ್ಕೆ ಚೌತಿದಾ ಕಂರ್ಬು
ಓಲುಲಾ ಉಪ್ಪುಲಾ ತುಳು ಕಟ್ಟ್ಡೇ ಬದ್ಕ್ಲಾ...
ಪರ್ಬ ಪರ್ಬಗ್ ಸೀಪೆ ಎಣ್ಣೆನೀರ್ದ ಮೀಪಟ
ಕುರಲ್ ಪರ್ಬ ದೇವ ಪೂಜೆ ಅಂಕ ಆಯನ
ಕೋಲ ನೇಮ ಯಕ್ಷಗಾನ ಕಂಬುಲದ ಬಿರ್ಸ್
ಮೋಂತಿ ಪರ್ಬ ಪೆರ್ನಾಲ್ ನಲಿಕೆ ಬಲಿ ತೆಲಿಕೆ
ಜಾತಿ ಭೇದ ಇಜ್ಜಾಂದಿ ಬಂಗಾರ್ ನಮ್ಮ ಊರು
ಓಲುಲಾ ಉಪ್ಪುಲ ಎಂಚಲಾ ಉಪ್ಪುಲ
ತುಳು ಅಪ್ಪೆನ್ ಮೋಕೆಡ್ ನೆನೆತೊಂದುಪ್ಪುಲ....
ಮೋಕೆದ ಅರ್ತಿಪಿರ್ತಿದ ನಮ್ಮ ತುಳುನಾಡ್
ಕಂಗ್ ಬಾರೆ ತಾರೆದ ಕಡಲ ಬರಿತ ಊರು
ನೆಯಿ-ಪೇರ್/64
