ಈ ಪುಟೊದ ಪರಿಶೀಲನೆ ಆತ್ಂಡ್
ತುಳುನಾಡ್
• ಮಹಮ್ಮದ್ ಬಳ್ಳೂರು
ತುಳುನಾಡ್ ಮಣ್ಣ್ಡ್ ಪುಟ್ಟ್ ಬಲತಿನ
ಎಂಕ್ಲು ಮಾತ ತುಳುವೆರ್
ತುಳು, ಕನ್ನಡ, ಕೊಂಕಣಿ, ಬ್ಯಾರಿ ಬಾಸೆದ
ಎಂಕ್ಲು ಮಾತ ತುಳುವೆರ್
ಮೋಕೆ ಇತ್ತ್ಂಡ ಅಡರ್ತ್ ಪತ್ತುನ
ಅರಾತಿದಕ್ಲನ್ ತೊರ್ತ್ ದೀಪುನ, ಬಿರ್ದ್ದ ಬೀರೆರ್ ತುಳುವೆರ್||
ಪಡ್ಡಯಿಡಿತ್ತಿ ಕಡಲ್ ನಿಲಿಕೆಲಾ ಮೀನ್ಲೆನ ನಲಿಕೆ
ಮೂಡಯಿಡಿತ್ತಿ ಕಾಡ್ಡೊರ್ಮೆಲಾ ಮುರ್ಗೊಪಕ್ಕಿ ನಿಲಿಕೆ
ಕಂಡದಪ್ಪುನ ರೈತರಾಗೊಡು ಪಾಡುನ ಉರಲ್
ಕೊಟ್ಯದುಲಯಿಡ್ ಕೇನೊಂದುಪ್ಪುನ ಕೊರಗುನ ಪುರಲ್
ಉರ್ಪೆಲರಿತ ನುಪ್ಪುದೊಟ್ಟಿಗೆ ಪಜ್ಜಿಮೀನ್ದ ಕಜಿಪು
ಪುಲ್ಯಕಾಂಡೆ ತಂಞನದೊಟ್ಟಿಗೆ ನೈದಿಂಜಿದಿ ಕೊಜಪು
ತಾರೈದ ಪೇರ್ಡ್ ಸೇಮೆದಡ್ಯೆ ಕೋರಿದ ಸಾರ್ಡ್ ರೊಟ್ಟಿ
ತಿಂದ್ ಬಲತಿನ ತುಳುನಾಡ ಜವನೆರ್ ಉಲ್ಲೆರೇತ್ ಗಟ್ಟಿ
ನೇಮಕಂಗಿಲು ನಾಗದರ್ಶನ ಬೂತದ ಕೋಲ
ಆಟ ಕೂಟೊಲು ಕೊರ್ದಕಟ್ಟಲ ಅಗೆಲ್ ಕಂಬುಲ
ಪಾಟ್ ಪಾಡ್ದನ ಕೊಂಬುವಾದ್ಯೊಲು ಡೋಲು ತೆಂಬರೆ
ಏತ್ ಪೊರ್ಲುಯ ತುಳುನಾಡ್ದ ಪರಪೋಕು ತುವ್ವೆರೆ
ನೆಯಿ-ಪೇರ್/63
