ತುಳುವೆರೆಂಕುಲು
ದಿನಕರ ಹೆಗ್ಡೆ, ಕೆ.
ತುಳುನಾಡ ಅಪ್ಪೆನ ಸೆರಂಗ್ಡುಪ್ಪುನ ತುಳುವೆರೆಂಕುಲು ಜೋಕುಲು
ಕಾರಣಿಕೊದ ಊರುಡುಪ್ಪಿನ ನಮ್ಮ ಬಾರಿ ಜನೊಕುಲು ||ಪ||
ಸುಗ್ಗಿ, ಏಣೆಲ್, ಕೊಳಕೆ ಬೈಲ್ಡ್ ಬೆನ್ನಿ ಬೆನ್ಪೆರ್
ಕೋರಿ ಜಾತ್ರೆ, ದೈವ ನೇಮೊಡು ಚೆಂಡ್ ಕುಟ್ವೇರ್,
ಕಟ್ಟಿ ಕೋಲ, ಪನ್ಪಿನುಡಿಟ್ ಜತ್ತಿ ಬಾಕ್ಯಾರ್,
ಕಲ್ಲುರ್ಟಿ, ಕಲ್ಕುಡೇ, ಪಂಜುರ್ಲಿ, ಬೊಬ್ಬರ್ಯೆ, ಮಲ್ಲದೈವೊಲು ||೧||
ಅಗೆಲ್ ಬಲಸ್ದ್, ಕೊಡತಿ ಬೊಂಡೊಡು, ಪಾಡಿ ಪನಿಯಾರೋ,
ದೂಪ ದೀಪೊಡು, ಮಣಿ ಮಂಚಾವುಡು ನಂಬಿ ಭಕ್ತೆರೆ ಸಂಸಾರೋ.
ತುಳುನಾಡ್ದ ಪೆರ್ಮೆಡ್ ನಡಪುಂಡು ಸೀಮೆದ ಕಂಬಳ,
ಕೊಂಬು, ಬ್ಯಾಂಡ್ದ, ವಾದ್ಯ ನಲಿಕೆಡ್ ಎರ್ಲುಜಪ್ಪುನ ಕಂಬುಲ ||೨||
ಬೇಸ, ಕಾರ್ತ್ಯೊಲು ಬೆರಿಟ್ ಬತ್ತ್ಂಡ್ ಆಟಿಡೊಂಜಿ ದಿನೋ
ಬೆನ್ನಿ ಬೇಲೆ ಮುಗಿತಿ ಜನೊಕ್ಲೆಗ್ ಆನಿ ಆಟಿದ ಆಯೊನೋ
ಆಟಿ ತಿಂಗೊಲು ಊರು ಜಪ್ಪಿನ ಆಟಿಕಳೆಂಜನೊ ಉದಿಪನೋ
ಕುಕ್ಕು, ಪೆಲಕಾಯಿ, ಕಣಿಲೆ, ಪತ್ರೊಡೆ, ಉಪ್ಪಡ್ ಪಚ್ಚಿರ್ದ ಕಮ್ಮೆನೋ ||೩||
ನಾಗರಪಂಚಮಿ, ಗೋಕುಲಾಷ್ಟಮಿ, ಚೌತಿ ಪರ್ಬೊಲೆ ತಮ್ಮನೋ
ಪಿಲಿತ ಏಸೊಲು, ಕರಡಿ ನಲಿಕೆಲೊ, ಬಾರಿ ಗೊಬ್ಬುದೊ ನರ್ತನೋ
ಯಕ್ಷಗಾನ, ತಾಳಮದ್ದಳೆ, ಆಟ ತೂಪೆರ್ ನಮ್ ಜನೊ
ಚೆಂಡೆ, ಮದ್ದಳೆ, ರಂಗಸ್ಥಳೊಟ್ಟು ಬಾರಿ ದಿಗಿಣ ದೆಪ್ಪಿನೊ ||೪||
ತುಳುನಾಡ ಮಣ್ಡೆ ಪುಟ್ಟು ಬಲತಿನ ಎಂಕ್ಲು ಮಾಂತೊ ಸುಗಿಪುನೊ
ತುಳುವೆರೆಂಕುಲು ತುಳುವೆರೆಂಕುಲು ತುಳುವೆರೆಂಕುಲು ಈ ಜನೊ
ತುಳು ಅಪ್ಪೆನೊ ಸೆರೆಂಗ್ಡುಪ್ಪಿನೊ ಮಾಂತೊ ಜನೊಕ್ಲೆ ಪುಣ್ಯನೋ ||೫||
ನೆಯಿ-ಪೇರ್ /59
