ತುಳುನಾಡ್ದ ಜನಕುಲು
• ಇಂದಿರಾ ಹಾಲಂಬಿ ಆತ್ರಾಡಿ
ಕಲಕಲ ಕಲಕಲ ತೆಲಿತ್ದ್ ನಲಿಪಿನ
ತುಳುನಾಡ್ದ ಜನಕುಲು ಯೆಂಕುಲು... ತುಳುನಾಡ್ದ ಜನಕುಲು ಯೆಂಕುಲು...
ಕರೆನಾಡ್ದ ಈ ಕಡಲ್ದ ಲಕ್ಕನೆ
ಗೆಲವುದ ಮನಸ್ದ ಜನಯೆಂಕುಲು... ತುಳು ಜನಕುಲು ಯೆಂಕುಲು...
ದೇಶ ನಮ್ಮವು ಭಾರತ ಒಂಜೇ
ಭಾಷೆ ಮುಲ್ಪನೇ ತರತರ ಅಂದೇ
ಎಂಚಾಂಡಲ ನಮ ಬಂಧುಬಾಂಧವೆರ್...
ಭೇದ ದಾಂತೆನೆ ಬದ್ಕ್ ಬಲ್ಲೇ... ತುಳು ಜನಕುಲು ಯೆಂಕುಲು...
ಪಡ್ಡಯಿ ತೂನಗ ಸಾಗರ ನೀರ್...
ಮೂಡಯಿಡುಂಡು ಗಟ್ಟದ ಏರ್...
ಮಾತಲ ದಾಂಟ್ದ್ ಪೋಪೆರ್ ತುಳುವೆರ್...
ಸಾಸದ ಕೆಲಸೊಡು ನಮ್ಮವೆ ಪುದರ್.... ತುಳು ಜನಕುಲು ಯೆಂಕುಲು...
ತಾರೆ ಕಂಗ್ದಾ ಬಾಳೆ ಬೈನೆದಾ ...
ಮಲ್ಲಿಗೆ ಸಂಪಗೆ ಜಾಜಿ ಅರಲುಂಡು...
ದೈವದೇವೆರ್ ಈ ನೆಲನ್ ಕಾಪುವೆರ್...
ನಿತ್ಯದ ನಮ್ಮ ನೇಮೊಗ್ ಒಲಿದ್... ತುಳು ಜನಕುಲು ಯೆಂಕುಲು...
ಅಳಿಯ ಕಟ್ಟ್ದ ಭೂತಾಳ ಪಾಂಡ್ಯೆ
ಬಲುಮೆ ಮೆರೆತಿನ ಕೋಟಿ ಚೆನ್ನಯೆ...
ತುಳುನಾಡ್ದ ಸಿರಿ ಅಬ್ಬಕ್ಕ ರಾಣಿಲಾ...
ಬೆಳಗ್ದ್ ಪುದರಾಯಿನ ನೆಲತಾ... ತುಳು ಜನಕುಲು ಯೆಂಕುಲು...
ಬೀಜಡ್ ಇಡೆಗ್ ಕಮ್ಮೆನ ಗಾಳಿ...
ಮಾಜ್ ಪೋವಡ್ ಬೊಡ್ಚಂದಿ ಚಾಳಿ...
ನ್ಯಾಯೊನು ದೀವೊಂದೂ ಅನ್ಯಾಯೊನು ದಕ್ಕ್ಗಾ
ನಮ್ಮ ಮಾತೆರಾ ಒಂಜೆಂದ್ ತೆರಿಕಾ... ತುಳು ಜನಕುಲು ಯೆಂಕುಲು...
ನೆಯಿ-ಪೇರ್ /58
