ಒಂಬುನಂಚ ಒಯ್ಯರನನೇ ಮೂಜಿ-ನಾಲ್ ಕಬಿತೆಲೆನ್ ಅವುಲವುಲು ದಿಂಜಾದ್ಂಡ್, ಒಂಜೆನೇ ಅದೆಟ್ ದೈವ-ದೇವರ ಭಕ್ತಿದ ಸುಗಿಪು, ರಡ್ನೆದ ಅದೆಟ್ ನಾಡ್-ನುಡಿತ ಪುಗಾರ್ತೆ, ಮೂಜಿನೆದೆಟ್ ಪರ್ಬ-ಲೇಸ್ದ ವರ್ಣನೆ, ನಾಲ್ನೇ ಅದೆಟ್ ಕವಿಕಲ್ಪನೆತ ಉಳದನಿಕ್ ಇಂಬು ಕೊರ್ಪುನ ಭಾವಗೀತೆಲೆನ್ ಕೂಟ್ ಪಾಡ್ಂಡ್, ಎಂಕ್ಲು ಸೂಚನೆ ಕೊರಂದೆ ಇಂಡಲಾ ಕೆಲವರ್ ಪಾಡನೊಲೆಡ್ ಪಿಂದಿನ ಹಿರಿಯಾಕ್ಲಸ್ಟ್ ಕೇಂಡಿನ ಒಂಜಾತ್ ಕತೆಕ್ಷೆನ್ ದೆತೊಂದು ಕಬಿತೆ ಮುಡದ್ ಕಡಪುಡೆರ್. ಅವೆನ್ ಕಿನಾರ ದೀತ್ ಐನ್ನೇ ಅದೆಟ್ ಕಥನ-ಕಬಿತೆ ಪುದಾರ್ಡ್ ಅಚ್ಚಿ ಮಲ್ತಂಡ್. ಇಂಚ ಐನ್ ಅದೆತ ಕೋಪೆ ಈ ಕಬಿತೆ ಗೊಂಚಿಲ್. ವಿಶ್ವ ತುಳು ಸಮ್ಮೇಳನೊತ ಸಂದರ್ಬೊಡು, ಲೋಕ ದಿಟ್ಟಿಡ್ ತುಳುತ ಮಲ್ಲಾದಿಗೆನ್ ನೆಗಪಾವುನ, ತುಳು ನೆಲತ ಪರಸಿರಿ- ಪರಪೋಕುನು ಒರಿಪುನ ಮಾಮಲ್ಲ ಕಜೊಗು ಎಂಕೆನ ಚನಿಲ್ ಚಾಕ್ರಿ ಈ ನೆಯಿ-ಪೇರ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಸಮ್ಮೇಳನೊದ ಅಡ್ಡಿಟ್ ಉಂದೆನ್ ಬೊಲ್ಲುಗು ಕನಯಿದ್ಂಡ್, ಈ ಕಬಿತೆದ ಕೋಪೆಗ್ ಕಬಿತೆ ಕಡಪುಡ್ಡು ನೆತ್ತ ದುನ್ನ-ಬಣ್ಣ ಹೆಚ್ಚಾಯಿನ ಮಾತ ಕವಿನಕ್ಲಗ್, ಗುರ್ಕಾರ್ಮದ ಮದಿಪು ಕೊರ್ದು ಬೆರಿಬೊಟ್ಟಿನ ಅಕಾಡೆಮಿದ ಗುರ್ಕಾರ್ ಡಾ. ಪಾಲ್ತಾಡಿ ರಾಮಕೃಷ್ಣ ಆಚಾರೆಗ್, ಯಾಪೊಲಾ ಎಂಕ್ ಬೆರಿಸಾಯ ಕೊರೊಂದುಪ್ಪುನ ಅಕಾಡೆಮಿದ ಸದಸ್ಯ ಮಿತ್ರೆರೆಗ್ ಬೊಕ್ಕ ರಿಜಿಸ್ಟ್ರಾರ್ ಬಿ. ಚಂದ್ರಹಾಸ ರೈಕೆಗ್ ಎನ್ನ ಅರ್ತಿ-ಪಿರ್ತಿದ ಸೊಲೈಲು. ತುರ್ತುಡಾಂಡಲಾ ಪೊರ್ಲುಡೇ ಅಚ್ಚಿ ಮಲ್ಡ್ ಕೊರ ಬೊಕ್ಕ ಅರ್ಥವತ್ತಾಯಿನ ಪೊದಿಕೆ ಚಿತ್ರೋ ವಿನ್ಯಾಸ ಮಲ್ಲಿನ ಆಕೃತಿ ಪ್ರಿಂಟ್ಸ್ದ ಕಲ್ಲೂರು ನಾಗೇಶ್ರನ್ ನೆನೆತೊನುವೆ. ನೆಯಿತ ಒಗ್ಗರ್ಣೆ, ಪೇರ ನುಪ್ಪು ತುಳುವೆರೆಗ್ ಐಸ್ರೊದ ಒಣಸ್. ಅಂಚನೇ ಉಡಲ್ಪ ಐಸ್ನು ಪರ್ಚಾಯೆರೆ ಸಬಿದುನಿಪುತ ಕಬಿತೆ ಗೊಂಚಿಲ್ 'ನೆಯಿ-ಪೇನ್ ಅರ್ಪಿತ ಮಲ್ಲೊಂದುಲ್ಲ. ಕೈಕೊನುದು ಕೊಂಡಾಟೊಡು ಮಾನಾಲೆ. ಕುಡ್ಲ (ಜಾರ್ದೆ ೨೪) ಭಾಸ್ಕರ ರೈ ಕುಕ್ಕುವಳ್ಳಿ ದಶಂಬರ 10, 2009 ಸಂಪಾದಕ ಸದಸ್ಯೆರ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ
