ತುಳುವೆರೆ ಬೂಡು
• ಶಿಮಂತೂರು ಚಂದ್ರಹಾಸ ಸುವರ್ಣ
ಉದಿತ್ ಬತ್ತೆರ್ ಬಾನ ದೇವೆರ್....ನೆಸರ್ ಪಸರೊಂದು ಮುಡಯಿಡ್ನೆ
ನೆಗತ್ ತೋಜುನ ಪಜಿರೆ ಕೊಡಿಕ್ಲೆಡ್ ಪಸೆರ್ದಿ ಮುತ್ತುಲೆ ಐತೊಡು||ಉದಿತ್||
ಮುಡಯಿ ಬಾನೊಡು ಜಲಕೊಗ್ಂದ್ದ್ ಕುರ್ನೀರ್ದ ಅಭಿಷೇಕನ...
ಮುಡಿಪೆರೆಂದ್ದೇ...ಲೆತ್ತೊಂದುಪ್ಪುನ ಮುಗುರು ತೆಲ್ಕೆದ ಮಲ್ಲಿಗೆನ....
ಭೂಮಿಯಪ್ಪೆನ...ಮುಂಡದೆಸಲ್ಡ್ ಬಟ್ಟಲ್ ಒರುತ ಬೊಟ್ಟನ...
ಬಾಮಿತಿನಾತ್ಲ ಮುಗಿಯಂದಿನಂಚಿನ ತುಳುವಪ್ಪೆನ ಸಂದಿ ಸುಲೆಕನ...||ಉದಿತ್||
ಪರಪು ನೀರ್ಡ್ ಪಾರು ಮೀನುಲು...ತಲಪಲ ನಲ್ತೊಂದುಲ್ಲನು...
ಪರಪು ಕಡಿಯಂದಿ ಒಸರ ನೀರ್ದ ದಂಡುಲು ಮೂಲುಂಡಾತಿನ...
ಬೈಲ ಸೀಮೆಡ್ ಎದ್ಕೊನೊಂದುಪ್ಪುನ...ಕಂಗ್, ತಾರೆ, ಬಾರೆನ...
ಒಯಿಲ ನೀರ್ಡ್ಲಾ,ಜಲ್ಲ ಪಾಡ್ದ್ ಕಡಪುದಾಂಟಾವು ಬಿಂಕನ...||ಉದಿತ್||
ಅಂಕ-ಆಯನ,ದುನ್ನ-ಬನ್ನದ...ನಾಗನಡೆನ್ ಈ ಪಿಂದನ...
ಎದ್ರ್ ಪಿರವು ಮದೆನ್ ಮಲ್ಪುನ ಮುತ್ತೆಸಿಲೆನಾಡ್ ಉಂದೆನ...
ಚದ್ರ್ ಚೌಕದ..ಪಚ್ಚನೆ ರಂಗ್ದ..ತುಳುವೆರೆ ಬೂಡು ಉಂದು ತೆರಿಯನ||ಉದಿತ್||
ಸತ್ಯದೈವೊಲು ಗಗ್ಗರದೆಚ್ಚಿಡ್ ನಲಿಪು ಪೊರ್ಲುನು ತೂಯನ
ಸೊರ್ಕುದಿ ಗಿರ್ದ್ದೆರ್ಲು ಕಂಬುಲದ ಕಲಟ್ ಪಾರು ಪೊರ್ಲುನು ತೂಯನ
ಕಡಲ ಸಿರೆಕುಲು ನುರೆ ಕಾರೊಂದು ಪೊಯ್ಯೊಗು ಮಗುರುನ ತೂಯನ...
ಉಡಲ್ದ ಮಲ್ಲಾದಿಗೆದ ತುಳುವೆರೆ ಅಂತ್ ಗೊಂತುನು ಪಿಂದನಾ||ಉದಿತ್||
ನೆಯಿ-ಪೇರ್ /54
