ಹಳ್ಳಿದ ಪೊರ್ಲು
• ವಸಂತಿ ಶೆಟ್ಟಿ ಬ್ರಹ್ಮಾವರ
ಪಾರೊಂದು ಬಲ್ಲೆ ನೂರೊಂದು ಬಲ್ಲೆ
ಹಳ್ಳೀದ ಪೊರ್ಲುನು ತೂವೆರೆ ಬಲ್ಲೆ
ಬಲ್ಲೆಯೆ ಬಲ್ಲೆ... ಅಹ ಬಲ್ಲೆಯೆ ಬಲೆ...
ಹಳ್ಳಿದಕುಲೆನ ಬದ್ಕ್ನ್ ತೂಲೆ ||
ಮೂಡುನ ಬೊಳ್ಳಿ ಕಿಲಪುನ ಕೋರಿ
ಕಾಂಡೇದ ಪೊರ್ಲುಡು ಅರಲುಂಡು ಪೂಬಲ್ಲಿ
ರಾವುನ ಪಕ್ಕಿಲು ಮುರೆಡುನ ಜೋಕುಲು
ಕಿದೆ ನಿಲಿಕೆಡುಂಡು ಬೊರಿವುನ ಪೆತ್ತೊಲು ||
ಮೂಡಾಯಿ ಗುಡ್ಡೆಡ್ ಪುಟ್ಟುಂಡು ಪೊರ್ಲು
ಪಡ್ಡಾಯಿ ಕಡಲ್ಡ್ ಕಂತುನ ಪೊರ್ಲು
ಸುಗ್ಗಿದ ಕಂಡೊಡು ನಲಿಕೆದ ಕೊರಲು
ಉಣ್ಣಿನ ಬಟ್ಟಲ್ಡ್ ನುಪ್ಪುದ ಪೊರ್ಲು ||
ಪಂರ್ದ್ದ ಪಂಣ್ಯ ಬತ್ತಿನ ಬಿನ್ನಗ್
ದೊಂಬುದ ದಾವುಗು ಬೆಲ್ಲ ನೀರ್ದ ಗಿಂಡಿಗೆ
ಗುಜ್ಜೆದ ಪಚ್ಚಿರ್ ಕುಕ್ಕುದ ಪಂರ್ದ್
ಕಂರ್ಬುದ ಚೀಪೆ ಉಡಲ್ಡ್ ಮೋಕೆ
ಕೋರಿದ ಅಂಕೊಗು ದಾಂಟೊಂದು ಸಂಕ
ಕಂಬುಲದ ಕಂಡೊಗು ದೇರೊಂದು ಎಂಕ
ತಾರೆದ ಜೂಜು ಕುಸ್ತೀದ ಪಂತೊ
ಗೊಬ್ಬುನ ಪೊಕ್ಕು ಮೆಪ್ಪುನ ಪಂತೊ
ಪನಿ ನೀರ್ದ ತುದೆಲು ಪರಪುನ ತೋಡು
ಜುಳು ಜುಳು ಜಳಜಳ ನೀರ್ದ ಸಬ್ದ
ದಿಂಜಿನ ಕೆದುಟು ನೀಂದುನ ಜವಣೆರ್
ಮದಪಂದಿ ಆ ದಿನೊಲು ಎಣ್ಣೆರೆಗ್ ವಾ ಪೊರ್ಲು ||
ಪಾರೊಂದು ಬಲ್ಲೆ ನೂರೊಂದು ಬಲ್ಲೆ ||
ನೆಯಿ-ಪೇರ್ /52
