ತುಳುವ ತಮೇರಿ
• ಮುದ್ದು ಮೂಡುಬೆಳ್ಳೆ
ಇರ್ಲ್ ಕರಿದ್ಲ ಬೊಲ್ಪು ಬೆಲಗ್ಂಡ್ ಕೋರಿ ಕೋಕೋ ಕಿಲೆತ್ಂಡ್
ಪೊರ್ಲು ದೇವೆರ್ ನೇಸರುದಿಪನ ತುಳುವ ತಮೆರ್ನ್ ಮದಿತ್ಂಡ್ ||ಪಲ್ಲ||
ಕಡಲ್ ಪಡ್ಡಯಿ ಗಟ್ಟಮುಡಯಿಲ ತೆಂಕ್ ಬಡಕಯಿ ತುದೆಕುಲು |
ತುಳುವೆ ಕೊಂಕಣಿ ಕನಡೆ ಜಯಿನೆ ಮರಾಟಿ ಮಾತೆರ್ ಮಾನಿಲು |
ಪಿರವು ಡಾವಡ್ ಇನಿಕ್ಲಾವಡ್ ಪರಪು ನೆತ್ತೆರ್ ಒಂಜೆನೇ |
ಯಾನ್ ನಿನ್ನಯೆ ಈಲ ಎನ್ನಾಯೇ ಪಣ್ಫಿ ಪಾತೆರದಂಚೆನೇ ||
ಬರವು ಬದ್ಕ್ದ ವಾನಿ ಮಾನಿನ ಬಾಗೊಗಿತ್ತ್ಜಿ ಸತ್ಯನೇ ।
'ಒರ್ಲ ತಪ್ಪಡ ಇರ್ಲ ಉಪ್ಪಡ' ಪಣ್ಪಿ ಪಾತೆರದಂಚೆನೇ ।
ಬೋರ್ಲು ಎರು ಕೈಕಂಜಿ ಕೋರಿಲು ಕಾಡ್ಕಂಡೊದ ಬುಲೆಸಲೆ |
ಬೀರ ಪಾರ್ದನ ಪಾರಿ ಪಣ್ಪಿನ ನೇಮನೆಚ್ಚಿದ ಗೇನನೇ ||
ಏರೆನಪ್ಪಣೆ ಪಂಡಿಬೇಲೆಲ ಪಾಡಿ ನುಪ್ಪುದ ಕುಚ್ಚನ |
ಎಂಕ್ ಎನ್ನವು ಓಲು ಏರೆಡ! ಮಲ್ಪರಿತ್ತ್ಜಿ ಎನ್ನಿನ |
ಏರ್ ಬೆಂದೆರ ಏತ್ ಸೊಂದ್ಯೆರ ಒರಿತೆರೇರೀ ತಮೆರಿನ್? |
ಸತ್ಯೊಗಾಂಡಲ ಗೆಂದ್ ಕೊರ್ಯೆರ್ ನಂಕ್ನಮ್ಮವೆ ಉಸುಲುನು ||
ಓಲೆ ಉಪ್ಪುಲ ಇತ್ತೊಂದೀ ಬಲ 'ಸತ್ಯ' ಕಾಪಡ್ ತುಳುವನ್ |
ಬುಲೆಪಿ ರಾಪುಗು ರಟ್ದ್ ಪೋವಂದೆ ಮಣ್ಣಕಮ್ಮೆನ ಕಾತೊನು |
ಪೆದ್ದಿಯಪ್ಪೆನ್ ಪುಟ್ಟಿಯೂರ್ನ್ ಮದಪಡೇಪಲ ತೆರಿಯೊನು |
ಉಡಲ್ ತುಳುತವು ನಡಕೆ ತುಳುವವು ಭಾರತೀಯತೆನೆನ್ನವು ||
ನೆಯಿ-ಪೇರ್/48
