ಭೂತ ಕೋಲ
• ವಸಂತಿ ಶೆಟ್ಟಿ, ಬ್ರಹ್ಮಾವರ
ವರ್ಸಗೊರ ಕೋಲ ಉಂಡು
ನೆಲ್ಲಿಕಟ್ಟೆಡ್ ಒಕ್ಕೆಲುಂಡು
ಸುಗ್ಗಿ ಕರಿದ್ ಪಗ್ಗು ಬನ್ನಗ
ಖುಸಿ ತೆಲಿಕೆ ಉರ್ಕೊಂದುಂಡು
ಪಂಬದನ ಮೋಣೆನಿಲಿಕೆ ಸೇಡಿಸುಣ್ಣ ಬಣ್ಣಯಾ
ಬಂಗಾರದ ತರೆಪಟ್ಟ ತಿರ್ತ್ ಸುಂದ್ದಿ ಪೂತ ಅಟ್ಟೆ
ತಿರ್ತ್ ಕೆಂಪು ಚಲ್ಲಣ, ಮಿತ್ತಂಗಿಡ್ ಭೂಷಣ
ಕಾರ್ಗ್ ಕಟ್ಟಿ ಗಗ್ಗರ ವೇಷ ತೂಂಡ ಅಬ್ಬರ
ಮದಿಪುದಾಯೆ ನಡುಟು ಉಲ್ಲೆ ಎದುರು ಬದುರು ಪಾಕ ಜನ
ಅಣಿಕಟ್ಟಿ ಬೊಕ್ಕನೆ ಕುಂಬಾರುನ ದರ್ಸನ
ಅಯಿತ ಸುರುಟು ಉರ್ತೊಂದುಲ್ಲೆ ನಾಗಸ್ವರತ ವಾದನ
ಉಡಲ್ದ ಬೇನೆ ಪಣ್ಣೊನ್ರೆಗ್ ಸೇರ್ದಿನಕುಲು ಊರ್ದ ಜನ
ರಾತ್ರೆ ಪಸಿನ ಕಾಂಡೆ ಮುಟ್ಟ
ಉಂತಂದಿನ ದರ್ಸನ
ಒರಿಯೊರಿಯನೆ ಕೇನೊಂದುಲ್ಲೆರ್
ಬೇನೆ ಬ್ಯಾರ ವಿರಸನ
ಮದಿಪುದಾಯೆ ಪನೊಂದೆ ಉಲ್ಲೆ ಎಂಚ ದಾದ ಏಪಯಾ
ಕೊರ್ಪಿ ನುಡಿ ಕಡ್ತ್ ತುಂಡು ಮಲ್ಪೊಡನ್ಪಿ ಸನ್ನಯಾ
ಅಡ್ಡ ಬೂರ್ದು ನಂಬಿನಕುಲೆಗ್ ಇಂಬು ಕೊರ್ಪಿ ದೈವಯಾ
ದಕ್ಕಿ ಎಸಲ್ ಪಿಂಗಾರ್ದವು ಗೆನ್ಪನಗ ಮುಗುಳಿಯಾ
ವರ್ಸೊಗೊರ ಕೋಲ ಉಂಡು
ನೆಲ್ಲಿಕಟ್ಟೆಡ್ ಒಕ್ಕೆಲುಂಡು
ಸುಗ್ಗಿ ಕರಿದ್ ಪಗ್ಗು ಬನ್ನಗ
ಖುಸಿ ತೆಲಿಕೆ ಉರ್ಕೊಂದುಂಡು ||
ನೆಯಿ-ಪೇರ್/11
