ಹಳ್ಳಿದ ಬದ್ಕ್
• ಶೀಲಾ ಕೆ. ಶೆಟ್ಟಿ,ಎರ್ಮಾಳ್
<poem>ಬೊಳ್ಳಿ ಮೂಡುದು ಪೊರ್ತು ಏರ್ಂಡ್ ಮುಡಯಿ ಬಾನದ ಕೋಡಿಡ್... ಹಳ್ಳಿದಿಲ್ಲಡ್ ಬೇಗ ಲಕ್ಕ್ದ್ ಬೇಲೆ ಮುಗಿಪುನ ಗೌಜಿಡ್... ಕಾರ್ ತಿಂಗೊಳು ಪಗೆಲ್ ರಾತ್ರೆಲ ಗಳಿಗೆ ದಾಂತಿನ ನೆಮ್ಮದಿ... ಕೋರಿ ಕಿಲೆಪೆಲ್ ಲಕ್ದ್ ಬೆನ್ಫಿನ ಬೆನ್ನಿದಿಲ್ಲದ ಗುರ್ಕಾರ್ದಿ. ಬೇನೆ, ಬೇಸರ ತೋಜಾವಂದನೆ ಮೋನೆ ದೆಕ್ಕ್ದ್ ಕುಂಕುಮ... ಮಾನ ಕಾಪುಲೆ ಇಲ್ಲ ದೈವೊಲೆ ಗೇನದಿಂಜಿದ್ ನಟೊನುವೇ... ಎರ್ಲೆ ದೇರೊಂದು ಕಾಂಡೆ ಕಂಡೊಗು ಪೋಪಿ ಕಂಡನಗ್ ತಂಜನಾ... ಪೊರ್ಲು ಪಾತೆರ, ಮುಡಿತ್ತ ಉಪ್ಪಡ್, ಬಿರಾದ್ ಕೊರ್ಪಿನಿ ಬೆಂಜನಾ. ಕಪಿಲೆ ಲೆತ್ತ್ಂಡ್ ಕಿದೆತ್ತ ಬಾಕಿಲ್ಡ್ ಕಂಜಿ ಲೈತ್ದ್ ಮುರೆಡ್ಂಡೇ... ಚೊಂಬು ದಿಂಜಿನ ನುರೆತ್ತ ಪೇರ್ಡ್, ಸೂರ್ಯ ಬಿಂಬಲ ತೆಲ್ತ್ಂಡೇ... ಮಾಮಿ, ಜೋಕುಲು ಲಕೊಂದು ಬತ್ತೆರ್, ಕಾಫಿ ಲೋಟೆದ ನೆನಪುಡು.. ಮಾಮ, ಪುಂಡಿಡ್ ಬಾರ್ ಕಂತೆ ಕಿಲೆಪು ಕೋರಿದ ಗುಂಟೊಡು ಶಾಲೆ ಜೋಕುಲು ಡಬ್ಬಿ ದಿಂಜಾದ್ ಕೈಟ್ ಕೊರಿನ ಅಪ್ಪೆಗ್... ಮನಸ್ ದಿಂಜಿದ್ ಸೊಳ್ಳೆ ಮಲ್ಡ್ದ್, ಪೋದು ಬನಿ ಬಯ್ಯಗ್... ಉಲಯಿ ಅಂಡೆಗ್, ಪಿದಯಿ ಗುರೆಗ್, ನೀ ದಿಂಜಾದ್ ಬನ್ನಗಾ.. ತೂತ್ತ ಕಡಕ್ಕೊಳಿ ಒಯ್ ಪಾಡ್ಂಡ್ ಪರಪು ಬಾಲೆನೆ ಗೊಬ್ಬುನಗಾ ಇಲ್ಲ ಮುಂದಿಲ್, ಜಾಲ್ ಅಡ್ತಿದ್, ಚೊಂಬು ಬಟ್ಟಲ್ ದೆಕ್ಕೊಡು... ಕಿದೆತ್ತ ಕೈಕಂಜಿ, ಅಂಬೇ ಪನ್ನೊಂದು ಪಿದಯಿ ಬಲ್ಲೆರೆ ತೂಪುಂಡು. ಅಯ್ಯೋ ದೇವೆರೆ ಮತ್ತೆ ಬತ್ತೆರ್ ಸೂರ್ಯದೇವೆರ್ ನೆತ್ತಿನ್... ಏಪ ಮುಗಿಪುಂಡ ರಾಶಿ ಬೇಲೆಲು ಕುಂಟು ಅರೊಡು ಬಯ್ಯಗ್ ಪಾರು ಪೊತ್ತುನ ಉಂತಾದೀವರೆ ಎರೆನ್ಲೆಪುನು ದೇವೇರೇ... ಜಾರು ಪಗೆಲ್ ಉದ್ದ ಮಲ್ಪೆರೆ ಈರೆ ಎಂಕ್ಲಗ್ ಆಸರೇ... ಮುತ್ತು, ರತ್ನದ ಸತ್ತಿಗೆಡ್ ದಿನ ದೆಪೊಡುಂದುದು ಕೇನಯೋ... ಪತ್ತ್ ಜನೊಕುಲೆ ನಡುಟು ಬಾಳುನ ಗಡ್ಡೆ ಕೊಲ್ಲಿಯ ಉಲ್ಲಯೋ... 5 200-300 /169
