ಈ ಪುಟೊದ ಪರಿಶೀಲನೆ ಆತ್ಂಡ್
ಪುಣ್ಣಮೆ
ರಘು ಇಡ್ಕಿದು
ಬಾನೊದ ಜಾಲ್ಡ್ ರಂಗೋಲಿ ಪಾಡ್ಡಲ್
ಪೊರ್ಲುದ ಪುಣ್ಣಮೆ ಮದಿಮಾಲ್ |
ಮುಡಿತಿನ ಮಲ್ಲಿಗೆ ಪೂವುನು ಬಿರ್ಕ್ದ್
ಕಿಟಿಕಿಟಿ ಕಿಟಿಕಿಟಿ ತೆಲಿಪುವಲ್ ||
ಆಲೆನ ಪಟ್ಟೆದ ಸೀರೆಡ್ ನಿಲಿಕೆ
ಪೊರ್ಲುದ ಮುತ್ತುನು ಕೋಂತುದುಂಡು |
ಕೋಂತುನ ಮುತ್ತುಲು ಮೆನ್ಕುನ ಬೊಳ್ಳಿಲು
ಆಲೆನ ಕಣ್ಣ್ದ ಬೊಲ್ಪುಡುಲ ||
ಮುಂಡೊಡು ಮೆನ್ಕುನ ಪಾವೊಲಿ ಕುಂಕುಮ
ಚಂದ್ರನ ಬಿಂಬೊಡೆ ತೋಜುಂಡುಲ |
ಪಾರುನ ಮುಗಲ್ಡ್ ಆಲೆನ ಕುಜಲ್
ಪೊರ್ಲುದ ಚಿತ್ರೊನು ಬುಡ್ಪದ್ಂಡ್ ||
ಆಲೆನ ಕೂಲಿಡ್ ಮೂಂಕುದ ಟಿಕ್ಕಿಡ್
ಪಾಡಿನ ಪದ್ದೆಯಿ ಬಂಗಾರ್ಡ್ |
ಕೈಕುಲೆ ಕಾಜಿಡ್ ಕಾರ್ದ ಗೆಜ್ಜೆಡ್
ಬೊಳ್ಳಿಲು ಲಕಲಕ ಮೆನ್ಕುಂಡು ||
ಲೋಕೊಗು ತಂಪುನು ಕೊರ್ಪುನ ಮದಿಮಲ್
ಶಾಂತಿದ ನೀತಿನ್ ಸಾರ್ವಲ್ |
ಪೇರ್ನೆ ಜಗತ್ಗ್ ಪಟ್ಟ್ದ್ ಆಲ್
ಕೊರ್ಪಲ್ ಬದ್ಕ್ಗ್ ಉಲ್ಲಸೊನು ||
ನೆಯಿ-ಪೇರ್/160
