ಅಪೆನುಡಲ್ • ಮೈನಾ ಹೆಗ್ಡೆ ಅಪ್ಪೆರೇ, ಪುರುಬಾಲೆ ಸುರೂಕು ಯಾನ್ | ಜುಂಬುದು ಸಬಿತೆ ಇರೆನ ಮಿರೆತ ಪೇರ್ನ್ || ಮಿರೆ ಉಡೆದ್ ಅಯಿತ ಚೊಟ್ಟುಗು ಈರ್ ಪೂಜಿನ ನೆಯಿನ್ | ಇರೆನ ಬೇನೆನೇ ತೆರಿಯಂದೆ ಒಯಿತ್ ಜುಂಬಿಯ ಯಾನ್ || ಪದಿನಾಜನೇ ಅಮೆತ ನೀರೆಲ್ ಕರಿದ್ | ಗೋಧೂಳಿ ಪೊರ್ತುಂದು ತೊಟ್ಟಿಲ್ಗ್ ಪಾಡಿಯರೆನನ್ || ಅಜ್ಜಿ ತಿನ್ಸಾಯ್ ಪೇರ್ ನುಪ್ಪುನು ಕಡೆಂಚಿದ್ | ಅವೆನ್ ಸಬಿತ್ ಜೆತ್ತೆ ತೊಟ್ಟಿಲ್ಡ್ ಯಾನ್ || ಅಪ್ಪೆರೆ, ಇರೆನ ಮಿರೆತ ಪೇರ್ ಆಜೊಂದು ಬನ್ನಾಗ | ಪರಿಯೆರೆ ಕೊರಿಯರೆಂಕ್ ಕಬೆತ್ತಿ ಪೆತ್ತದ ಪೇರ್ || ನೆಯಿ ಪಾಡಿನ ಉರ್ಪೆಲ್ ಗಂಜಿನ್ ಸುರ್ತುದುನ್ನಾಗ | ಸಬಿತ್ದುನುಪುನ ಪೊರು ತೂದು ತೆಲಿತೊಂದಿತ್ತೆರ್ ಅಜೆರ್ ನೆತ್ತಿಗೆ ನೆಯಿ ಪತ್ತಾದ್ ತಿಗಲೆಗ್ ನೆಯಿ ಪೂಜಿದ್ | ಪೇರ್-ನೆಯಿ ತಿನ್ಸಾದ್ ಮೋಕೆಡೇ ಸಾಂಕಿಯರೆನನ್ || ಅಷ್ಟೆರ ಮಟ್ಟೆಲ್ತ್, ಅಜ್ಜಿನ ನಿಟ್ಟೆಲ್ I ಅಜ್ಜೆರೆನ ಪುಗ್ಗೆಲ್ಡೇ ಮಲ್ಲೆ ಆಯಿನ ಮಗೆ ಯಾನ್ ಅಜ್ಜೆರೇ, ಪನಿಯೆರಾವಂದ್ ಯಾನ್ ದೇವರೆ ಪಾದೊಡಿತ್ತಿನ ಇರೆಡ | ಆಂಡ ಪನಂದನೇ ಇತ್ತೆಡ ಸಮಾಜೊಗು ಎಂಚ ಗೊತ್ತಾವು ಎನ್ನ ಸಂಕಡ || ಕುಲದೈವೊಲೆನ್-ನಾಗಬೆರ್ಮೆರೆನ್ ನೆಯಿಪೇರ್ದಂಚ ಹೆರಿಯೆ ತೂತಿನಂಗ್ಡಾ | ಕಲಿಯುಗತ ಈ ಸಮಾಜ ಮೂಲದಿಲ್ಲದೇ ಬೀಗ ಜಡಿಪೊಡಾ || ಮೂಜಿ ವರ್ಸದ ಬಾಲೆಲೆನ್ ಗೊಬ್ಬುನ ಶಾಲೆಲೆಗ್ | ನೆಯಿ ಪಾಡಿನ ಗಂಜಿ ಉನ್ನಾವಂದೆ ಕಡಪುಡುವೆಂದ್ ಪನ್ನಿನಾ || ಅಜಿಪ ಕರಿನ ಕುಜಲ್ ನರೆಯಿನ ಪ್ರಾಯದಕಲೆಗ್ | ಪೇರ್-ನೀರ್ ಕೊರಂದೆ ಪರಬೆರೆ ಆಶ್ರಮೊಗು ದಕ್ಕುವೆರ್ಂದ್ ಪನ್ನಿನಾ | ಅಜ್ಜೆರೇ, ಸೌರಯುಗಾದಿಗ್ ಎರು ಮಾದನಗ ಬಚ್ಚಿರೆ ಪೂಲು ದೀದ್ | ಸಾಣಾದಿಗೆಡ್ ನೆಯಿತ ಬೊಲ್ಪು ದೀತರ್ ಈರ್ | 800-250/127
