ತುಡಾರ್ ಪರ್ಬ
• ವಾಮನ ಕೋಟ್ಯಾನ್, ನಡಿಕುದ್ರು
ಕನ್ಯದ ಬೆನ್ನಿದ ಬೇಲೆದ ಉರ್ಬುನ್ ಮುಗಿತ್ತ್ದ್
ಬೊಂತೆಲ್ಡ್ ಕರಿಕತ್ತಲೆದ ಅಮಾವಾಸ್ಯೆನ್ ಸುಗಿತ್ತ್ದ್
ಪಡ್ಡಾಯದ ಎರಿಗಾಳಿಡ್ ತಾರೆದ ಮಡಲ್ದ್ ಮದೆಟ್
ಕತ್ತಲೆನ್ ದೂರ ಮಲ್ತ್ ಜ್ಞಾನದ ಬೊಳ್ಪು ಅರ್ಲಾವುನ ತುಡಾರ್ ಪರ್ಬ
ನರಕಾಸುರನ್ ನರಕೊಗ್ ನೂಕುದು ಸತ್ಯದ ಬೊಳ್ಪು ಅರ್ಲಾದ್
ಬೆನ್ತಿನ ಜುವೋಗ್ ಎಣ್ಣೆ ಪೂಜಿದ್ ಮೀಪಿನ ನರಕಚತುರ್ಥಿ
ಬಲಿಕ್ ಮೂಜಡಿ ಜಾಗ ನಟ್ಟುನಗ, ವಾಮನ ಮೂರ್ತಿ
ಪಾತೊಳ್ಗ್ ದೊಂಕ್ದ್ ಬಲೀಂದ್ರ ಪೂಜೆದ ಬಲಿಪಾಡ್ಯ
ಮಣ್ಣಿದಪ್ಪೆಗ್ ತುಡರ್ ಸಿರಿದೀದ್ ಇಲ್ಲೊರ್ಮೆ ಸಿರಿ ಸಿಂಗಾರೊಡ್ ಸಿಂಗರ್ದ
ಕೊಟ್ಟು ನಾಯೆರ್, ಬೆನ್ನಿದ ಸೊತ್ತುಲೆನ್ ಸಿಂಗರ್ದ್
ಕಂಡ ಕಂಡೋಡ್ ಬಾಕ್ಯಾರ್ ಬೊಟ್ಟುಡ್ ಊರೀಡಿ ಬೊಳ್ಪುದ ತುಡರ್ನ್ ಪೊತ್ತಾದ್
ಕರ್ಕಲ್ಲ್ ಕಾಯಿಪೋನಗ, ಬೊರ್ಕಲ್ಲ್ ಪೂ ಪೋನಗ
ಮಂಜೋಲ್ ಪಕ್ಕಿ ಮೈಪಾಡ್ನಗ, ಕೋಂಟ್ರಿಞೆ ಕೊಡಿ ಜಾನಗ
ಗುರ್ಗುಂಜಿ ಕಪ್ಪು ಮಾಜಿನಗ, ಎರು ದಡ್ಡೆ ಆನಗ
ಜಾಲ್ ಪಾದೆನಗ, ದೊಂಬೇಲು ಪಾಂಪು ಪಾಡ್ನಗ
ನೆಕ್ಕಿತ ಮರತಡಿಟ್ ಕಾಟಕೂಡ್ನಗ ತುಂಬೆದ ಮರತಡಿ ಆಟಗೊಬ್ಬುನಗ
ದಂಟೆದಜ್ಜಿ ಮದ್ಮಲಾನಗ ಆಟಿದಮವಾಸೆ ಸೋಣ ಸಂಕ್ರಾಂತಿ,
ಬೊಂತೆಲ್ ಕೊಡಿ ಪರ್ಬೊಡು ಒಟ್ಟೆ ಓಡೋಡ್, ಮೋಂಟು ಜಲ್ಲೋಡು
ಆಜಿ ದಿನತ ಬಲಿ, ಮೂಜಿ ದಿನತ ಪೊಲಿ ಬಲ ಬಲೀಂದ್ರಾ
ಪಂಡ್ದ್ ಲೆತ್ತ್ದ್ ಬಾಕ್ಯಾರ್ ಒರ್ಮೆ ತೂನಗ
ಶನಿಮಹಾತ್ಮೆದ ಪದ್ಮಾವತಿನ ಸಜ್ಜಾಗ್ರಹೊಟು ವಿಕ್ರಮ ರಾಜೇ
ದೀಪಕಾಮಾಲಾ ರಾಗೊನು ಪಾಡ್ನಾಗ ಆತಿನ ತುಡಾರ್ದ ರಾಶಿದ ನೆಂಪಾಪುಂಡು.
ವೃಂದಾವನ ಕಟ್ಟೆದೆದುರು, ತಿರುಮಲೆ ತಿಮ್ಮಪ್ಪಗ್ ಪಣವ್ಕಟ್ದ್
ಪಣವುದಪ್ಪೆ ಲಕ್ಷ್ಮಿನ್ ಗೌಜಿಗದ್ದಲೊಡು ಸಿಂಗರ್ದ್
ದುರ್ಸು ಪಟಾಕಿದ, ರಂಗ್ ರಂಗ್ದ ಗೂಡುದೀಪದ ಆಪೊರ್ಲು
ನೆಯಿ-ಪೇರ್ /119
