ತುಲಸಿ ಪರ್ಬೊ • ಡಾ| ಮೀನಾಕ್ಷಿ ರಾಮಚಂದ್ರ, ಮಂಗಳೂರು ಲೋಕೊ ದಿಂಜಿನ ಕರ್ಪು ಕತ್ತಲೆ ನೂಂಕೆರೆಂದೇ ಬರ್ಪಿನ ಬೊಲ್ಲು ಪರ್ಬೊದ ಸೆರಂಗ್ ಪತ್ತೆ ತುಲಸಿ ಪೂಜೆಗ್ ಎದುಕೊ... ಪಡ್ಡಾಯಿ ಕಡಲ್ಡ್ ಪೊರ್ತು ಕಂತ್ಕಂಡ್ ತಿಂಗೊಲ್ದ ಬೊಲ್ಪು ಪೊಯ್ಲೆಂಡ್ ಬಯ್ಯರಾಗೊದ ಸೊರನೆ ಕೇನುಂಡು ತುಲಸಿ ಕಟ್ಟೆದ ಮುದೆಲ್ಡ್... ಪೊಸ ಬಣ್ಣ ಮಿಂಚುನ ತುಲಸಿ ಕಟ್ಟೆಡ್ ನೂದು ತಿಬಿಲದ ಬೊಲ್ಪುಂಡು... ಮುತ್ತೇಸಿ ಸಿರಿಕೊರ್ಪಿ ದೇವಿನೆದುರುಡು ಪೊಣ್ಣ ಮೂಂಕುತಿ ಮಿಂಚುಂಡು... ಪೊಣ್ಣ ಮುಂದೊಡು ಕೆಂಪು ಬೊಟ್ಟ ತರೆಟ್ ಪೂತ ಸಿಂಗಾರ.. ಕೈಟ್ ಪಚ್ಚೆದ ಕಾಜಿ ಗಲಗಲ... ಕಾರ್ ಗೆಜ್ಜೆದ ಕಿಲಕಿಲ... ಅಪ್ಪೆ ತುಲಸಿನ ಕಾರ್ ಪತ್ತದ್ ಪೊಣ್ಣ ಉಡಲ್ದ ಪಾತೆರ... ಕಂಡನ ಎದುರುಡೆ ಸವರೊನು ಕೊರು ಏಪಲ ಕಾಪುಲ... ಜೂವೊ ಪಡೆದಿನ ಜಂತು ಸಾನ್ ಬದ್ಕೆಂದೇ ಪುಣೆನಗ ಪೊಣ್ಣು ಮಾತ್ರ ಸವರೊನು ದಾಯೆ ಕೇನ್ವಲ್ ಗೊತ್ತುಂಡ? ಕಂಡನ್ನೊಟ್ಟುಗು ಸತಿಕ್ ಪೋಯಿನ ಕತೆಟ್ ಬೂಕುಲು ದಿಂಜ್ಂಡ್... ಬುಡೆದಿಗಾದ್ ಜೂವ ಕೊರ್ತಿನ ಕತೆಲು ನನಲಾ ಒರಿದ್ಂಡ್... ಪೊಣ್ಣ ಉಡಲ್ ಉಲಯಿ ಪೊತ್ತುನ ಪಿರಿತಿ ತಿಬಿಲದ ಬೊಲ್ದುಡು ಮನಸ್ ಕತ್ತಲೆ ಕರಿದ್ ನಡಪುಲೆ ಬರ್ಪಿ ತುಲಸಿದ ಪರ್ಬೊಗು... Sa-eos/117
