ಆಟಿ ಕುಲ್ಲುದೊಲು....
• ಎಮ್. ಜಾನಕಿ ಬ್ರಹ್ಮಾವರ
ಆಟಿ ಕುಲ್ಲುದೊಲು.... ಮಗಲ್... ಆಟಿ ಕುಲ್ಲುದೊಲು....
ಮೋಕೆ ಜೋಕೆದಪ್ಪೆನಿಲ್ಲಡ್ ಆಟಿ ಕುಲ್ಲುದೊಲು...
ಕಂಡನಿಲ್ಲದ ಬೊಡಿಬಚ್ಚೆಲ್ ದೆತ್ತೊಂದುಲ್ಲೊಲು...
ಎಲ್ಯಿದಾ ನೆಂಪು ತಂಚಿ ಗಿರ್ತೊಂದುಲ್ಲೊಲು...
ಚೆನ್ನೆಮಣೆಟ್ ಗೊಬ್ಬುವೊಲು ಜೋಡುಪೆರ್ಗೆಗೆ...
ಅಜ್ಜಿ ಪಣ್ಪಿ ಪಾಡ್ದನೊಲು ಬಾರಿ ಇಂಪುಗೆ....
ಅಮಾಸೆದಾನಿ 'ಪಾಲೆಮರ್ದ್' ಮೆತ್ತೆ ಗಂಜಿಗೆ...
ತೇವು, ಪದ್ಪೆ ತಜಂಕ್ ಕಜಿಪು ದಿಂಜ ರುಚಿತಗೆ....
ಆಟಿ ಕಳೆಂಜೆ ಬತ್ತೆಗೆ ಮಾರಿ ಕಳೆಪ್ಪೆಗೆ...
ನಲಿಕೆದೊಟ್ಟು ಡಂಗ್ಡಂಗ್ ತೆಂಬರೆ ಬೊಟಿಯೆಗೆ...
ಮಾರಿಪರ್ಬದಾನಿ ಮಾರಿ ದೇರ್ದಾಂಡ್ಗೆ...
ನಾಗಕಲ್ಲ್ಗ್ ತನುಮಯ್ತ್ ಪುಡಾಡ್ದಾಂಡ್ಗೆ...
ಆಡ ಆಡ ಆಟಿ ಕರಿಯೊಂದುಂಡುಗೆ...
ಕುದುರೆ ನಡಕೆದಾ ಸೋಣ ಬರಿಯರಾಂಡ್ಗೆ...
ಮಂಜಲ್ ಮಂಜಲ್ 'ಕೊಲ್ಲಪೂ' ಮುಂಗೆ ದೀಂಡ್ಗೆ...
ತಡ್ಡೆದಜ್ಜಿನ್ ಎದ್ಕೊನೆರೆ ಅಟ್ಟಣೆ ಆಂಡ್ಗೆ..
ಆಟಿ ಕುಲ್ಲುದಿನ ಮಗಲ್ ಕಾತ್ ಕುಲ್ಲುದೊಲು...
ಲೆಪ್ಪೆರೆ ಬರ್ಪಿ ಕಂಡನಿನ ಸಾದಿ ತೂಪೊಲು...
ಅಪ್ಪೆನಿಲ್ಲಗ್ 'ಎಡ್ಡೆಪು'ನೇ ಬಯಕೊಂದುಲ್ಲೊಲು..
ಸುಕ ಸಂಪೊತ್ತು ಉರ್ಕಡ್ಂದ್ ನಟೊಂದುಲ್ಲೊಲು... || ಆಟ ||
ನೆಯಿ-ಪೇರ್/107
