ಸಂವೇದನಾಶೀಲ ಮನಸ್ಸೇ, ಸೃಜನಶೀಲ ಜಾಯಮಾನ. ಇಂಚಿತ್ತಿನಕೆಗೆ ಮಾನಸಿಕ ಕೇಶ ತಪ್ಪಿನತ್, ಕೇಶೂಲೆನ ನಡುಟುಲಾ ತನ್ನತನೂನು ನಗ ತೋಜಿಪಾವುನವು ವ್ಯಕ್ತಿತ್ವದ ಮಲ್ಲಾತಿಗೆ. ತುಳು, ಕನ್ನಡೊಡು ಕತೆ, ಕಬಿತೆ, ನಾಟಕ, ರೂಪಕಲೆನ್ ಬೋಡಾಯಿನಾತ್ ಮುಡೆಯಿನ ಆರ್ ಸಾಹಿತ್ಯದ ನಿತ್ಯ ಸಂಪರ್ಕ ಇತ್ತಿನಾರ್, ಸಂಗೀತ, ನೃತ್ಯ ಇತ್ಯಾದಿ ಆರೆನ ಇಷ್ಟೊದ ವಿಷಯೊಲು. ಅಗತ್ಯಗು ಬೊಡಾಂಡ ಉಂತಿ ಅಷ್ಟೊಡೆ ಆಶು ಕವಿತೆ, ರೂಪಕೊಲೆನ್ ಅಪಗಪಗನೇ ಸೃಷ್ಟಿ ಮಲ್ತದ್, ಪ್ರದರ್ಶನೊಳೆಗ್ ವಿದ್ಯಾರ್ಥಿಲೆನ್ ತಯಾರ್ ಮಲ್ಪುನ ಚಾಕಚಕ್ಯತೆ ಆರೆಡ ಇತ್ತಂಡ್, ಅಧ್ಯಾಪಿಕೆ ಆದಿತ್ತಿನ ಅ ಅಧ್ಯಯನೊದ ಮಟ್ಟಿಗ್ ನಿತ್ಯ ವಿದ್ಯಾರ್ಥಿಲಾ ಆದಿತ್ತೆರ್. ಆರೆನ ವ್ಯಕ್ತಿತ್ತೋಡು ಮಹತ್ವಾಕಾಂಕ್ಷೆ, ಮಲ್ಲ ಕನೊನ್ ಕಟ್ಟೋನುನ ಪ್ರವೃತ್ತಿ, ಉಲ್ಲಾಸ, ಉಮೇದ್, ಮೋಕೆ, ಸೆಡವು, ಚಲ, ಪೂರಾ ಇತ್ತಂಡ್, ಒವೇ ವಿಚಾರ ಅಥವಾ ವ್ಯಕ್ತಿಲೆನ್ ಆರ್ ಅತಿಯಾದ್ ಮನಸ್ಸಿಗ್ ದೆತ್ತೊಂದಿತ್ತೆರ್. ಜಾಯಮನೊಡ್ಡಾದ್ ಕೆಲವು ಸಮಸ್ಯೆಲುಲಾ ಆರೆಗಿತ್ತಂಡ್, ಅತಿಯಾಯಿನ ನಂಬೊಳುಗೆಗ್ ಸರಿಯಾಯಿನ ಇಂಬು ತಿಕ್ಕಂದೆ ಪೋನಗ ಕ್ರಮೇಣ ವಂತೆ ಹತಾಶೆ, ಸಂಶಯ ಪ್ರವೃತ್ತಿಲ್ಲಾ ಇಡೆಯಿಡೆಟ್ ಆರೆನ ಮನಸ್ಸಿಗೆ ಗಾಸಿ ಮಲ್ಲೊಂದಿತ್ತಂಡ್. ತುಳು ಸಾಹಿತ್ಯ ಅಕಾಡೆಮಿದ ಸುರುತ್ತ ಕಾರ್ಯ ಸಮಿತಿಡ್ ಲೀಲಾವತಿ ಇತ್ತೆರ್, ಆ ಕಾಲೊಡ್ ಎಂಕ್ ಆರೆನ ವಂತೆ ಮುಟ್ಟದ ಪರಿಚಯ ಆಯೆರೆ ಸಾಧ್ಯ ಆಂಡ್. ಆರೆನ ಉತ್ಸಾಹ, ಸಹಕಾರ ಪ್ರವೃತ್ತಿ ಪುಗರೊಡಾಯಿನವು. ಮುಂಬಯಿ, ಚೆನ್ನೈ, ತಿರುವನಂತಪುರ ಇಂಚಿತ್ತಿ ದೂರದ ಊರುಲೆಡ್ ತುಳು ಅಕಾಡೆಮಿದ ಕಾರ್ಯಕ್ರಮ ನಡತ್ತಿನ ಸಂದರ್ಭೋಡು, ಪ್ರವಾಸೊಡ್ತಾ, ಕಾರ್ಯಕ್ರಮೊಳೆಲ್ಲಾ ಭಾರೀ ಲವಲವಿಕೆ ಆದ್ ಪಾಲ್ ಪಡೆಯೊಂದಿತ್ತೆರ್, ಉನಸ್, ತಿನಸುಡ್ತಾ, ಪಾತೆರ ಕತೆಲ್ಲಾ ಆರ್ ಧಾರಾಳಿ, ಪದರಂಗಿತ, ಕುಸಾಲ್ಡ್ ಸಂತೋಸು ಪಟ್ಟುನಾರ್. ಲೀಲಾವತಿಯೆ ಇತ್ತಿನೆನ್ ಇತ್ತಿಲೆಕ್ಕೊ ಪನಾ, ಕೆಲವು ವಿಚಾರೊಳೆಡ್ ಆರೆಗ್ ಮುಲಾಜಿ ದಾಲಾ ಇಜ್ಜಿ. ಮನಸ್ಸಿಡ್ ಬೇತೆನೇ ದೀದ್ ಪಿದಾಯಿಡ್ ಸಾರಣೆ ಮಲ್ಲುನ ಕುಸೆಲ್ ಆರೆಗ್ ತೆರಿಯಂದ್. ಶ್ರೀಮತಿ ಕೆ. ಲೀಲಾವತಿ / 47
