ಕುಶಲಕರ್ಮಿಲೆನ ಕೈಚಳಕದ ಲೆಕ್ಕ ರೇಖಾಬದ್ಧವಾಯಿನ ಆಧುನಿಕತೆನ್ ಸೃಷ್ಟಿ ಮಲ್ಲ. ಹೆಬ್ಬಾರ್ ಉಂದೆನ್ ಅನುಕರಣೆ ಮಲ್ತ್ಜೆರ್, ಆಂಡ ಆರ್ ಒಂಜಿ ಸ್ವತಂತ್ರ ಮಾರ್ಗೊನು ಪತ್ತೆರೆ ಉಂದು ಪ್ರೇರಣೆ ಆಂಡ್ಂದ್ ಪನೊಲಿ. 1947ನೇ ಇಸವಿ, ಆಗಸ್ಟ್ 15ನೇ ದಿನತಾನಿ ಹೆಬ್ಬಾರ್ 'ಆನಂದ ಬಾಷ್ಪ' ಚಿತ್ರ ಬರೆಯೆರ್, (ಪತ್ ವರ್ಸದ ದಾಂಪತ್ಯೋಡು ಆ ವರ್ಸ ಸುರೂತ ಬಾಲೆ ಪುಟಿನ ಸಂತೋಸಲಾ ಆರೆಗ್ ಇತ್ತ್ಂಡ್, ಈ ಬಾಲೆನೇ ರೇಖಾ) ಚಿತ್ರದ ವಸ್ತ್ ಸ್ವಾತಂತ್ರ್ಯ! ಅವೆನ್ ತೂದು ಕುಸಿಯಾದ್ ಹರೀಂದ್ರನಾಥ ಚಟ್ಟೋಪಧ್ಯಾಯರ್ ತನ್ನ ಕಬಿತೆ 'ಬಂತು ಸ್ವಾತಂತ್ರ್ಯ'ದ ಪ್ರತಿನ್ ಹೆಬ್ಬಾರೆರೆಗ್ ಕೊರು ಗೌರವ ಸಂದಾಯೆರ್. ಹೆಬ್ಬಾರರ ಸೂಕ್ಷ್ಮ ಅವಲೋಕನ, ಆತ್ಮ ದಿನಚರಿಡ್ ಸ್ಪಷ್ಟವಾದ್ ತೋಜುಂಡು, ವ್ಯಕ್ತಿ ಸಂಪರ್ಕ ಪಂಡ ಜೀವನ ವಿಕಾಸ- ಇಂದ್ ಆರ್ ತೆರೀದಿತ್ತೆರ್, ಎಲ್ಯ ಅನುಭವಲಾ ಕಲಾವಿದನ ಮಹಾಕೃತಿಗ್ ಕಾರಣ ಆವರೆ ಸಾಧ್ಯ ಉಂಡು. ಉಂದು ಕೇವಲ ಕ್ಷಣತ ಅನುಭವ ಅತ್ತ್. ಕ್ರಮೇಣ ಅನುಭವೊಲು ಗಟ್ಟಿ ಆವೊಂದು ಕಲಾವಿದನ ವ್ಯಕ್ತಿತೊನು ಬೆಳಗುನ ಮಲ್ಲ ತೇಜೋಪ್ರಕಾಶ ಆಪಿನವೇ ಸಾಧನೆದ ಮುಟ್ಟುಲು. ಈ ಬೊಲ್ಲು ಒತ್ತು ಉಂಡಾಂಡ್ ಪನ್ನಿನೆಕ್ಸ್ ಪಿರ ತೂವೊಡಾಪುಂಡು. ಅನುಭವ ಪಂಡ ಕಿನ್ಯ ಒಂಜಿ ಬೊಲ್ಪು. ಇಂಚಿನ ಮಸ್ತ್ ಅನುಭವ ಸೇರಗ ಉಂಡಾಪಿನವೇ ಮಾಮಲ್ಲ ತೇಜಸ್. ಉಂದುವೇ ಹೆಬ್ಬಾರರ ಬದ್ಕ್. ಆರ ದಿನಚರಿಲಾ ಉಂದನೇ ಪನ್ನುಂಡು. 1969ನೇ ಇಸವಿಡ್ ಮೈಸೂರು ವಿಶ್ವವಿದ್ಯಾಲಯದ ಪ್ರಸಾರಾಂಗದ ಆಶ್ರಯೊಡು ಹೆಬ್ಬಾರ್ ರಡ್ ಉಪನ್ಯಾಸ ಕೊರ್ಯೆರ್. ಆ ವಿಚಾರೊಲೆನ್ ಸಂಗ್ರಹ ಮಲ್ತ್ದ್ ಇಂಚ ಪನೊಲಿ 0 'ಆದಿ ಮಾನವೆ ಬೋಂಟೆದ ಕೆಲಸ ಮಲ್ಲೊಂದು ಉಪ್ಪುನಗ ಆಯಗ್ ತನ್ನ ರಕ್ಷಣೆಲಾ ಮುಖ್ಯಂದ್ ತೋಜಿಂಡ್, ಮಣ್ಣಿದ ಪಾತ್ರೆ ತಯಾರಿ, ಇಲ್ಸ್ ಕಟ್ಟುನು, ತನ್ನ ಶರೀರೊನು ಪೊರ್ಲು ಮಲ್ಪುನು-ಇಂಚಿನ ಮಾತ ಆಸಕ್ತಿಲು ಸೌಂದರ್ಯ ಪ್ರಜ್ಞೆನ್ ಉಂಡು ಮಲ್ಲ. ಬಲಿಪುನ ಕುದುರೆ, ಲಾಗೊಂದು ನಲಿಪುನ ಜಿಂಕೆ-ಉಂದೆನ್ ಮಾತ ತೂನಗ ಆಯಗ್ ಸಂತೋಷ ಆದ್ ಇಲ್ಲದ ಗೋಡೆಡ್ ಆ ಚಿತ್ತೊಲೆನ್ ಬರೆಯೆ. ಅಯಿಟ್ ಆಕಾರೊಡ್ಡುಲಾ ಭಾವನೆನೇ ಪ್ರಧಾನ ಆಂಡ್. ಪ್ರಾಣಿಲೆಡ್ ಪ್ರತ್ಯೇಕವಾಯಿನ ಒಂಜಿ ಸಂಸ್ಕೃತಿನ್ ಉಂಡು ಮಲ್ಲಿನ ಮನುಷ್ಯ ತಾನೇ ಒಂಜಿ ಕಲಾವಿದೆ ಆಯೆ. ಇಲ್ ಕಟ್ಟುನ ರೀತಿ ವಾಸ್ತುಶಿಲ್ಪ ಆಂಡ್. ಸೃಷ್ಟಿಡ್ ನಡಪುನ ವಿಸ್ಮಯೋಲು, ಜನನ- ಮರಣದ ರಹಸ್ಯ ಉಂದು ಧಾರ್ಮಿಕ ಶ್ರದ್ಧೆನ್ ಬುಲೆಪಾಂಡ್. ಚಿತ್ತೊಲೆಗ್ ಧಾರ್ಮಿಕ ಅಸ್ತಿವಾರ ಮುಖ್ಯ ಆಂಡ್. ಅಪಗ ಕಲಾಶಿಕ್ಷಣ ಕೊರ್ಪಿನ ಸಾಲೆಲು ಇಜ್ಜಾಂಡ್, -- 36 --
