'ಕಲಾ ಶಿಕ್ಷಣ ಬೊಕ್ಕ ಕೃತ ಭವಿಷ್ಯ' ಈ ವಿಷಯೊದ ಮಿತ್ತ್ ಹೆಬ್ಬಾರ್, ಜೆ.ಜೆ. ಸ್ಕೂಲ್ ಆಫ್ ಆರ್ಟ್ ಸಂಸ್ಥೆದ ಶತಮಾನೋತ್ಸವ ಸಂದರ್ಭೋಡು ಒಂಜಿ ಪ್ರಬಂಧ ಮಂಡನೆ ಮಲ್ಲೆರ್, ಅಯಿತ ಕೆಲವು ಪ್ರಧಾನ ಅಂಶೋಲು ಇಂಚ ಉಂಡು- ಭಾರತೊಡು ಇಂಗ್ಲಿಷ್ ಆಳ್ವಿಕೆ ಸುರುವಾಪಿ ಮುಟ್ಟ ಚಿತ್ರ ರಚನಾ ಕಲೆನ್ ಕಲ್ಪಾವುನ ಉದ್ದೇಶದ ಶಿಕ್ಷಣ ಸಂಸ್ಥೆಲು ಇಜ್ಜಾಂಡ್, ಅಂಚಂದ್ ನಮಡ ಕಲಾವಿದರ ಕೊರತೆ ಇತ್ತೀಜಿ. ಆಂಡ ಅಕ್ಲ್ನ ದೃಷ್ಟಿ ಧರ್ಮ ಬೊಕ್ಕ ತತ್ವಶಾಸ್ತ್ರದ ಪ್ರಭಾವೊಗು ಒಳಗಾದ್ ಇತ್ತ್ಂಡ್, ಬ್ರಿಟಿಷೆರ್ ಬತ್ತಿ ಬೊಕ್ಕ ನಮ ಬದ್ಕ್ ಪೊಸ ಪೊಸ ಮೌಲ್ಯದ ಪ್ರವೇಶ ಆಂಡ್. ಕಲಾ ಶಾಲೆಲೆನ ಸ್ಥಾಪನೆ ಆಂಡ್, ಕ್ರಮಬದ್ಧವಾಯಿನ ಶಿಕ್ಷಣ ಕೊರಿಯೆರೆ ಇಂಗ್ಲಿಷ್ ಕಲಾವಿದರೇ ಈ ದೇಸೊಗು ಬತ್ತೆರ್. ಮುಖ್ಯ ಉದ್ದೇಶ ಪಂಡ 'ವಾಸ್ತವಿಕತೆ', ವಸ್ತುನಿಷ್ಠತೆ. ಇಂಚಿನ ಕಲಾಶಿಕ್ಷಣದ ಮಿತ್ತ್ ದೇಶದ ವಿದ್ಯಾವಂತೆ ಆಸಕ್ತಿ ತೋಜಾಯ್, ಆಂಡ ಕೆಲವು ಕಾಲ ಪಾಶ್ಚಾತ್ಯ ಭೌತಿಕವಾದೊಗು ಮರ್ಲಾಯಿನ ನಮ್ಮ ವಿಚಾರವಂತರ್, ತಮ್ಮವೇ ಆಯಿನ ಧರ್ಮ-ತತ್ತೊಲೆದ ಮಿತ್ತ್ ಇತ್ತಿನ ನಿಷ್ಠೆನ್ ಕಳೆವೊಂಡೆರ್. ಮಸ್ತ್ ಕಾಲ ಇಂಚೆನೇ ಪೋಂಡು, ಪರಂಪರೆನೇ ಬೋಡುಂದು ಎಣ್ಣಿನಕುಲು ಅಯಿತ ಅನುಕರಣೆ ಮಲ್ಲೆರ್. ನೆಡ್ಡಾತ್ರ ನಮ್ಡ್ ಭಾವನಾತ್ಮಕ ಅಂಧಶ್ರದ್ದೆ ಉಂಡಾಂಡ್; ಪರಂಪರೆ, ನಿಜವಾಯಿನ ಅರ್ಥೊಡು ಬುಲೆಯಿಜಿ. ಇತ್ತೆ ನಮ್ಮ ಜೀವನಕ್ರಮ ಬದಲಿ ಆತ್ಂಡ್. ಅಂಚಾಯಿನೆಡ್ ನಮ್ಮನೇ ಪೊಸ ಪರಂಪರೆದ ಸೃಷ್ಟಿಲಾ ಆವೊಡಾಪುಂಡು. ಅಂಚೆನೇ ಕಲಾವಿದ ವಾಸ್ತವಿಕತೆತ ಜ್ಞಾನದ ಒಟ್ಟುಗು ಅಯಿತ ಪಿರವುದ ನಿಜವಾಯಿನ ತಿರ್ಲ್ ಎಂಚಿನವು ಪನ್ನಿನ ಶೋಧಲಾ ಮುಖ್ಯ ಉಂಡು, ಕಲಾ ವಿದ್ಯಾರ್ಥಿನ ಪರಿಶೀಲನಾಶಕ್ತಿ, ಚಿಂತನ ಶಕ್ತಿ ವೃದ್ಧಿ ಆವೊಡು. ನಮಡ್ ದೂರದೃಷ್ಟಿದ ಜನೊಕುಲೆಗ್ ದಾಲ ಕೊರತೆ ಇಜ್ಜಿ. ನಮ್ಮ ಜವನೆರೆಡ ಪ್ರತಿಭೆದ ಕೊರತೆಲಾ ಇಜ್ಜಿ. ಆಂಡ ಸನ್ನಿವೇಶದ ಒತ್ತಡ ಬೊಕ್ಕ ಉದ್ಯೋಗ ಸಂಪಾದನೆದ ಒಂಜಿ ಮಾರ್ಗ ಪಂಡ್ದ್ ಎಣ್ಣೆ ಅಕುಲು ಕಲಾತಂತ್ರೋನು ಕರೆ ಬರೆರ್, ಇಂಚ ಆವಂದಿಲೆಕ್ಕ ಜಗತ್ತದ ಕಲಾತಂತ್ರದ ಪರಿಚಯ ಅಕ್ಲೆಗ್ ಮಲ್ತ್ ಕೊರೊಡು. ನಮ್ಮ ಪರೀಕ್ಷಾ ವಿಧಾನೊಡು ಇತ್ತಿನ ಕುಂದು ಕೊರತೆಲೆನ್ ಆಯಿನಾತ್ ದೂರ ಮಲ್ಪುನಂಚಿನ ತಜ್ಞ ಶಿಕ್ಷಕೆ ಬೋಡು. ಅಕ್ಲೆಗ್ ಜ್ಞಾನ ವಿಸ್ತಾರ ಮಲ್ಲೊನೆರೆ ಆಯಿನಾತ್ ಸಮಯ ಕೊರೊಡು. ಎಡ್ಡೆ ಸಂಬಳ ಕೊರೊಡು. ಇಂಚ ಆವೊಂದು ಪೋಂಡ ನಮ್ಮ ವಿದ್ಯಾರ್ಥಿಲೆಡ ಶ್ರದ್ಧೆ ಬೊಕ್ಕ ಪ್ರಾಮಾಣಿಕತೆ ಬುಲೆವುಂಡು. ಈ -- 33 --
