ನಂದಲಾಲ್ ಬೋಸೆ ಶತಮಾನೋತ್ಸವ, ಲಕ್ಕೋಡು ರಾಷ್ಟ್ರೀಯ ಕಲಾಕೇಂದ್ರದ ಉದ್ಘಾಟನೆ, ಬೊಂಬಾಯಿಡ್ 'ಮೋಡರ್ನ್ ಆರ್ಟ್ ಗ್ಯಾಲರಿ'ಗ್ ಜಾಗೆ ನಿರ್ಣಯ- ಇಂಚ ಮಸ್ತ್ ಕೆಲಸೊನು ಆರ್ ಮತ್ತೊಂದೇ ಇತ್ತೆರ್. ಆರ್ ಮದಪ್ಪಂದಿನ ಒಂಜಿ ಪ್ರಧಾನ ಘಟನೆ ಪಂಡ, ಆರ್ ಲಲಿತಕಲಾ ಅಕಾಡೆಮಿದ ಅಧ್ಯಕ್ಷೆ ಆದುಪ್ಪುನಗ ನಡತ್ತಿನ ಸಂಗತಿ, ಆರೆಗ್ 'ಸೋವಿಯೆಟ್ ಲ್ಯಾಂಡ್ ಪ್ರಶಸ್ತಿ ಘೋಷಣೆ ಆಂಡ್. ಒಂಜಿ ಗೌರವದ ಸರಕಾರಿ ಹುದ್ದೆಡ್ ಉಪ್ಪುನಗ ಆ ಹುದ್ದೆದ ಪುದರ್ಡ್ ಪ್ರಶಸ್ತಿ ಸ್ವೀಕಾರ ಮಬ್ಬುನ ಸರಿ ಅತ್ ಪಂಡ್ದ್, ಅವೆನ್ ಬಹಿರಂಗವಾದ್ ನಿರಾಕರಣೆ ಮಲೆರ್. ಪದನಿಮಿತ್ತವಾದ್ ಬರ್ಪಿನ ಪ್ರಶಸ್ತಿ ತನಕ್ ಬೊಡ್ಡಿಂದ್ ಖಡಾಖಂಡಿತ ಪಂಡೆರ್. ವಾ ಒತ್ತಾಯೊಗುಲಾ ಬಡ್ಸ್ ಜೆ, ಮಗ್ ವರ್ಸ ವೈಯಕ್ತಿಕ ಪ್ರಶಸ್ತಿಯಾದ್ ಬತ್ತಿನ ಈ ಗೌರವೊನು ಹೆಬ್ಬಾರ್ ಸ್ವೀಕಾರ ಮಲೆರ್. ಒಳ್ಳೇ ಸ್ಥಾನ-ಮಾನ, ವೈಯಕ್ತಿಕ ಪ್ರಯತ್ನಡು ತಿಕ್ಕೋಡು ಪನ್ನಿನವು ಆರ ಅಭಿಪ್ರಾಯ. ಮೈಸೂರು ವಿಶ್ವವಿದ್ಯಾನಿಲಯ ಡಾಕ್ಟರೇಟ್ ಪದವಿ ಪ್ರದಾನ ಮಲ್ಲಿಬೊಕ್ಕ ಹೆಬ್ಬಾರ್ ಲಲಿತಕಲಾ ಅಕಾಡೆಮಿದ ಅಧ್ಯಕ್ಷೆರಾಪಿನ ಸಂದರ್ಭ ಬತ್ತ್ಂಡ್. ಆಮಂತ್ರಣ ಪತ್ರಿಕೆಡ್ ಆ ಪುದರ್ದ ಪಿರಾವುಡು 'ಡಾ.' ಸೇರಿಸಾಯಿನ ಆರೆಗ್ ಇಷ್ಟ ಆಯಿಜಿ. ಹೆಬ್ಬಾ ಬೇತೆನೇ ಆಮಂತ್ರಣ ಪತ್ರಿಕೆ ಮುದ್ರಣ ಆಪಿಲೆಕ್ಕ ತೂವೊಂಡೆರ್. ಅಯಿಟ್ 'ಡಾಕ್ಟರೇಟ್' ಇತ್ತ್ಜಿ. ಬಿರುದುಲೆನ್ ಸ್ವಾರ್ಥಗಾದ್, ಕೀರ್ತಿಗಾದ್ ಉಪಯೋಗ ಮಲ್ಪೆರೆ ಬಲ್ಲಿಂದ್ ಆರ ದೃಢ ನಿರ್ಧಾರ. ಇಂಚಿನ ಮನಸ್ಸೇ ಬಾರಿ ಅಪರೂಪ. 1954ನೇ ಇಸವಿಡ್ ಲಲಿತಕಲಾ ಅಕಾಡೆಮಿ ಸ್ಥಾಪನೆ ಆದ್ತ್ಂಡ್, ಅಯಿಟ್ ಸದಸ್ಯೆರಾದಿತ್ತಿನ ಒಂರ್ಬ ಖ್ಯಾತನಾಮ ಕಲಾವಿದೆರೆಡ್ ಹೆಬ್ಬಾರೆರೆಗ್ಲಾ ಸ್ಥಾನ ಇತ್ತ್ಂಡ್. ಈ ಅಕಾಡೆಮಿದ ಪ್ರಗತಿಗಾದ್ ಪದಿನಡ್ಕ ವರ್ಸ ಹೆಬ್ಬಾರ್ ದುಡಿಯೆರ್. ಈ ಅವಧಿಡ್ ರಾಷ್ಟ್ರ, ಅಂತರ್ರಾಷ್ಟ್ರ ಪ್ರದರ್ಶನ, ಕಲಾವಿದ್ಯಾರ್ಥಿಲೆಗ್ ಶಿಷ್ಯ ವೇತನ, ವಾರ್ಷಿಕ ಪ್ರಶಸ್ತಿ, ಗ್ರಂಥ ಪ್ರಕಟಣೆ, ಪ್ರಾದೇಶಿಕ ಕೇಂದ್ರ ಸ್ಥಾಪನೆ-ಇಂಚ ಮಸ್ತ್ ಕಲೋಪಯೋಗಿ ಕೆಲಸ ನಡತ್ಂಡ್, ಆಂಡ ಅಕಾಡೆಮಿದ ಉಲಯಿಡ್ ಸ್ವಾರ್ಥ ಸಾಧನೆ, ಸದಸ್ಯತನದ ಪುದರ್ಡ್ ಆತ್ಮವಂಚನೆ-ಉಂಡಾನಗ ಆ ಸದಸ್ಯತನೊಗು ರಾಜೀನಾಮೆ ಕೊರಿಯೆರ್. (1972) ಅಕಾಡೆಮಿದ ವರಿಷ್ಠ ಮಂಡಳಿ, ಆರ್ ರಾಜೀನಾಮೆ ಪಿರ ಗೆತೊನೊಡುಂದು ಮಸ್ತ್ ಒತ್ತಾಯ ಮಲ್ತ್ಂಡ್, 'ಕಲಂಕ್ ನೀರ್ಡ್ ನೀಂದುನ ಸಮ ಅತ್' ಪಂಡ್ದ್ ಆರ್ ನಿರ್ಧಾರ ಬದಲಿ ಮಲ್ಸ್ಜೆರ್, ಅಯಿಡ್ ಬೊಕ್ಕ 1979ನೇ ಇಸವಿಡ್, ಅಕಾಡೆಮಿ ಪ್ರವೇಶ ಮಲ್ಲಿನ ಹೆಬ್ಬಾರ್, 1980ನೇ ಇಸವಿಡ್ ಅಕಾಡೆಮಿದ ಅಧ್ಯಕ್ಷೆರಾಯೆರ್. ಈ ಅವಧಿಡ್ನಾ ಹೆಬ್ಬಾರ್, ನ್ಯಾಯ ನಿಷ್ಟುರತೆನ್ ಬುಡ್ಡು ಕೊರ್ತುಜೆರ್, 1981ನೇ -- 20 -- !
