1945ನೇ ಇಸವಿಡ್ ಜಹಾಂಗೀರ್ ಆರ್ಟ್ ಗ್ಯಾಲರಿಡ್ ಇಂಚಿನ ಒಂಜಿ ಪ್ರದರ್ಶನ ನಡತ್ತಿ ಬೊಕ್ಕನೇ ಆರ್ ವಿದೇಶೂಲೆಗ್ ಪೋಯಿನಿ ಪನ್ನಿನವು ಮಹತ್ವದ ಸಂಗತಿ. ಏಕವ್ಯಕ್ತಿ ಕಲಾಪ್ರದರ್ಶನ-ಆತ್ ಸುಲಭದ ವಿಷಯ ಅತ್ತ್. ಆರ್ಟ್ ಗ್ಯಾಲರಿಡ್ ಅವಕಾಶ ತಿಕ್ಕೊಡ್ಡ ವರ್ಷಾನುಗಟ್ಟಲೆ ಕಾಪೊಡು. ಅಂಚೆನೇ ಪ್ರಭಾವಶಾಲೀ ವ್ಯಕ್ತಿನ ಪರಿಚಯ ಬೋಡು. ಅವಕಾಶ ತಿಕಿಬೊಕ್ಕ ಆತೇ ಪ್ರಚಾರ ಬೋಡು, ಕೃತಿಕುಲು ಮಾರ್ದ್ ಪೋಯಿಜಿಡ ನಷ್ಟೊನು ಒತ್ತೊನೊಡು, ಸರಿಯಾಯಿನ ವಿಮರ್ಶೆ ಪತ್ರಿಕೆಡ್ ಬಜಿಡ ಮಾರಾಟ ಖೋತಾ ಆಪುಂಡು, ಅರ್ಧಂಬರ್ಧ ವಿಮರ್ಶೆ, ಅರ್ಧ ಬೆನ್ನಿನ ನುಪ್ಪುದ ಲೆಕ್ಕ. ಈತ್ ಮಾತ ಅಡೆ-ತಡೆತ ನಡುಟು ಕಲಾವಿದೆ ಸಾಮಾಜಿಕವಾಯಿನ ಸಂಬಂಧೂನು ಕಟ್ಟೋಡು, ಸುರೂತ ಪ್ರದರ್ಶನದ ಅನುಭವ, ಆತೊಂಜಿ ಹಿತವಾದ್ ಇತ್ತೀಜಿಡಲಾ ಹೆಬ್ಬಾರ್, ಆತ್ಮನಿರೀಕ್ಷೆ ಮಲ್ಲೊಂದು, ಸ್ವವಿಮರ್ಶೆನೇ ಪತ್ತೊಂದು ದುಂಬು ನಡತ್ತೆರ್. ಒಮ್ಮೆ ಪಕ್ಷ-ಪಂಥಗು ಬಾಯಿ ಆದ್, ಕಲೆ ಬದ್ರೆ ಸಾಧ್ಯ ಇಜ್ಜಿಂದ್ ಆರ ದೃಢ ನಂಬಿಕೆ. ಅಂಚಾದ್ ಆರ್ ಆರನೇ ಸಾದಿ ಪತ್ತೆರ್. ಬುಲೆಯೆರ್. ಪರಿಪೂರ್ಣ ನಿಸರ್ಗ, ಆತ್ಮ ಪ್ರೀತಿದ ವಿಷಯ. ಸಮಾಜದ ಪಾರ್ಶ್ವ ಚಿತ್ರಣ, ಆರ್ ಮೆಚ್ಚಂದಿನ ಸಂಗತಿ. 1961ನೇ ಇಸವಿಡ್ ಬ್ರೇಜಿಲ್ ದೇಶದ 'ಸಾವೊಪಾವೊ' ನಗರೊಡು ಅಂತಾರಾಷ್ಟ್ರೀಯ ಚಿತ್ರೋತ್ಸವ ನಡತ್ತಿನ ಸಂದರ್ಭೋಡು ಹೆಬ್ಬಾರರ 'ಮಾಹಿಮ್ ದರ್ಗಾ', 'ಪಂಜರದ ಹಕ್ಕಿಗಳು', 'ಪ್ರಬಂಧ', 'ಜಾಡಮಾಲಿ', 'ಪಥಿಕರು' ಚಿತ್ಲು ಬಾರೀ ಮೆಚ್ಚಿಗೆ ಪಡೆವೊಂಡ. 1964ನೇ ಇಸವಿಡ್ ಬೊಂಬಾಯಿದ ತಾಜ್ಗ್ಯಾಲರಿಡ್ ಹೆಬ್ಬಾರರ ಚಿತ್ರಕಲಾ ಪ್ರದರ್ಶನ ನಡತ್ತ್ಂಡ್. ಆ ಸಂದರ್ಭೋಡು ಆರೆಗೊಂಜಿ ಎಡ್ಡೆ ಸುದ್ದಿ ಲಾ ತಿಕ್ಂಡ್. ನ್ಯೂಯೋರ್ಕ್ ಜಾಗತಿಕ ವ್ಯಾಪಾರ ಮಳಿಗೆಡ್ ಭಾರತೀಯ ವಿಭಾಗದ ಭಿತ್ತಿಚಿತ್ತೊಗು ಹೆಬ್ಬಾರರ 'ನವಿಲ್' ಚಿತ್ರ ಆಯ್ಕೆ ಆತ್ಂಡ್ ಪನ್ನಿನ ವಿಷಯ ಆರೆಗ್ ಬಾರೀ ಸಂತೋಸ ಕೊಂರ್ಡು, ನ್ಯೂಯೋರ್ಕ್ಗ್ ಪೋದ್ ಪತ್ತ್ ದಿನೊಟು ಆ ಬೃಹತ್ ಚಿತ್ರನು ಆ ಬುಡಾದ್ ಕೊರಿಯೆರ್, ಆ ಪೊರ್ತುಡು ಮಸ್ತ್ ಕಲಾವಿದೆರ ಪರಿಚಯಲಾ ಆರೆಗ್ ಆಂಡ್. ಭಾರತದ 'ಪಿಕಾಕ್ ಪ್ರಕಟಣಾಲಯ' ಉಂದು ಹೆಬ್ಬಾರರ ರೇಖಾಚಿತ್ತೊಲೆನ್ ಸಂಗ್ರಹ ಮಲ್ತ್ದ್ 'ಹಾಡುವ ರೇಖೆ' ಪನ್ನಿನ ಪುದರ್ಡ್ ಪ್ರಕಟಣೆ ಮಲ್ತ್ದ್ ಆರೆಗ್ ಒಪ್ಪಿಸಾಂಡ್. ಸ್ಪಿಟ್ಟರ್ಲ್ಯಾಂಡ್ ನಡತ್ತಿನ ಕಲಾಪ್ರದರ್ಶನೊಡು ಸುಮಾರ್ ಪತ್ತ್ ಸಾವಿರ ಫ್ರಾಂಕ್ ದುಡ್ಡು ಗಳಿಕೆ ಆಂಡ್. ಈ ಆನಂದದ ಅನುಭವೊನು ಆರ್ ಮದತ್ಜೆರ್, ದಾಯೆಪಂಡ ಕಲಾವಿದನ ಗಳಿಕೆಗ್ ಅರ್ಥ ಬರ್ಪಿನಿ ಕಲಾರಸಿಕರ ಮೆಚ್ಚಿಕೆಡ್-ಇಂಚಿನ ಸಂದರ್ಭ ತಿಕ್ಕುನೇ ಬಾರಿ ಅಪರೂಪಂದ್ ಆರ್ ತೃಪ್ತಿ ಪಡೆಯೆರ್. --14--
