ಅತ ಕಾರ ತಿರ್ತ್ ಸುಖನಿದ್ರೆ ಮಲ್ಪುನ ಕೋರಿದ ಕಿನ್ನಿಲು, ಬಾನದ ಮುಗಲ್ಗ್ ಮುತ್ತ ಕೊರ್ಪಿಲೆಕ್ಕ ಸೂರ್ಯನ ಕಿರಣ, ಕೋರಿದ ಕೆಲೆಪು ಉಂಡುಮಲ್ಪುನ ಧ್ವನಿ ತರಂಗೊಲು-ಉಂದು ಮಾತ ವರ್ಣವೈಭವದ ಮೂಲಕ, ಸೂಚನೆ ಕೊರಿನ ಎಚ್ಚರಿಗೆದ ಸಂದೇಶೂಲು, ಉಂದು ಹೆಬ್ಬಾರೆ ಸುಮಧುರ ಭವಿಷ್ಯದ ಮುಂಗೋಳಿ-ಪಂಡ್ದ್ ಪುಗಾರ್ತೆ ಪಡೆತ್ಂಡ್. ಬದ್ಕ್ ಕಷ್ಟ-ಕಾರ್ಪಣ್ಯ ಮಾಜೊಂದು ಭವಿಷ್ಯದ ಆಶಾಕಿರಣ ಉಳೆವೊಂದು ಉಡಲ್ ಸಂಪು ಆವೊಂದು ಬರ್ಪಿನ ಪೊರ್ತುಡು ಆರ್ ಬರೆಯಿನ ಈ ಚಿತ್ರ ಆರವೇ ಬದ್ ಭಾಷ್ಯ! ದೇಶ, ಒಂಜಿ ನಿಮಿತ್ತ ಮಾತ್ರ. ಚಿತ್ರಕಲೆ ಒಂಜಿ ಸ್ವತಂತ್ರ ಶೈಲಿನ್ ಎಂಚ ಉಂಡುಮಲ್ಪುಂಡು ಪನ್ನಿನೆಕ್ ಹೆಬ್ಬಾರರ ಚಿತ್ತೊಲೆನ್ ತೂವೊಡು. 1953ನೇ ಇಸವಿಡ್ ಪ್ರಥಮ ಭಾರತೀಯ ಕಲಾ ನಿಯೋಗದ ಸದಸ್ಯೆ ಆದ್ ಹೆಬ್ಬಾರ್, ರಷ್ಯಾ, ಪೋಲೆಂಡ್, ಪ. ಜರ್ಮನಿ, ಲಂಡನ್, ಪ್ಯಾರಿಸ್-ಇಂಚ ಮಸ್ತ್ ಕೋಡಿಲೆಗ್ ಪ್ರವಾಸ ಮಲ್ಲೆರ್, ಈ ಅನುಭವದ ಶ್ರೀಮಂತಿಕೆನ್ ತನ್ನ ಪ್ರವಾಸದ ದಿನಚರಿಡ್ ಪಂಡೊಂದೆರ್. ರಡ್ಕೊಡು ಆರ್ ತೂಯಿನ ಕೇಂದ್ರ ಗ್ರಂಥಾಲಯೊಡು ಮಹಾಭಾರತ, ರಾಮಾಯಣದ ರಷ್ಯನ್ ಭಾಷಾನುವಾದದ ಕೃತಿಕುಲು ಉಂಡುಂದು ಬರೆತೆ. 'ಲೇಖಕರ ದಿನಾಚರಣೆ ಪಂಡ್ದ್ ಪ್ರತಿವರ್ಷ ಗ್ರಂಥಾಲಯ ಆಚರಣೆ ಮಡೇ ಪನ್ನಿನ ನಿಯಮ, ಸುಮಾರ್-60 ಭಾಷೆಲೆದ ಗ್ರಂಥ ಸಂಗ್ರಹ, ಉಂದು ಮಾತ ನಮ್ಮ ಅನುಕರಣೆ ಮಲ್ಪುನಂಚಿನ ಎಡ್ಡೆ ಸಂಗತಿಲು, ರಷ್ಯಾದ ಮಾಮಲ್ಲ ಕಲಾವಿದೆ 'ಎಹರೆನ್ ಬರ್ಗ್' ಇಂಚ ಪಂಡೆರ್ಗೆ-'ಸಾಹಿತ್ಯ ಬೊಕ್ಕ ಸಂಗೀತ-ನೆಡ್ ಆಸ್ವಾದನೆ ಮಲ್ಪೆರೆ ಒಂತೆ ಕಷ್ಟ ಉಂಡು, ಚಿತ್ರಕಲೆಟ್ 'ನವ್ಯ'ದ ಗ್ರಹಣ ಮಲ್ಪೆರೆ ಒಂತೆ ಪೊರ್ತು ತಾಗುಂಡು, ಉಂದು ಮಾತ ತತ್ಕಾಲೀನ ಅಭಿರುಚಿಕ್ ಸೇರಿನ ವಿಷಯ. ಅಡ್ಡ ಸಾದಿ ಪತ್ರ ಬೇಕಾಬಿಟ್ಟಿ ವಿಮರ್ಶೆ ಮಲ್ಪುನಕ್ಲೆಗ್ಲಾ ಆಯೆ ಒಂಜಿ ಪಾತೆರ ಪಂಡೆಗೆ-'ಅರ್ಥ ಮಲ್ಲೊಂದು ಪಾತೆರುನಕುಲು ರಸಜ್ಞೆ, ಅರ್ಥ ಆಂಡ್ಂದ್ ಹೆಗ್ಗಳಿಕೆ ತೋಜಾವುನಕುಲು ಕೇವಲ ಭ್ರಮಾತೀತೆ'. ಉಂದು ಮಾತ ಕಲಾ ಕ್ಷೇತ್ರೋಗುಲಾ ಸಂದುನ ಹೇಳಿಕೆ. 1949ನೇ ಇಸವಿಡ್ ಹೆಬ್ಬಾರ್ ದಿನಚರಿ ಬರೆಪಿನ ಅಭ್ಯಾಸ ದೀವೊಂದಿತ್ತೆರ್. ಅಯಿಡ್ ಮಸ್ತ್ ಇಂಚಿನ ಸಂಗತಿಲೆನ್ ತೆರಿವೊನೆರೆ ಸಾಧ್ಯ ಆಪುಂಡು. ಒರಿ ಕಲಾವಿದೆ ಎಂಚ ಬುಲೆವೊಂದು ಪೋಪೆ, ಆಯನ ಸಾಧನೆಡ್ ಪ್ರಗತಿದ ಲಕ್ಷಣ ತೋಜಿದ್ ಬರ್ಪುಂಡಾ-ಪನ್ನಿನೆಕ್ ಉತ್ತರ ತಿಕ್ಕುನು ಕಲಾ ಪ್ರದರ್ಶನೊಲೆಡ್ ಮಾತ್ರ. ಅಯಿಟ್ಾ ಏಕವ್ಯಕ್ತಿ ಕಲಾ ಪ್ರದರ್ಶನೊಡು ಸಂಪೂರ್ಣ ವ್ಯಕ್ತಿತ್ವ ಬೆಳವಣಿಗೆದ ಪರಿಚಯ ಆಪುಂಡು. ಕೃಷ್ಣ ಹೆಬ್ಬಾರ್ ಇಂಚಿನ ಏಕಾಂಗ ಪ್ರದರ್ಶನೊಲೆನ್ ಕೊರ್ತೆರ್. --13--
