ಕೆಸರ ಕಮಲ | ತುಳು ರಂಗಭೂಮಿದ ಜಳಕ | ಸಾರ ಜನ ಸೈನಿಕ ಊರೊಂಜಿ ಕಾಪುವೆರ್! ಆಂಡಾ..... ಓರಿ ನಾಟಕಕಾರ ಸಾರ ಜನಕುಲೆನ್ ಒರೊಗು ತನ್ನ ಪಾತೆರದ ಬಿರಾದಿಗೆಡ್ ಮಾನಾವೆ. ತುಳು ರಂಗಭೂಮಿದ ಬೀಷ್ಮೆ ಪಂಡೊಂದು ನಾಟಕ ರಂಗೊಗು ಪೊರಕೆಂಟ್ ಬಂಗಾರ ಪೊದಿಕೆನ್ ಕೊರಿನ ದಿ| ಕೆತ್ತೂರು ದೊಡ್ಡಣ್ಣ ಶೆಟ್ಟು ಇನಿಕ್ಲಾ ಅಭಿಮಾನಿಲೆನ ಪಾಲ್ ತೆಲಿಕೆದ ಬ್ರಹ್ಮ, ದಿ! ಸಂಜೀವ ಭಂಡಾರಿಲು ಪನ್ನಿನಂಚ ತುಳು ತೆಲಿಕೆದ, ಪೊರು ಪೊಳಿಕೆದ ತಂಬರನು ಬೊಟ್ಟುದು ನಾಲ್ ಸುತ್ತುಗು ಈ ಸಬ್ಬ ಅಡರುನಂಚ ಮಲ್ಪುನೆಟ್ಟೆ ಜೀವೊನು ಗಂಧದ ಕೊದಡ್ದಂಚ ಅರೆತಿನ ತುಳುವಪ್ಪನ ಕೊಂಡಾಟದ ಮಗ ಅಂದ್.... ಈ ಪಾತೆರೊಗು ಸಂದಾಯ ಪನೆರೆಗ್ ಇಜ್ಜಿ, ಪಣಿಯಾಡಿದಾರ್, ಕಿಲ್ಲೆರ್, ಶೀನಪ್ಪ ಹೆಗ್ಡೆರ್ ತುಳುನಾಡ್ ಪೊರು ಪೊಳಿಕೆದ ಅಂದಾಯ ಸಂದಾಯೊಗು ಪುಣೆತಿನಂಚ ಕಮ್ಮೂರು ದೊಡ್ಡಣ್ಣ ಶೆಟ್ರು ಅಕ್ಸೆಡ್ ಬೇತೆನೇ ತಾದಿಗೊಂಜಿ ತೆಲಾಯರ್, ಅರೆಗ್ ತುಳು ಬಾಸೆದ ಪೊರು ಪೊಳಿಕದ ಜೀವ ಕೊಬ್ಬಿನ ಮನಸ್ಸಾಂಡ್, ಬಾಸೆ, ಸಂಸ್ಕೃತಿ, ಆಚಾರ, ವಿಚಾರ ಆತ ಒಟ್ಟುಡು ನರಮಾನ್ಯನ ಕುಂದು ಕೊರೆ ತೋಜಾದ್ ಕೊಗ್ ನಾಟಕ ಮಾಧ್ಯಮದಾತ್ ಎಡ್ಡೆ ಬೇತೆ ಇಜ್ಜಿ ಪಂಡ್ದ್ ಎನ್ನಿಯರ್, ಆಕಾದೇ ಇದಮುಟ್ಟ ಮಾತಾ ಬಾಸೆಲೆಡ್ ನಾಟಕ ಜನಕುಲೆಗ್ ಖುಸಿ ಕೊರೊಂದು ಇತ್ತಿನ ತೂದು ತಾನ್ಲಾ ಅಷ್ಟೇ ತಾದಿ ದಾಯ ಪತ್ತೆರೆಗ್ ಬಲ್ಲಿ ? ತುಳುನಾಡ್ ಜನಮಾನಿನ ಕಣ್ಣಿಗ್ ಅಡರಿನ ಕೆಲವೊಂಜಿ ಮೂಢನಂಬೊಲಿಕೆದ ಬೇರ್ನ್ ದಾಯೆ ಪರ್ದ್ ದಕ್ಕೆರೆಗ್ ಬಲ್ಲಿ ? ನಮ್ಮ ಅಲಿಯೊಂದು ಬಸ್ಸಿನ ಪರ ಪಂಚೆಮಿದ ಪೊರು ಪೊಳಿಕೆನ್ ದಾಯೆ ರಂಗೊಡು ಕನವೆರೆಗ್ ಬಲ್ಲಿ ? ತುಳುವೆರ್ ದಾಯೆ ಒಂತೆ ಪೊತ್ತು ಮಾತಾ ದುಕ್ಕ ದುಮ್ಮಾನ ಮದತ್ತ ತೆಲಿಪೆರೆಗ್ ಬಲ್ಲಿ ? ನಮ್ಮ ಜವ್ವನೆರೆಡ ದೆಂಗ್ ಮದೆಯಾದಿತ್ತಿನ ಕಲೆನ್ ದಾಯೆ ಬೊಲ್ಪುಗು ಕನವರೆಗ್ ಬಲ್ಲಿ ? ಇಂಚ ತನ್ನ ಉಡಲ್ ಲ ದಿನ ಪ್ರಶ್ನೆದ ಮಲಕೊಗು ಉತ್ತರ ಕೊಬ್ಬಿನ ಬೇಲೆಗ್ ಪಜ್ಜೆ ದೀಯ, ಕೆಮ್ಮೂರುದಾರ್ ತುಳು ರಂಗಭೂಮಿದ ಚಳುವಳಿಗೇ ಸುರುತ್ತ ಅಡಿಕಲ್ ಆಯೆರ್. 3 1
