ಅಂಚಾಂದ್.... ಇದಮುಟ್ಟ ಶಾಲೆ ಕಾಲೇಜಿದ ವದ ಪರೊಗು ಗೊಬ್ಬೊಂದು ಇತ್ತಿನ ಕನ್ನಡ ನಾಟಕದ ಜಾಗ್ನ್ ತುಳು ನಾಟಕ ಪಡೆತೊನ್ನ ಎಂಚ ಪಂಡ್ದ್ ಆಲೋಚನೆ ಮ! ತನ್ನ ಅಂದಾಜಿಗ್ ಸಂದಾಯ ಪಂಡ್ದ್ ಬಸ್ಸಿನಂಚ ದೊಡ್ಡಣ್ಣೆರ್ ಅಂಚನೇ ಮಿರ್ ! ಪಂಡ ತಾನ್ ಕಲ್ಪಾವುನ ಜೋಕ್ಲಗ್ ತಾನೇ ತುಳು ನಾಟಕ ಬರೆದ್ ಅಕ್ಸೆಗ್ ತರಬೇತಿ ಕೊಯ್ದು, ಅಲ್ಲಿನ ಮೋನೆಗ್ ಬಣ್ಣ ಪಾಥ್ ಅಕ್ಸೆನ್ ಬೊಲ್ಪುದ ಚಾವಡಿಡ್ ಜೀವ ಕೊರಿಯೆರ್. ಇಂಚ.... ತುಳು ನಾಟಕ ಓಲ್ಲು ಬರೋಡು ಇತ್ತ್ಂಡ ಅಲ್ ಬುಲೆದ್ ಬತ್ತ್ಂಡ್. ಇನಿಕ್ಲಾ ದೊಡ್ಡಣ್ಣೆರ್ ಆನಿ ಪಾಡ್ಡಿನ ಬಿತ್ ಮಲ್ಲಾ ಮರ ಆದ್ ಬುಲೆದ್ಂಡ್, ಅಂಚಾಂದೇ ಶಾಲೆ ಕಾಲೇಜಿದ ವದ ಪರೊಗು ತುಳು ನಾಟಕ ಒಂಜಿ ಬೋಡೇ ಬೋಡು! ನಿಜವಾದ ಇತ್ತೆ ದೊಡ್ಡಣ್ಣೆರ್ ಇತ್ತಿನಾಂಡ ಉಂದೇನ್ ತೂದು ಏತೊಂಜಿ ಸಂತೋಸುಡು ತೆಲ್ಲುವೆರ್ ಇಡ್ಕೊಂಡ ದಾನ್ನ ? ದೊಡ್ಡಣ್ಣೆ ಊದಿದಿನ ಶಂಕೊಡ್ಡು ಬತ್ತಿನ ಧ್ವನಿ ಕೇನ್ಸ್ ಸುರುಕು ದಾದನ ಉಂದೊಂಜಿ ಸೆಟ್ರನ ಕಿನ್ನಿ ಕುಸೆಲ್ ಪಂಡ್ದ್ ಎನ್ನಿಯೆರ್. ಅಂಚಾಂದೇ ಆರ್ ಓಲ್ಲಾ ನಾಟಕ ಮಲ್ಲುವೆ ಪಂಡ್ದಾ ಅತ್ ಮಲ್ಪುಗ ಪನ್ನಗ ಒರಿ ಒರಿಯೇನೇ ಪಿರ ನರಿಯೆರ್, ಆಂಡಾ.... ದೊಡ್ಡಣ್ಣೆರೆಡ ಜನಕುಲೆನ್ ಮೋಡಿ ಮಲ್ಪುನ ಕಲೆ ಸೇರ್ ಇತ್ತ್ಂಡ್, ಆತೇ ಅತ್ತ ಆರ್ ಒರಾನೇ ಪೋಡಿದ್ ಪೋಪಿನ ಜನಲಾ ಅತ್ತ್. 'ಸೋಲೇ ಗೆಲುವಿನ ಮೂಲ' ಪನ್ನಿನ ಅರೆನ ಈ ಬುದ್ದಿದ್ದಾತನೇ ಆರ್ ಗೆಲ್ದ್ ಬತ್ತೆರ್. ಮಾತ್ರ ಅತ್ತಾ.... ತುಳು ರಂಗಭೂಮಿಡ್ ತನ್ನ ಪುದರ್ನ್ ಅಲಿಪಂದಿನ ಜಾಗ್ಡ್ ಕೆತ್ತ್ದ್ ದೀಯೆರ್. ದೊಡ್ಡಣ್ಣ ಸೆಟ್ಟು ದುಂಬು ದುಂಬು ಪೋವನಗ ಅರೆಡ ಇತ್ತಿನ ಶಕ್ತಿದ ಪರಿಚಯ ಆಯಿನಕ್ಷು ತಾನಾದೇ ಅರೆನ ಆ ಕೂಟೊಡು ಸೇರುವ ಮನ ಮಲ್ಪೆರ್. ಇಂಚ ಊರೊರ್ಮೆ ತನ್ನ ಕಲೆತ್ತ ಕಮ್ಮನ ಪಷ್ಟೊಂದ ಪೋಯೆರ್. ಪಿರ ಕಾರ್ ದೀಪಿನ ಕಾಲ ಅರೆಡ್ ದೂರಾಂಡ್. 16
