ಕೊರೊಂದು ನೋಂದ್ ಪನ್ನುನ ನೂದೆಸ್ಟ್ ಮಿತ್ತ್ ತಾರಲು, ಸಾವಿರೂ ಕಟ್ಟಳೆಡ್ ಲೆಕ್ಕೊಗು ತಿಕ್ಕುನ ಕಂಗುಲು, ಅವುಲವುಲು ತಾರಿಲು, ನಡು ನಡುಟು ಮಣ್ಣದ ಪುದಾರ್ಗ್ ಸರಿಯಾದಿತ್ತಿನ ಏಳ್ - ಎಷ್ಟೋ ಕೆದುಕ್ಕುಲು, ತುಳುವೆ, ಬರಿಕ್ಕೆ, ಆಟಿ ಪಲಕ್ಕಾಯಿ, ಸೋದೂ ಪೆಲಕ್ಕಾಯಿ, ಅಪ್ಪನ ಪೆಲಕಾಯಿ ಪಕ್ಷುನ ಪುದಾದ ಬೇತೆ ಬೇತೆ ತಿಂಗೊಳುಡು ಪರುಂದನ ಪೆಲಕ್ಕಾಯಿದ ಮರೊಕುಲು, ಕಸಿಕುಕ್ಕು, ವೆಕ್ಕರ ಕುಕ್ಕು, ಬಾರೆಕುಕ್ಕು, ಸೀರೆಕುಕ್ಕು, ಮುಂಡಪ್ಪ ಪನ್ನಿನ ಬೇತೆ ಬೇತೆ ಜಾತಿದ ಕುಕ್ಕುದ ಮರೊಕುಲು, ಚಿಕ್ಕು, ಸೀತಾಫಲ, ಬಪ್ಪಂಗಾಯಿ ಮರೊಕುಲು, ಪಾರಿಜಾತೋ ಮಾತ್ರವಲ್ಡ್ ರಾಮಾಯಣೂಡು ಸೀತಪ್ಪೆಗ್ ನಿಲೆ ಕೊರ್ನ ಅಶೋಕ ವೃಕ್ಷ, ಬಾರೀ ಮಲ್ಲ ಜೀಗುಚ್ಚೆದ ಮರ, ಬಂಗಾರದ ಕುರಾನ ದಿಂಜಾವೊಂದು ನಲಿತ್ತೊಂದುಲ್ಲಾಯಿನ ನೇಲ್ಯ ಕಂಡೂ, ಸೊರುವೊಳಡಿ, ಬಾಕಿತಿಮಾರು, ಪಾದಕೊಳೆಂಜಿ ಪನ್ನಿಂಚಿತ್ತಿ ಬೇತೆ ಬೇತೆ ಪುದಾರ್ ಕಂಡೊಲು. ಬಂಗಾರೂ ಬುಲೆಪಿನ ಈ ಮಣ್, ತನ್ನ ಲೆಕ್ಕೊಗು ಬೊಕ್ಕೊಂಜಿ ಬಂಗಾರೊನು ಸೇರಾವೊಂಡು, ಸೇರಾಯಿನ್ ಅತ್ತ್; ಜನ್ನೊ ಕೊರುಂಡು, ಅಷ್ಟೇ ಬಂಗಾರ್ 'ಕೆದಂಬಾಡಿ ಜತ್ತಪ್ಪ ರೈ'. ರೈಕುಲು ಪುನ ದಿನೊ 11 ಫೆಬ್ರವರಿ 1916, ಪಂಡ 1916ನೇ ಇಸವಿದ ಪೊನ್ನಿ ತಿಂಗೊಳ 28ನೇ ದಿನೊತ ಶುಕ್ರವಾರ ರಾತ್ರಿ, ಆನಿ ರಾಕ್ಷಸ ನಾಮ ಸಂವತ್ಸರ ಉತ್ತರಾಯಣ, ಶಿಶಿರ ಋತು, ಪುಷ್ಯಯುಕ್ತ, ಕೃತ್ತಿಕಾ ನಕ್ಷತ್ರ, ಮೂಜನೇ ಪಾದೊ, ವೃಷಭ ರಾಶಿಡ್ ರೈಕುಲೆನ ಜನನೊ ಆಂಡ್. ಮುಂಡ್ರಾಡಿ ಪಿಲಿಮಜಲ್ ದಾಸರಾಲ್ ಜತ್ತಪ್ಪ ರೈಕುಲೆ ಅಮ್ಮೆ ಸಾವಿರ ಮುಡಿ ಅರಿಗೇಣಿ ಬರುನ ಭೂಮಿದ ಒಡೆಕ್ಕಾರೆ. ಅಪ್ಪಟ ಕೃಷಿಕೆ, ಗಾಂಧಿವಾದಿ, ಶಿಸ್ತ್ರದ ಸಿಪಾಯಿ. ಸರಳೊ, ಸಾತ್ವಿಕ ಸ್ವಭಾವೊ, ಗಟ್ಟಿಮುಟ್ಟು, ಎತ್ತರೊದ ಸರೀರೂ, ಗಂಭೀರೊ ವ್ಯಕ್ತಿತ್ವದ ಬೆನ್ನಾಲೆ ಜವ್ವನೆ. ಅಪ್ಪ ಶ್ರೀಮತಿ ಕೆದಂಬಾಡಿ ಸೀತಮ್ಮ, ಪೊರ್ಲುದ ಪೊಣ್ಣು, ಗುಣೋವಂತೆದಿ, ಸಾದ್ವಿ. ನೂದು ವರ್ಷಗು ದುಂಬುದ ಆನಿದ ದಿನೊಟ್ಟೆ ಶಾಲೆಗ್ ಪೋದು, ಬರವು ಸರವು ಕಲ್ತ್ದ್, ಜೈಮಿನಿ ಭಾರತೊ, ಗದುಗಿನ ಭಾರತೊಲೆನ್ ಕೇನುನಕುಲೆನ ಕಬಿಕ್ ರಂಗೀತೊಲೆನ್ ಸ್ಪಷ್ಟವಾದ್ ಓದುತ್ ಅರ್ಥ್ ಪಂಚಿತ್ರ ಸಕ್ತಿನ್ ಪಡೆಯಿನ ಚುರುಕು ಪೊಣುಂಜೊ. ಉಂದುವೇ ಪಿಲಿಮಜಲ್ ದಾಸರೆ - ಕೆದಂಬಾಡಿ ಸೀತಮ್ಮನ ರತ್ನನೇ ಮಗನೇ ಕೆದಂಬಾಡಿ ಜತ್ತಪ್ಪ ರೈ, ಆರೆಸ್ಟ್ ಮೂಜಿ ವರ್ಷ ಮಲ್ಲಾ ಆರೆ ಅಣೆ ಕೆದಂಬಾಡಿ ನಾರಾಯಣ ರೈಕುಲು, ಆನಿದ ದಕ್ಷಿಣ ಕನ್ನಡ ಜಿಲ್ಲೆಡ್ ತನ್ನ ವಕಾಲತ್ದ ಜಾಣ್ಮಡ್ ದಂತಕತೆಯಾಪಿಲೆಕೊ ಬದ್ಕ್ ದೇವರ ಪಾದೊ ಸೇರ್ ಮಾಮಲ್ಲ ಪುದಾರ್ ಪಡೆಯಿನ ಕ್ರಿಮಿನಲ್ ವಕೀಲೆ, ತನ್ನ ಸಜ್ಜನ ನಡತ, ತೂವೊಡೆನ್ಸಿ ವ್ಯಕ್ತಿತ್ವ, ತನ್ನ ಕುಟುಂಬೊಗು ಪೊಸ ದೇಕಿ, ಪೊಸ ಉಲ್ಲಾಸೊನು ಕೊರುಂಡುಂದು ಪನ್ನುನವು ನೂದೆಕ್ ನೂದು ಸತ್ಯ. ಕೆದಂಬಾಡಿ ಜತ್ತಪ್ಪ ರೈ /8
