ಸುರು ಮಲ್ಲೊ, ಕೋರಿದ ಕೆಲೆವುಗು ರೈಕುಲೆಗ್ ಎಚ್ಚರೊ ಆಂಡ್. ಮೈಂಡ್ ಪೊದಿನ ಊರು, ಸಾವಿರೊ ಬಗೆತ ಪಕ್ಕಿಲೆ ಚಿಲಿಪಿಲಿ, ಗುಂಯ್, ಟಿ ಪಂಡ್ದ್ ಇರಿಂಟಿ, ತೊಡೆದ ಕೆಲೆಂಜಿದ ಸೊರೊ, ದೂರೊದ ಇಲ್ಲಡ್ದ್ ಕೊರೆಪುನ ನಾಯಿಲೆ ಬ್ ಬ್ ಪನ್ನಿನ ಸಮ್ಮೋ ರೈಕುಲೆನ ಕೆಬಿಕ್ ಬೂರುಂಡು, ಲಕ್ಸ್ನ ರೈಕುಲು ಪಿದಾಯಿ ಪೋತು ಬತ್ತೆರ್. ಮೋನೆ ದೆಕ್ಕಿಯೆ, ಬನ್ನಗ ಕೊನಸ್ಸಿನ ಚಾದ ಪೊಡಿ ಪಾಡ್ದ್ ಕಣ್ಣ ಚಾ ಮಲ್ಲೆರ್. ಕೂಟಿಯರೆ ಪೊಡಿ ಬಜಿಲ್ ಇತ್ತ್ಂಡ್, ಬೊಳುದ ಕಾಪಿ ತಿಂಡಿ ಆಂಡ್. ರೈಕುಳು ಬತ್ತಿನ ಸುದ್ದಿ ನಿರೆ - ಕರೆಕುಲೆಗ್ ತೆರೀಂಡ್, ಮಲೆಕುಡಿಯರ್, ಅಜಿಲೆರ್, ಕಾಡ್ಕೊರಗೆರ್, ಮುಗೇರರ್ ಮಾತೆರೆಗ್ಲಾ ತೆರೀಂಡ್, ಪೊಸ ಬಾವಾರನ್ ತೂಯರ ಬತ್ತೆರ್, ಸುಕೋ ದುಕೊ ಪಾತೆರಿಯೆರ್. ಕಡೆಮುಟ್ಟ ಮೂಲೆ ಉಂತುಲೆ, ಎಂಕ್ಲೆಡ್ದಾಯಿನ ಸಾಯೋ ಮಲ್ಲುವೋ ಪಂಡೆರ್. ಆ ಪೂಪದ ಜನೊಕುಲೆ ಬಡಪತ್ ತೂದು ರೈಕುಳೆ ತಿಗಲೆಡ್ ಮರ್ಕ್ ಆಂಡ್, ಈ ಜನೊಕುಲು ಲೋಕೊದ ರೀತಿ ರಿವಾಜುಡ್ಡು ಮಸ್ತ್ ದೂರೊ ಇತ್ತಿನಾಕುಲು, ಬಡ್ತ್ ಪಜೆ ಆತ್ ಮಂದ್ರಿ ಆತ್ ತೆರೊನ್ನಕುಲು, ನರಿ ಉಷಾರ್ದಾಯ ತರಕ್ ತೋರಿತ್ತೋದ್ ತಿರ್ತ್ ತಾಲ್ಸಿಯರೆ ತೂಯೆಂಡ ಅಯಿನೇ ಪ್ರಸಾದೊ ಪಂಡ್ದ್ ತರೆಕ್ ತಲೆನುನಕುಲು ಈ ಪಾಪೊದ ಜನೊ. ಮೊಕುಲೆನ್ ಪೂರಾ ಉದ್ದಾರೆ ಮಲ್ವಿಯರೆ ಎನಡ್ ಸಾದ್ರೂ ಇಜ್ಜಿ. ಆಂಡ ಎನಸ್ಟ್ ಏಪೊತ್ತು ಗುಲಾ ಮೊಕುಲೆಗ್ ಉಪದ್ರೂ ಆಯರೆ ಬಲ್ಲಿ. ಎನ್ನ ಮುಟ್ಟದಕುಲು ಪಂಡ್ದೇ ಮೊಕುಲೆನ್ ತೂವೊಡು ಪಂಡ್ದ್ ಎನ್ನಿಯೆರ್. ನಾವೂರುಡಿತ್ ಕಡೇತ ದಿನೊ ಮುಟ್ಟ ಈ ವಿಷಯೊನು ರೈಕುಲು ಮರತ್ದ್ಜೆರ್, ನಾವೂರುಡು ಬದ್ಯರ ಬೋಡಾದ್ ರೈಕುಲು ದಾನೆ ಮಾತ ಮಲ್ಸ್ದಿಷ್ಟೆ, ಆಂಡ ಒರಿಯೇ ಒರಿ ರೈಕುಲೆಡ್ದ್ ಎಂಕ್ಲೆಗ್ ಅನ್ಯಾಯೊ ಆತ್ಂಡ್ಂದ್ ಪನ್ನಿ ಪಾತೆರೊ ಪನ್ಚ, ಉದ್ದಕುಲು ಪಂಡ್ದಿಪೈರ್ ರೈಕುಲು ನಾವೂರುಡುಪು ನೆಟ್ಟ ಕಾಡಮುರುಗೊಲೆಡ್ ಎಂಕ್ಲೆಗ್ ಉಪದ್ರೂ ಆತ್ಜಿ. ಏರಚ್ಚಾಂಡಲ ಎಂಕುಲೆಗ್ ಅನ್ಯಾಯೊ ಆಂಡ ರೈಕುಲೆಡ ದೂರು ಕೊರುತು ನ್ಯಾನೊ ದತೋನಿಯರ ಸಾದ್ರೂ ಇತ್ತ್ಂಡ್, ಊರುದ ಜನೊಕುಲೆ ಈ ಎಡ್ಡೆ ಪಾತೆರೊನೆ ರೈಕುಲೆಗ್ ಜೋಡಿತ್ತಿನಾವು, ನಾವೂರು ಬುಡುದು ಪಸೀದ್ ದುಂಬು ಪೋಂಡ ಮಿತ್ತ ಜಾತಿತಕುಲೆನ ಇಲ್ಲಾ ಇಡ್ಕೊಂಡ್ ಜೈನರ್, ಬಂಟೆರ್, ಪೂಜಾರು, ಓಡಾರಿಲು, ಬಂಡಾರಿಲು ಮಾತ ಇಲ್ಲದಕುಲೆನ ಗುರ್ತೊಲ ರೈಕುಲೆಗ್ ಆಂಡ್. ಬಾಯಿ ಪಾತೆರೊ ಎಡ್ಡೆ ಇತ್ನ ರೈಕುಲೆಗ್ ಮಾತೆರ್ನಲ ಮನಸ್ ಗೆಲ್ಸಿಯರ ಹೆಚ್ಚ ದಿನೊ ಬೋಡಾಯಿಜಿ. ಆನಿದ ದಿನೊನು ನೆನೆತ್ತೊಂದು ನಾವೂರುಡುಲಾ ತನ್ನೊಂಜಿ ತಿಕ್ಸ್ನ 'ಆಪ್ಪೆ'ನ ಕೆದಂಬಾಡಿ ಜತ್ತಪ್ಪ ರೈ 23
