ಸಾರ್, ಕನ್ನಡ ಸಂಸ್ಕೃತಿ ಗೊತ್ತಿರೋ ಇಬ್ರು ಕಳ್ಳು ಒಬ್ಬಟ್ಟಿನಲ್ಲಿ ಮತ್ತೆ ಬರೋ ಔಷಧಿ ಹಾಕ್ಕುಟ್ಟು ನಮ್ಮ ಜ್ಞಾನ ತಪ್ಪಿ ನಮ್ ಲಗೇಜ್ನೆಲ್ಲಾ ಹೊಡ್ಕೊಂಡೋಗಿಬಿಟ್ಟು ಸಾರ್... ಹುಡುಕಿದ್ರವು ಎಲ್ಲೂ ಸಿಗ್ಲಿಲ್ಲ” ಮುಲ್ಪ ದಾಯೆಗ್ ಬೊಡಾದ್ ಕಳೆರ್ ತುಳು ಪಾತೆರೊಡಿತ್ತ್ಂಡು ತುಳು ಪಾತೆರನಕುಳೆ ದಾಯೆ ಕಳೆರು ಆವೊಡು? ಐನ ಅಗತ್ಯ ದಾದ? ಪುನ ಪ್ರಶ್ನೆಗ್ ಚಿತ್ರಕತೆಟ್ಸ್ ಓಳ್ಲಾ ಉತ್ತರ ತಿಕ್ಕುಜ್ಜಿ. ಆಂಡ ರೈಲುಡು ಸುರಕ್ಕು ಪೆಂಗನ ಲೆಕ್ಕ ತೋಜುದು ಬರ್ಪಿನ ಸರ್ದಾರ್ಜಿ ಅಕೇರಿಡ್ ಬುದ್ಯಂತ ಪೋಲಿಸ್ ಪಂಡ್ ಗೊತ್ತಾಪುಂಡು, ಇಡೀ ದೇಸೊಡ್ ಉಪ್ಪುನ ಸರ್ದಾರ್ಜಿ ಜೋಕ್ದ ಮಿತ್ತ್ ಇಪ್ಪುನ ಎಚ್ಚರೊ ಮುಲ್ಪ ಕರ್ನಾಟಕದ ಬಾಗವಾದುಪ್ಪುನ ತುಳುನಾಡ್ದ ಬಗ್ಗೆ ಇಜ್ಜಿ ಪಣ್ಣಿನವು ಸೋಜಿಗೊದ ಸಂಗತಿ! ಸಿನಿಮಾಳೆಡ್ ಒದ್ದೆ ಪ್ರಾಂತ್ಯ ಬಾಸೆ ಜಾತಿ ಮತ ಸಮುದಾಯ ವ್ಯಕ್ತಿಳೆನ್ ಇಂಚ ತೋಜಾಪುನವು ತಪ್ಪು. ತುಳುನಾಡ್ದ ಭೂತಕೋಲ, ಯಕ್ಷಗಾನ, ಕಂಬಳ, ಕೋರಿಕಟ್ಟ ಮಾತ್ರ ಅತ್ತಂದೇ ಬೇತೆ ಜಾನಪದ ಗೊಬ್ಬು, ಅಟ್ಟಿಲ್ ಅರಗಣೆ, ಪದ್ದೆಯಿ ದುಶ್ಚಿತ ಉಂದೆನ್ ಮಾತಾ ಸಿನಿಮಾಳೆಡ್ ಎಡ್ಡೆ ಕತೆತ್ತೊಟ್ಟುಗ್ ಸೇರಾವುನವು ಒಂಜಿ ಸಾದಿ. ಅಂಚನೆ ತುಳು ಪಾತೆರನು ಕನ್ನಡ ಸಿನಿಮಾದ್ ಸೇರಾವೊಳಿ, ತುಳುವೆರೆಗ್ಲಾ ಹಿಂದಿ ಸಿನಿಮಾಗ್ಲಾ ಸಂಬಂದೊ ಇತ್ತೆನೈಡ್ಡಾತ್ರ ಹಿಂದಿ ಸಿನಿಮಾಡ್ ತುಳು ಸಂಸ್ಕೃತಿನ್ ತೋಜಾವೊಳಿ ಅಯಿಡ್ಸ್ ತೆಂಕಾಯಿ ಬಡಕ್ಕಾಯಿ ಒಂಜಾಮುನೆ ಮಾತ್ರ ಅತ್ತಾಂದೆ ಫಾರಿನ್ದಕುಲೆಗ್ಲಾ ತುಳು ಮುಟ್ಟುಂಡು. ಅಂಚನೆ ಕನ್ನಡಡ್ರಾ ಮುಲ್ಪದ ವಿಸೇಸೊಳೆನ್ ಅಯಿನ ಸೂಕ್ಷ್ಮದೊಟ್ಟುಗೆ ದೆತ್ತೊಂದು ಬರೊಲಿ, ತುಳು ಬೊಕ್ಕ ಕನ್ನಡ ಸಿನಿಮಾಳೆನ್ ಒಟ್ಟುಗೆ ತಯಾರ್ ಮಲ್ಲೊಳಿ. ಬಜಿ ಕುಸಾಲ್ಗಾದ್ ಮಾತ್ರ ತುಳುನಾಡುಲಾ ಮುಲ್ಪದ ಬಾಸೆಲಾ ಬರೊಡುಂದಿಜ್ಜಿ, ಮುಲ್ಪಲಾ ಬೋಡಾಯಿನಾತ್ ಸಮಸ್ಯೆಳು ಉಳ್ಳ, ಆವೊಡಾಯಿನ ಬೇಲೆ ಸುಮಾರ್ ಉಳ್ಳನಗರೀಕರಣದ ಸಮಸ್ಯೆಲು, ಕೂಡುಕುಟುಂಬದ ಪಾಲು, ಗಲ್ಫ್ ಸಂಬಂದೊ, ದೊಡ್ಡು ಕಾಸುವ ವೈವಾಟು, ಜಾತಿ ಮತ ಕೋಮುಸೌಹಾರ್ದೊ, ಆಕಾಸಬೆನ್ನಿ ಕಡಲ್ ಬೆನ್ನಿದ ಸಮಸ್ಯೆಳು, ಮಲ್ಲನಗರದೊಟ್ಟುದ ಸಂಬಂದೊ, ಬಜ್ಜಯಿ, ರಬ್ಬರ್, ಅರಿ-ಇಂಚ ಬೆನ್ನಿ, ಕೃಷಿ ಸಂಬಂದೊದ ಸಂಗತಿಳು, ಅಯಿಡ್ಸ್ ಸಮಾಜ, ಕುಟುಂಬಗ್ ಆಯಿನ ಉದ್ದಾರ-ಉಪದ್ರ, ಊರ್ಡ್ ಪರಬ್ಬೆ ಪರಿಸ್ಥಿತಿ, ಕೃಷಿಕೆ ಆಣ್ಳಗ್ ಪೊಣ್ಣುಳು ತಿಕ್ಕಾಂದಿನವು, ಮಾತೆರೆಗ್ಲಾ ಮುಂಬೈ, ಬೆಂಗ್ರೆ ಆವೊಡಾಯಿನವು, ಉಂದೆಡ್ ಉಂಟಾಪುನ ಸಾಮಾಜಿಕ-ಮಾನಸಿಕ ಉಪದ್ರಳು, ಮಲ್ಲ ಕೈಗಾರಿಕೆಲು, ಕರೆಂಟ್ ಯೋಜನೆಲು, ನೇತ್ರಾವತಿ ತಿರ್ಗಾವುನ ಪ್ರಯತ್ನ, ಗೊತ್ತುಗುರಿ ಇಜ್ಯಾಂದಿನ ರಾಜಕೀಯ, ಕಾಸು ಮಲ್ಲಿನ ವೈವಾಟು, ರೋಡು ರೈಲುದ ರಾಜಕೀಯ, ತುಳುನಾಡುದ ಅಭಿವೃದ್ಧಿಗೆ ಆವೊಡಾಯಿನ ರೈಲುನು ಕಣ್ಣೂರುಗ್ ಕೊಂಡೊಪಿನವು, ಮುಲ್ಪ ಮಲಯಾಳ ಎಚ್ಚೆಚ್ಚ ಆಪಿ ಲೆಕ್ಕ ಮಲ್ಪುನವು, ತುಳುನಾಡುದಕುಳೆಗೆ ಸರ್ಕಾರಿ ಉದ್ಯೋಗ ಬಾರೀ ಕಡಮ್ಮೆ ತಿಕ್ಕೊಂದುಪ್ಪುನವು,ಈಡೆಗ್ ತುಳು ಸಂಸ್ಕೃತಿ ತೆರಿಯಾಂದಿನ ಅಧಿಕಾರಿಳೇ ಬರೊಂದಿಪ್ಪುನವು ಇಂಚ ಏಚನೆ ಮಲ್ನೋಡಾಯಿನ, ಸಿನಿಮಾ ಆಪಿನಂಚಿನ ಆವೊಡಾಯಿನ ಸಂಗತಿ ಸುಮಾರುಂಡು.ಸಿನಿಮಾ ಡಾಕ್ಯುಮೆಂಟರಿ ಆವೊಡುಂದಿಜ್ಜಿ ಆಂಡ ಇಂಚಿನ ವಿಷಯದೊಟ್ಟುಗು ಬರಿನ ಸಿನಿಮಾ ಪಣ್ಣಿನ ಸಾಂಸ್ಕೃತಿಕ ಪಠ್ಯ ಇನಿ ಬೋಡು. ليه 171
