ಗುರಾರೆಗೇ ನೆರೊಂದು, ಬಪ್ಪರ್ ಪಾತೆರೊಂದು, ಕಲಿ ಪರೊಂದು ಪುಲ್ಯ ಮಲ್ಪುವೆರ್. 'ಮಂಜೊಟ್ಟಿ'ಗ್ ಎಲ್ಲು ಜಡ್ಕೊಂಡ ದುಂಬುಗು ಒರಿ ಎರುವಾದ್ ಕಂಬುಲದ ಕಂಡೊಡು ನನೊರಿ ಆಯನ್ ಗಿಡಪ್ಪುವೆರ್, ಕಂಬುಲದ ಕಂಡೊಡುಪ್ಪುನ ನೀಚಶಕ್ತಿಲು ಬಲಿಪಿ ಎಲ್ಲೆಗಾವಡ್, ಜವನಿಯೆರೆಗಾವಡ್ ತನ್ನೊನೆರೆ ಬಲ್ಲಿ ಪಂದ್ ಇಂಚಿನ ಆಚರಣೆ ಪಂದ್ ಪನ್ವೆರ್. ದೋಲು ಬೊಟ್ಟುದು ನಲಿಪುನೆಡ್ಡಾತ್ರ ಒಳ್ಳೇ ಬೊಡ್ಯಾಂದಿನ ಶಕ್ತಿಲು ಕಂಬುಲದ ತಲೊಕು ಬರಿಯರಲ ಸಾಧ್ಯ ಇದ್ದಿ ಪನ್ಸಿ ನಂಬಿಕೆಲಾ ಉಂಡು. ಕೊರಗ ತುಳುನಾಡ್ಡುಪ್ಪಿ ಮಾತಾ ರೀತಿ-ರಿವಾಜಿಡ್ಲಾ ದುಂಬುದ ನೆಲೆಯಾದ್ ತೋಜಿದ್ ಬರೆರ್. ನೆಕ್ಕ ಅಕುಲು ಪಾತೆರುನ ಬಾಸೆಲಾ ಸಾಕ್ಷಿಯಾದುಂಡು. ತುಳುವೇ ಆಂಡಲಾ ಐಟ್ಸ್ ಉಪ್ಪುನ ವ್ಯಂಜನ ಸ್ವರತ ಉಚ್ಚಾರಣೆ ಬೊಕ್ಕ ಬಳಕೆಡ್ ಐತ ವ್ಯಾಕರಣಾಂಗೊಡ್ಡಾತ್ರ ಅವು ಉತ್ತರ ದ್ರಾವಿಡ ಭಾಷೆಯಾಯಿನ ಬ್ರಾಹ್ಮಯಿಗ್ ಕೈತಲುಂಡು ಪಂದ್ ಭಾಷಾವಿಜ್ಞಾನಿಲು ಪನ್ನೆರ್, ಕೊರಗ ಭಾಷೆ ಒಂಜಿ ಉಪಭಾಷೆ ಅತ್ತೆ, ಅವು ಬೇತೆನೇ ಭಾಷೆ ಆದುಷ್ಟೊಡು ಪನ್ಸಿ ಚರ್ಚೆ ಇತ್ತಂಡಲಾ, ದ್ರಾವಿಡ ಭಾಷಾವಿಜ್ಞಾನೊಡು ಕೊರಗ ಭಾಷೆಗ್ಲಾ ಒಂಜಿ ವಿಶಿಷ್ಟವಾಗಯಿನ ಮಾನಾದಿಗೆ ಉಂಡು. 'ಕೊರಗತನಿಯೆ' ಕೊರಗೆರ ಮೂಲ ಪುರುಸೆ, ಮಿತ್ತಜಾತಿದಕ್ಲ್ನ ಅನ್ಯಾಯ, ಮೋಸೊನು ಪೊಂರ್ಬುದ್ ಉಂತುದಿನಾಯೆ. ಅಂಚಾದ್ ಒರಿ ಸಾಂಸ್ಕೃತಿಕ ವೀರೆ ಆದ್ ಕೊರಗರ್ ಇನಿಕ್ಲಾ ಆಯನ್ ನಂಬೊಂದು ಬೈದರ್, ಭಟ್ರನಕುಲು ಅತ್ತಂದೆ ಬೇತೆ ಮಾತಾ ಜಾತಿದಕುಲು 'ಕೊರಗತನಿಯಗ್ ಪರಕೆ ಪಂಡ್ದ್ ನಂಬೊಂದು ಕೈಕೊನುವೆರ್. ಪೆತ್ತಕಂಜಿ ಇದ್ದಿಂಡ ಒವ್ವ ವಸ್ಟ್ ದಕ್ಕದ್ ಪೋಂಡಲಾ ಕೊರಗಜ್ಜಗ್ ಬಾಜೆಲ್ ದೀಪೆ ಪಂದ್ ಪರಕೆ ಪನ್ನೆರ್. ಕೊರಗ ತನಿಯಗ್ 'ಜೀಟಿಗೆ' ದಾಂತೆ ತಿಂಗೊಲ್ದ ಬೊಲ್ಪುಗು ಮಲ್ಪುನ ಕೋಲೊನು ಪೊಂಜೋವುನಕುಲುಲಾ ತೂಯರೆಗ್ ಇಜ್ಜಿ ಪಂದ್ ನಂಬಿಕೆ ಉಂಡು. 3 ಇಂಚ ಕೊರಗೆರ್ ಕಾಡ್ಡ್ ನಾಡ್ ಮುಟ್ಟ, ನಾರ್ಬೇರ್ಡ್ ದೈವ ದೇವೆರ್ ಮುಟ್ಟ ಮಾತಾ ನಿಲೆತ ಗೇನೊಲೆಡ್ಲಾ ತುಳುನಾಡ್ಡ್ ತಕ್ಕುಲೆನ ಪರಸೋಕುದ(ಸಂಸ್ಕೃತಿದ) ಬೇರ್ಲೆನ್ ನೆಗೆತ್ ತೋಜಾವೆರ್, ಅಕಲ್ಪ ಬದ್ಕ್ ಮೊದಿಕೆ ಕಟ್ಟಿನ ಆಲೋಚನೆದ ಸೊಲ್ಲು ನಾಡ್ನ್ ಅಕುಲು ಗೆರತೊಂದಿನ ನಿಲೆಟ್ಸ್ ಉಂಡು, ಆಣ್ ಪೊಣ್ಣು ಪನ್ನಿ ಭೇದದಾಂತೆ ನರಮಾನಿ ಪನ್ನಿ ಆಲೋಚನೆ ಇಂಬು ಮಲ್ಲಿ ಆಚರಣೆಲು, ಕ್ರಮೊಕುಲು, ರೀತಿ-ರಿವಾಜಿಲುಲಾ ಮುಖ್ಯ. ಇನಿಕ್ ಕಾಲ ಬದಲಾವೊಂದುಂಡು ಕೊರಗೆರ್ಲಾ ಕಾಡ್ ಬುಡ್ ನಾಡ್ ಬೈದೆರ್. ಮಲ್ಲು ಬೇಲೆದಲೆಕೊನೆ ಬದ್ಕ್ ಗೇನೊಲು ಬದಲಾವೊಡು ಪನ್ನಿನಲಾ ಮಸ್ತ್ ಮುಖ್ಯ. ಅತ್ತಂದೆ 'ತುಳುವೆರೆಂಕುಲು' ಪ ಪೆರ್ಮೆಡ್ ಅಕುಲೆನ್ ಬದ್ಕೆರೆ ಬುಡ್ಡಿನಲಾ ಇನಿತ ತುರ್ತುದ ಅಗತ್ಯಲಾ ಅಂದ್. ತುಳು ಸಂಸ್ಕೃತದ ಬೇರ್ಲಾಯಿನ ಕೊರಗೆರ್ ನಾರಾದ್ ನಾರಂದೆ ಬದುಕೊಡಾಂಡ ಕೊಡಿಪಾದ್ ಕೊಡಿಯರ ತೆಗ್ರೆ ಅವಕಾಶ ಮಲ್ತ್ ಕೊರೊಡಾಯಿನ ತುಳುವೆರೆಂಕಲ್ನ ಮಾತೆಲಾ ಜಬದರಿ ಆದುಂಡು. 166
