ತುಳುನಾಡ್ ಪೊಣ್ಣಸಗಿದ ಅದ್ಭುತ ಸಂಕೇತವಾದುಪ್ಪುನ ಅಬ್ಬಕ್ಕ ಪೊಸ ಇತಿಹಾಸ ಸೃಷ್ಟಿ ಮಲ್, ತನ್ನ ಅನುಪಮ ದೈರ, ತ್ಯಾಗ, ಬಲಿದಾನೊಲೆನ್ ಮೆರೆದ್ ತುಳುನಾಡ ಬಾನೊಡು ಸಿರಿ ಬೊಳ್ಳಿಯಾದ್ ಉಂತಿಯಲ್ ಬ್ರಿಟಿಶೆರ್ ಭಾರತೊಗು ಬರೊಡ್ಡ ದುಂಬೇ ಇಡೆಗ್ ಪೋರ್ಚುಗೀಸರ್ ಬತ್ತೆರ್. ವಾಸ್ಕೋಡಗಾಮೆ ಕಲ್ಲಿಕೋಟೆಗೆ ಪ್ರವೇಶ ಮಲ್ಲಿ ಬೊಕ್ಕ ಬೇರದ ನೆಪೊಟ್ಟು ನೇನೆ ಒಲ್ಲೊಂದು ಭಾರತಗ್ ಬತ್ತಿ ಪೋರ್ಚುಗೀಸೆ ಆಕ್ರಮಣಗ್ ದುಂಬಾಯೆರ್, ಗೋವೆನ್ ಸ್ವಾಧೀನ ಮಲ್ಲೊಂಡೆ, ಬಲಾತ್ಕಾರದ ಮತಾಂತರಲಾ ಮಲ್ಲೆರ್, ಪೋರ್ಚುಗೀಸೆರೆನ ಈ ಸಂಘರ್ಷ ಮನೋಭಾವ ಅಬ್ಬಕ್ಕ ಪ್ರತಿಭಟನೆ ತೋಜಾಯಲ್ ಜನನ ವಿಮೋಚನೆಗಾದ್ ಪೊರ್ಂಬಿಯಲ್. ಅಬ್ಬಕ್ಕ ಅಡ ಗೋವೆದೊಟ್ಟಿಗೆ ಕುಡ್ಲಲಾ ಪೋರ್ಚುಗೀಸೆರೆನ ಸೊತ್ತಾತು ಪನೆಟ್ಟ ಸಂಶಯ ಇಜ್ಜಿ, ಪೋರ್ಚುಗೀಸೆರೆ ವಿರುದ್ಧ ಆಲ್ ಮಲ್ಲಿ ಯುದ್ದೋಲೆನ್ ಭಾರತದ ಸುರೂತ್ತ ಸ್ವಾತಂತ್ರ್ಯ ಪೊಣೆಪು ಪಂಡ್ ಗುರುತಿಸಾಂಡಲಾ ತಪ್ಪತ್ತ್. ತುಳುನಾಡ್ದ ಪ್ರಸಿದ್ಧ ಐತಿಹಾಸಿಕ ಬೊಕ್ಕ ಸಾಂಸ್ಕೃತಿಕ ಜಾಗೆಲೆಡ್ ಉಳ್ಳಾಲಲಾ ಒಂಜಿ. ಮುಲ್ಪ ತುಳುನಾಡ್ದ ಅರಸು ವಂಶೆಲೆಡ್ ಒಂಜಾಯಿನ ಚೌಟ ವಂಶದಕುಲು ಪೊರ್ಲುಡು ಆಳ್ವಿಕೆ ನಡಪಾವೊಂದು ಬತ್ತಿನವು ಬಜೀ ಒಂಜಿ ಪ್ರಾದೇಶಿಕ ಇತಿಹಾಸ ಆದ್ ಒರಿಯಂದೆ ದೇಶ ವಿದೇಶೂಲೆನ ರಾಜಕಾರಣಡ್ ಮಹತ್ವದ ಸಂಗತಿಯಾದಿತ್ತಂಡ್. ಈ ಖ್ಯಾತಿಗ್ ಕಾರಣ ಮಲ್ಲ ಮಲ್ಲ ಸಂಸ್ಥಾನೊಲೆ ಆಣ್ ಅರಸುಲೇ ಪೋಡಿದ್ ಕಾನಿಗೆ ಕಡಪುಡ್ನಗ, ಪೊಣ್ಣುಪೊಂಜೆವು ಅಬ್ಬಕ್ಕ ವಿದೇಶೀ ಶಕ್ತಿಯಾಯಿನ ಪೋರ್ಚುಗೀಸೆರೆಡ ಸೆಡ್ಡಿದ್ ಪೊಣೆಯಿನವು. ವಿದೇಶೀ ಬರಹಗಾರೆರೆ ಬರವುಲೆಡ್ ಉಳ್ಳಾಲ ಬೊಕ್ಕ ಉಳ್ಳಾಲದ ರಾಣಿ ಪನ್ನಿ ಉಲ್ಲೇಖ ಕುಡಕುಡ ಬತ್ತ ಅವೊಂಜಿ ಮಾಜವೆರೆ ಆವಂದಿ ಪುದರ್ಂದ್ ಸ್ಥಾಪನೆ ಆಂಡ್. ರಾಣಿ ಅಬ್ಬಕ್ಕನ ಅಸಾಮಾನ್ಯ ವ್ಯಕ್ತಿತ್ವ ಮಸ್ತ ಜನಪದ ಐತಿಹ್ಯಲೆಗ್ ಕಾರಣ ಆತ್ಂಡ್. ಸ್ಥಳೀಯ ಐತಿಹ್ಯಲೆನ ಪ್ರಕಾರ ಅಬ್ಬಕ್ಕ ಒಂಜಿ ಅಸಾಧಾರಣ ವ್ಯಕ್ತಿತ್ವದ ಬಾಲೆ ಆದಿತ್ತಲ್, ಯುದ್ಧವಿದ್ಯೆಡ್, ರಾಜಕಾರಣ ಜ್ಞಾನೊಡು ಅಸಾಮಾನ್ಯ ಪ್ರತಿಭೆ ತೋಜಾದಿತ್ತಲ್. ಬಿಲ್ವಿದ್ಯೆ ಬೊಕ್ಕ ಕತ್ತಿಯುದ್ದೊಡು ಅಲೆಗ್ ಸಮನಾದ್ ಉಂತೆರೆ ಏರೆರ್ದ್ ಆವೊಂದಿಜಾಂಡ್. ತನ್ನ ಅಮ್ಮೆರೆನ ಬೆಂಬಲೊಡು ಆಣ್ ಮಗಲೆಕ್ಕ ಬುಳೆಯಿನ ಅಬ್ಬಕ್ಕ ನಿರೆತ್ತ ಬಂಗರಸುನು ಮಧ್ಯೆ ಆಯಲ್, ಆಂಡ ಈ ಮಧ್ಯೆ ಮಸ್ತ್ ಕಾಲ ಒರಿಯಿಜಿ. ತನ್ನ ಮದಿಮಯೆ ಪಾಡಿನ ಬಂಗಾರ್ ಪಡ್ಡೆಯಿಲೆನ್ ಪಿರಕಡಪುಡುದು ಅಬ್ಬಕ್ಕ ಈ ಮದಿಮೆನ್ ಕಡ್ಕೊಂಡಲ್. ಪೋರ್ಚುಗೀಸೆರೆಗ್ ಕಪ್ಪ ಕೊರ್ಪಿ ವಿಚಾರೊಡೇ ಕಂಡನೆ - ಬುಡೆದಿಗ್ ಮನಸ್ತಾಪ ಬತ್ಂಡ್ಂಗ್ಲಾ ಪನ್ನೆರ್. ಬುಡೆದಿನ ಛದಿಕ್ ಸುಂಯ್ ಬಂಗರಸು ಪೋರ್ಚುಗೀಸೆರೆ ದೋಸ್ತಿಕತೆ ಮಲ್ತ್ದ್, ಉಳ್ಳಾಲೊನು ವಶ ಮಲ್ಲೊನಿಯೆರೆ ಪ್ರಯತ್ನ ಬರ್ಪೆ. ಪೋರ್ಚುಗೀಸೆರ್ ಉಳ್ಳಾಲೊನು ವಶ ಮಲ್ಲೊನಿಯೆರೆ ಮಸ್ತ ಪ್ರಯತ್ನ ಮಲ್ಪುವೆರ್. ಮೋಸದ ಗೊಬ್ಬು ಗೊಬ್ಬುವೆರ್. ಆಂಡ ಪ್ರತೀ ಸರ್ತಿ ಸೋತು ಪಿರ ಪೋಪೆರ್. 1525 ಟ್ ಪೋರ್ಚುಗೀಸೆರ್ ಕುಡ್ಲದ ಕರಾವಳಿಗೆ ಆಕ್ರಮಣ ಮಲ್ಪೆದ್ ಅವೆನ್ ನಾಶ ಮತ್ತೆರ್. ಕೂಡ್ಲೆ ಅಬ್ಬಕ್ಕ ತನ್ನ ಸಾಮ್ರಾಜ್ಯದ ರಕ್ಷೆಣೆದ ಮಾತ ತಯಾರಿ ಮಲ್ಗೊಂಡಲ್ 135
