ನಾಟೊಕೊಲೆನ್ ತಯಾರ್ ಮಲ್ತ್ದ್ ಭೋಪಾಲ್ಗ್ ಪೋದಿತ್ತ. ಎಂಕೆನ ಕೂಟೊಡು ಪುರುಷೋತ್ತಮ ಬಿಳಿಮಲೆ, ಮೋಹನ ಸೋನಾ, ಚಂದ್ರಹಾಸ ಉಳ್ಳಾಲ, ರಾಮಕೃಷ್ಣ ಜನ್ನಿ ಎಸ್.ಎಸ್. ಭಟ್, ಗೋಪಾಡ್ಕರ್, ಮೋಹನಚಂದ್ರ ಬೊಕ್ಕ ಯಾನ್ ಇಂಚ 9 ಜನ ಇತ್ತ. ಎಂಕುಲು ಭೋಪಾಲ್ ರಂಗಮಂಡಲೊಗು ಕಾರ್ಯಕ್ರಮೊತ ದಿನತ್ತಾನಿ ಮುಟ್ಟುನಗನೇ ಕಾರ್ಯಾಗಾರದ ಉದಿಪನ ಲೇಸ್ ಸುರುವಾದಿತ್ತ್ಂಡ್, ರಂಗಭೂಮಿಡ್ ಮಸ್ತ್ ಕೆಲಸ ಮಲ್ಲಿನ ಹಿರಿಯೆರಾಯಿನ ಶಂಭುಮಿತ್ರೆ ಉದಿಪನದ ಪಾತೆರ ಪಾತೆರೊಂದಿತ್ತೆರ್. ಅಯಿಡ್ ಬೊಕ್ಕ ಸುಮಾರ್ 80 ವರ್ಸೊ ಪ್ರಾಯೊದ ಒರ್ತಿ ಪೊಂಜೊವು ಪಾತೆರೆರೆ ಸುರುಮಲ್ಲೆರ್. ಆರೆನ ಪಾತೆರ ಇಡೀ ಬೀದಿನಾಟಕೊದ ಬಗೆಟೇ ಇತ್ತ್ಂಡ್, ಬೀದಿ ನಾಟಕೊಲು ಅಂಚ ಉಪೊಡು, ಇಂಚ ಉಪೊಡು, ಮಸ್ತ್ ಗಂಭೀರವಾದಿಪೊಡು, ಜೊತೆಟ್ ಕಲಾತ್ಮಕವಾದ್ಾ ಇಪೊಡು... ಅವು ಮಾತಾ ಬುಡು ಮಾರ್ಗೊದ ಬರಿಟ್ ಉಂತುದು ನಲ್ಲಿ ಕೂಡ್ಲೆ ಅವು ಬೀದಿನಾಟಕ ಆಪುಜಿ ಇಂಚ ಹಿಂದಿ ಭಾಸೆಡ್ ಸುಮಾರ್ ಪೊರ್ತು ಪಾತೆರೆರ್. ಆರೆನ ಪಾತೆರೊನು ಕೇನೊಂದಿತ್ತಿನ ಪುರುಷೋತ್ತಮ ಬಿಳಿಮಲೆಗ್ ದಾದ ಆಂಡಾ ಗೊತ್ತುಜ್ಜಿ “ಈ ಪರಬ್ಬುಗು ದಾಯ್ದ ಗೊತ್ತುಂಡು? ನಮ್ಮ ತುಳುವೆರ್ನ ಬೀದಿ ನಾಟಕೊನು ತೂವಡ್. ಆತಾನಗ ಬೀದಿನಾಟಕ ಪಂಡ ದಾಯ್ತಂದ್ ಗೊತ್ತಾಪುಂಡು ಪಂಡ್ದ್ ಕುಸಲ್ ಪಾತೆರೆರ್. ಉದಿಪನ ಲೇಸ್ಡ್ ಬೊಕ್ಕ ಎಂಕೆನ ಕೂಟೊಡ್ಡೆ ನಾಟಕೊದ ಪದ್ಯೋಲೆನ ಪಾಟ್ದ ಕಾರ್ಯಕ್ರಮ ಇತ್ತ್ಂಡ್. ಅವು ಎಡ್ಡೆಡೇ ನೆರವೇರ್ ಬಂಡ್. 0 ಕಾರ್ಯಗಾರೊದ ನಾಲ್ಕನೇ ದಿನತ್ತಾನಿ ಎಂಕೆನ ಕೂಟೊದ ನಾಟಕೊಲೆನ ಪ್ರದರ್ಶನ ಬೊಕ್ಕ ಸಂವಾದ ಕಾರ್ಯಕ್ರಮ ನಡಪ್ಪೆರೆ ಇತ್ತ್ಂಡ್. ಮಧ್ಯಾಹ್ನ ಸುಮಾರ್ 12 ಗಂಟೆ ಆದಿತ್ತ್ಂಡ್, ಎಂಕೆನ ನಾಟಕ ನನಲಾ ಸುರುವಾದಿಜ್ಜಂಡ್. ಆತ್ ಪೊರ್ತಾನಗ ಅವೇ ಉದಿಪನದ ಲೇಸ್ಡ್ ಪಾತೆರ್ನ 80 ವರ್ಸೊ ಪ್ರಾಯೊದ ಪೊಂಜೊವು ಸ್ಟೇಜ್ಗ್ ಬತ್ತದ್ ಉಂತೆರ್. ಬಿಳಿಮಲೆಗ್ ಆರೆನ್ ತೂದು ಪಿರ ಸೆಕ್ಸ್ ಆಂಡ್. “ಅಲೆ... ಆ ಅಜ್ಜಿ ಕುಡ ಬೈದ್ಂಡ್....” ಮೆಲ್ಲೊಡೆ ಪಂಡೆರ್, ಆತಾನಗ ಎಂಕ ತೂವೊಂದಿತ್ತಿಲೆಕೋನೇ... ಕಾರ್ಯಾಗಾರೊದ ನಿರ್ದೇಶಕರಾದಿತ್ತಿನ ಬಿ.ವಿ. ಕಾರಂತೆರ್ ಅಡೆಗ್ ಬತ್ತ ಆರೆನ್ ಎದುಕೊನೊಂದು ಬಲೇ... ಬಲೇ... ಮೇಡಂ... ಈತ್ ಪೊರ್ತುಗು ದಾನೆ ಬತ್ತ..?” ಪಂಡ್ದ್ ಕನ್ನಡೊಡು ಪಾತೆರೆರ್. ಕಾರಂತೆರ್ ಆ ಅಜ್ಜಿಡ ಕನ್ನಡೊಡು ಪಾತರ್ನೆನ್ ಕೇನ್ಸ್ ಎಂಕ್ಲಗ್ ಸೋಜಿಗ ಆಂಡ್, “ದಾಲಾ ಇಜ್ಜಿ.. ದಿಲ್ಲಿಡ್ ಸೀದಾ ಇಡೆಗೇ ಬತ್ತೆ. ನಮ್ಮ ಊರುದಕ್ಷೆನ ನಾಟಕ ಅತ್ತಾ... ಎಂಚ ಮಲ್ಲುವೆರ್ ತೂಕ ಪಂಡ್ದ್ ತೂಯೆರೆ ಬತ್ತೆ ಪಂಡ್ದ್ ಆ ಅಜ್ಜಿಲಾ ಕನ್ನಡೊಡೇ ಉತ್ತರ ಕೊರೆನ್ ತೂದು ಎಂಕ್ಲಗ್ ನನಲಾತ್ ಆಚಿರ ಆದಿತ್ತ್ಂಡ್. ಬಿಳಿಮಲೆಗ್ ಅಂತೂ ಉಂತೆರೆ ಕುಲೆರೆ ಆಯಿಜಿ. “ಯಾನ್ ಇತ್ತೆನೇ ಆರೆನ ಕಾರ್ಗ್ ಬೂರು ಮಾಪು ನಮ್ಮೊನುವೆ... ಛೇ! ಆರ್ ಏಂದ್ ತೆರಿಯಂದೆ ಬಾಯಿಗ್ ಬತ್ತಿಲೆಕ ನಮ ಪಾತೆರ ಪಂಡ್ದ್ ಗುನುಗುನು ಪನೆರೆ ಸುರುಮಲ್ಲೆರ್, ಎಂಕ್ಲನ ನನಲಾತ್ ಕಮಲಾದೇವಿ ಚಟ್ಟೋಪಾಧ್ಯಾಯೆರ್ / 22
