ಪುತ್ತೂರು, ಮಡಿಕೇರಿ, ಬೆಂಗಳೂರು, ಬೊಂಬಾಯಿಡ್ ತುಳುಕೂಟ ಎಣ್ಣೆಲೆನ್ ಮಲ್ಲೆರ್, ತುಳುನಾಟಕ ಸಪ್ತಾಹ ಮಲ್ಲೆರ್, ತುಳು ಸಿನೇಮ ಪ್ರಶಸ್ತಿ ಪಟ್ಟಿಯೆರ್, ಕುಡ್ಲ ಆಕಾಶವಾಣಿಡ್ ತುಳು ಕಾರ್ಯಕ್ರಮ ಹೆಚ್ಚಿಗೆ ಅವರೆ ಪ್ರಯತ್ನ ಮಲ್ಲೆರ್, ಗಣ್ಯರೆಗ್ ಸನ್ಮಾನ ಮಲ್ಲೆರ್, ರತ್ನವರ್ಮ ಹೆಗ್ಗಡೆ ಪ್ರಶಸ್ತಿ ಕೊರಿಯೆರ್, ತುಳು ಸಿನೆಮೊಗು ಟಾಕೀಸ್ ದೆಪ್ಪಾದ್ ಕೊರಿಯೆರ್, ತುಳು ಪೆರ್ಮೆ-ಗೆ-ಮೇಲೆಗ್ ಮನವಿ ಮತ್ತೊಂಡರ್, ಬದಿತ್ತ ಎದ್ ಸೊರ ಅಕ್ಕಾಯ, ಬದಿದ್ದಾದ್ ಕಣನೀರ ಬಾಳ್ವೆಗೆ ಈಡಾತಿ ನಾಲ್ವರ್ ಅಪ್ಪೆಗ್ ನ್ಯಾಯ ಕೊರ್ಪಾಯ, ತುಳು ವಿಶ್ವ ಸಮ್ಮೇಳನ ಮಲ್ವಾಯರ್, ಇಂಚಿತ್ತಿ ಪುಣ್ಯಾತ್ಮ ಹೆಗ್ಡೆರ್. ತನ್ನ ಕಕ್ಷಿಗಾರೆರೆಗ್ ಅಕ್ಸೆನ ವ್ಯಾಜ್ಯೋಡು ಅನ್ಯಾಯ ಆವಂದಿಲೆಕ ಪೊಣೆತಿನ ಹೆಗ್ಡೆ ಬಜೀ ಬಡವೆರೆಗ್ ಧರ್ಮೊಗು ವ್ಯಾಜ್ಯ ತೀರ್ಮಾನ ಆಪಿನಂಚ ವಕಲತ್ ಮಲ್ಲೆರ್. ರಾಜಿಡ್ ಇತ್ಯರ್ಥ ಆಪುನಂಚಿತ್ತಿ ವ್ಯಾಜ್ಯೋಲೆಗ್ ಅಪವ್ಯಯ ಬೊಕ್ಕ ಕಾಲಹರಣ ಆವಂದಿನಂಚ ಪ್ರಯತ್ನ ಮಲ್ಲೆರ್. ಅರೆನ ಕಕ್ಷಿಗಾರೆರೆಡ್ ದಿಂಜ ಜನ ಪಾಪದಕ್ಕು ತುಳುಕೂಟ ಸ್ಥಾಪನೆಗೆ ಪುಗೆಲ್ ಕೊರ್ತಿನಕುಲು ತುಳುಕೂಟ ಸ್ಥಾಪನೆಗೆ ಎಸ್.ಆರ್. ಹೆಗ್ಡೆರೆಗ್ 1969ತ್ತ ಪೊರ್ತುಡು ಸಕಾಯ ಮಲ್ಲಿ ತುಳು ಅಭಿಮಾನಿಲು : ಬಿ. ಸುಬ್ಬಯ್ಯ ಶೆಟ್ಟಿ ಎಸ್.ಕೆ. ಅಮೀನ್, ರತ್ನಕುಮಾರ್ ಎಂ, ಎ.ಸಿ. ಭಂಡಾರಿ, ಎಂ. ಲೋಕಯ್ಯ ಶೆಟ್ಟಿ, ಅಮೃತ ಸೋಮೇಶ್ವರ, ಉಳ್ಳಾಲ ಮಚ್ಛೇಂದ್ರನಾಥ್, ಮಚ್ಛೇಂದ್ರನಾಥ್ ಪಾಂಡೇಶ್ವರ, ಕೆ.ಬಿ. ಭಂಡಾರಿ, ಕೆ.ಎನ್. ಟೈಲರ್, ಬೇಸಿಯಸ್ ಡಿ'ಸೋಜ, ರಾಮ ಕಿರೋಡಿಯನ್, ಬಿ.ಎಂ. ಇದಿನಬ್ಬ ಎಲ್ಲೂರು ಉಮೇಶ್ ರಾವ್, ಕಮಲಾಕ್ಷ ಪಿ., ಬಿ. ದೇವಪ್ಪ ಆಳ್ವ, ಕೆ. ಗೋಪಾಲಕೃಷ್ಣ ಸೀತಾರಾಮ ಕುಲಾಲ್, ಕೆ. ವೇದವ್ಯಾಸ ಭಟ್, ಅಮ್ಮೆಂಬಳ ಬಾಳಪ್ಪ ನರ್ಕಳ ಮಾರಪ್ಪ ಶೆಟ್ಟಿ ಎಂ. ವಿಶ್ವನಾಥ್ ಇಂಚಿತ್ತಿ ಗಣ್ಯ ಮಾತ ಆರೆನ ತೈನಾತಿಲಾದಿತ್ತೆರ್. ವಿದ್ಯಾಭ್ಯಾಸ ಪ್ರಾಯ 6 ವರ್ಷ ಆಯಿನಪಗ ಹೆಗ್ಡೆರ್ 1940ಟ್ ಶಾಲೆಗ್ ಪೋವೆರೆ ಸುರು ಮಲ್ಲೆರ್, 1945ಟ್ 5ನೇ ಕ್ಲಾಸ್ ಪಾಸಾದ್ ಹೈಸ್ಕೂಲ್ 1 ಫಾರ್ಮ್ಗ್ ಸೇರಿಯೆರ್. 1952ಟ್ ಮೆಟ್ರಿಕ್ ಪಾಸಾದ್ ಕುಡ್ಲದ ಸೈಂಟ್ ಅಲೋಸಿಯಸ್ ಕಾಲೇಜ್ ಸೇರ್ ಅಯಿಡ್ ಬೊಕ್ಕ ಪಾರೇತರ ಚಟುವಟಿಕೆಗ್ ಹೆಚ್ಚಿಗೆ ಗಮನ ಕೊರಿಯೆರ್. ಎಡ್ಡೆ ಭಾಷಣಗಾರೆ ಆದಿತ್ತಿನ ಹೆಗ್ಡೆರ್ 1955ಟ್ ಸೈಂಟ್ ಅಲೋಸಿಯಸ್ ಕಾಲೇಜ್ ವಿದ್ಯಾರ್ಥಿ ಯೂನಿಯನ್ ಅಧ್ಯಕ್ಷೆ ಆದ್ ಆಯ್ಕೆ ಆಯೆರ್. ಎಸ್.ಆರ್. ಹೆಗ್ಡೆ / 8
