ಹೆಗ್ಡೆರ್ ಜಿಲ್ಲಾ ಸರಕಾರಿ ವಕೀಲೆರ್ (District Government Pleader) ಆದಿತ್ತೆರ್. 'ತುಳುಕೂಟ' ತಿಂಗೊಲ್ಲ ತುಳುಪತ್ರಿಕೆ (1971-77) ಎಸ್.ಆರ್. ಹೆಗ್ಡೆರ್ 'ತುಳುಕೂಟ' ಪುದರ ತಿಂಗೊಲ್ಲ ತುಳುಪತ್ರಿಕೆನ್ 1971 ಜನವರಿ ಮಕರ ಸಂಕ್ರಾಂತಿದಾನಿ ಸುರುಮಲ್ಲೆರ್, ಒಡಿಪುದ ಪೇಜಾವರ ಮಠಾಧೀಶೆ ರಾಯಿನ ಶ್ರೀ ವಿಶ್ವೇಶ ತೀರ್ಥ ಸ್ವಾಮೀಜಿ ಪತ್ರಿಕೆನ್ ಬುಡುಗಡೆ ಮಲ್ಲೆರ್, 1977 ಮುಟ್ಟ ಒಟ್ಟು 7 ವರ್ಸ ಪತ್ರಿಕೆ ನಡತ್ಂಡ್. ಡೆಮ್ಮಿ 1/4 ಪ್ರಾಕಾರೊಡ್ 24 ಪುಟತ್ತ ಪ್ರತಿ ತಿಂಗೊಲ್ಲ ಅಚ್ಚಾವೊಂದಿತ್ತಿನ ಪತ್ರಿಕೆದ ಬಿಲೆ 50 ಪೈಸೆ ಆದಿತ್ತ್ಂಡ್, ರತ್ನಕುಮಾರ್ ಎಂ. ಪತ್ರಿಕೆದ ಸಂಪಾದಕರಾದಿತ್ತೆರ್. 'ತುಳುಕೂಟ' ಎಗ್ಗಲು ಗಣೇಶ ನಾಟಕ ಸಭಾ ಪತ್ನಿ ತುಳುನಾಟಕ ತಂಡ ಕಟೊಂದು 1958ರ್ ತುಳುನಾಡ್ ಮಾತ್ರ ಅತ್ತಂದೆ ತುಳುವೆರ್ ಮಸ್ತಜನ ಉಪ್ಪುನ ಕಾಸರಗೋಡು, ಮಡಿಕೇರಿ, ಬೆಂಗಳೂರು, ಚಿಕ್ಕಮಗಳೂರು, ಪುಣೆ, ಮುಂಬೈ, ಹೈದರಾಬಾದ್, ಚೆನ್ನೈಲೆಡ್ ತುಳು ನಾಟಕ ಗೊಬ್ಬೊಂದಿತ್ತಿನ ಕೆ.ಎನ್. ಟೈಲರ್ ಹೆಗ್ಡೆರೆಗ್ ತುಳುಕೂಟ ಎಗ್ಗೆ ಸ್ಥಾಪನೆಗ್ ಬೆರಿಸಾಯೊ ಕೊರೆರ್. ಅಂಚಾದ್ ಮಡಿಕೇರಿ ತುಳುಕೂಟ (1971), ಪುತ್ತೂರು ತುಳುಕೂಟ (1972), ಬೆಂಗಳೂರು ತುಳುಕೂಟ (1972), ಬೊಂಬಾಯಿ ತುಳುಕೂಟ (1973) ಸ್ಥಾಪನೆ ಆಂಡ್. ಈ ಸಂಘಟನೆಲೆ ಮೂಲಕ ತುಳುಕೂಟ ಪತ್ರಿಕೆದ ಪ್ರಸಾರ-ಪ್ರಚಾರ ಮಾತ್ರ ಅತ್ತಂದೆ ತುಳುಭಾಷೆ-ಸಂಸ್ಕೃತಿದ ರಕ್ಷಣೆ-ಪೋಷಣೆ ಕೆಲಸ ಸಲೀಸಾಂಡ್. ತುಳುನಾಡ್ ಪ್ರೆಸ್ ಸ್ಥಾಪನೆ (1972) 'ತುಳುಕೂಟ' ಪತ್ರಿಕೆನ್ ಅಚ್ಚಿ ಮಲ್ಪೆರೆ ಬೊಕ್ಕ ತುಳು ಚಳವಳಿತ್ತ ಕಾರ್ಯಕ್ರಮೊಕ್ಲಗ್ ಸಕಾಯ ಆವೆರ್ಂದ್ ಎಸ್.ಆರ್. ಹೆಗ್ಡೆರ್ 1972 ವಿಜಯದಶಮಿದಾನಿ ಕುಡ್ಲದ ಕದ್ರಿಡ್ 'ತುಳುನಾಡ್ ಪ್ರೆಸ್' ಪನ್ಸಿ ಮುದ್ರಣಾಲಯ ಸ್ಥಾಪನೆ ಮಲ್ಲೆರ್, ಮುದ್ರಣಾಲಯ ತೂವೊನ್ನ ಜವಾಬ್ದಾರಿನ್ ಆರ್ ರತ್ನಕುಮಾರ್ ಎಂ. ಅರೆಗ್ ವಹಿಸಾಯೆರ್, 'ತುಳುಕೂಟ ಪತ್ರಿಕೆ ನೆಟ್ಟೇ ತಯಾರಿ ಆವೊಂದಿತ್ತಂಡ್, 1973ಟ್ ರಮೇಶ್ ಕಾರ್ನಾಡ್ ಸುರುಮಲ್ಲಿನ 'ತುಳುವಾಣಿ' ಪತ್ರಿಕೆಲಾ ಮೂಲೇ ಅಚ್ಚಿ ಆವೊಂದಿತ್ತ್ಂಡ್, ಪಣಿಯಾಡಿದಾರೆನ ಉಸ್ತುವಾರಿಡಿತ್ತಿ 'ತುಳುನಾಡ್ ಪ್ರೆಸ್' ಅರೆನ ತುಳುಚಳವಳಿತ್ತ ಮಾತಾ ಕಾರ್ಯಕ್ರಮೊಕ್ಲಗ್ ಎಂಚ ಸಕಾಯ ಆವೊಂದಿತ್ತ್ಂಡ ಅಂಚೆನೇ ಹೆಗ್ಡೆರೆನ ತುಳು ಚಳವಳಿ ತುಳುನಾಡ್ ಪ್ರೆಸ್ ಲಾ ನಾನಾ ರೀತಿಡ್ ಸಕಾಯ ಆವೊಂದಿತ್ತ್ಂಡ್. ಎಸ್.ಆರ್. ಹೆಗ್ಡೆ / 3
