ಮಲ್ಲಾದಿಗೆ ಇಜ್ಜಾಂದಿ ಕುಲಾಲೆರೆನ ಬಗೆಟ್ ಬರೆಪಿನವೇ ಎಂಕೊಂಜಿ ಪೆರ್ಮೆದ ಸಂಗತಿ.
ಈತ್ ಕಡಮೆ ಸಮಯೊಡು ಯಾನ್ ಬರೆಯಿನನೇ ಇಸ್ಮಯ. ಬರೆಯೆರೆ ಪೆನ್ನ್ ಪತ್ತ್ನಗ ಎಂಕ್ ಬೆರಿತಾಂಗ್ ಕೊರ್ನಕ್ಲೆನ್ ಸುರೂಟೇ ಪುಡ್ಯೊನುವೆ. ಸುರುಕಾದ್ ಸೀತಾರಾಮ ಕುಲಾಲೆರೆನ ಬಗೆಟ್ ಬರೆಯೆರೆ ಅನು ಮಲ್ತ್ ಕೊರ್ನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರೆರಾಯಿನ ತುಳುವ ಬೊಳ್ಳಿ ದಯಾನಂದ ಕತ್ತಲ್ಸಾರ್ ಮೆರೆಗ್ ದಿಂಜಿ ಉಡಲ್ದ ಸೊಲ್ಮೆ ಸಂದಾವೆ. ಸೀತಾರಾಮ ಕುಲಾಲೆರೆನ ಮೋಕೆದ ಬುಡೆದಿ ಶುಭಕ್ಕ ಎಂಕೋಸ್ಕರ ಬಿ.ಸಿ. ರೋಡ್ದ ಇಲ್ಲರ್ದ್ ಬಿಜೈದ ಇಲ್ಲಗ್ ಬತ್ತ್ದ್, ಮಿತ್ತ್ ಕಟ್ಟ್ದ್ ದೀತಿನ ಬೂಕುಲೆನ್ ಒದಗಾದ್ ಕೊರ್ಯೆರ್. ಅರೆಗ್ ಉಡಲ್ ದಿಂಜಿ ಸೊಲ್ಮೆಲೆನ್ ಪನ್ಪೆ. ತುಳು ರಂಗಭೂಮಿದ ಮಲ್ಲ ಕಲಾ ನಿರ್ದೇಶಕೆರಾಯಿನ ತಮ್ಮ ಲಕ್ಷ್ಮಣೆರ್, ಎಂಕ್ಲೆನ ಇಲ್ಲಗ್ ಬತ್ತ್ದ್ ಸಕಾಯ ಕೊರ್ದು ಕುಲಾಲೆರೆನ ಒಟ್ಟುಗು ನಾಟಕ ತಂಡೊಡು ಬೆನ್ತಿನ ಕಲಾವಿದೆರ್ನ ಪತ್ತೆನ್ ಒದಗಾದ್ ಕೊರ್ಯೆರ್. ಅರೆಗ್ ಈ ಪೊರ್ತುಡು ಕೈ ಜೋಡಾದ್ ಸೊಲ್ಮೆ ಸಂದಾವೆ. ಪೊರ್ತುಗು ಸರಿಯಾದ್ ಕುಲಾಲೆರೆನ ಬಗೆಟ್ ತನ್ಕುಲೆನ ಅಭಿಪ್ರಾಯೊನು ಪಟ್ಟೊಂದಿನ ಕಲಾವಿದೆರೆಗ್ ತರೆ ತಗ್ಗಾವೆ. ಬರೆಯೆರೆ ಬೆರಿಬೊಟ್ಟಿನ ಸಾಹಿತಿ ಯಶೋದಾ ಮೋಹನ್ ಮೆರೆಗ್, ಅಕಾಡೆಮಿಡ್ ಪಾದರಸೊತಲೆಕೊ ಬೇಲೆ ಮಲ್ತೊಂದು ಎಂಕ್ ಉಮೇದ್ ಕೊರ್ನ ಸೌಮಿತಾ ಮೆರೆಗ್, ಸದಸ್ಯ ಸಂಚಾಲಕೆರಾಯಿನ ಶ್ರೀ ನಾಗೇಶ್ ಕುಲಾಲೆರೆಗ್, ಅಕಾಡೆಮಿದ ರಿಜಿಸ್ಟ್ರಾರ್ ಆಯಿನ ಶ್ರೀಮತಿ ಕವಿತಾ ಮೆರೆಗ್, ಸಕಾಯ ಕೊರ್ನ ಅಕಾಡೆಮಿದ ಶ್ರೀ ಅಭಿಜಿತ್ ಮೆರೆಗ್, ಎನ್ನ ಪುಗೆಲ್ಗ್ ಪುಗೆಲ್ ಕೊರ್ದು, ಬರೆಪಿನ ಕಜ್ಜೊನು ಪೂತಲೆಕೊ ಹಗ್ರ ಮಲ್ತಿನ ಎನ್ನ ಯಜಮಾನ್ಯೆ ಶ್ರೀ ನಾಗೇಶ್ ಕೆ. ಮೆರೆಗ್, ಪೊರ್ಲುಡು ಡಿಟಿಪಿ ಮಲ್ತ್ ಕೊರ್ನ ಆಕೃತಿ ಪ್ರಿಂಟ್ಸ್ದ ಭಾರತಿ, ಗಾಯತ್ರಿ ಮೊಕ್ಲೆಗ್ ಸೊಲ್ಮೆಲು. ಬೂಕುನು ಪೊರ್ಲು ಮಲ್ತ್ ಕೊರ್ನ ದಿಗಂತ ಮುದ್ರಣದಕ್ಲೆಗ್ ಮಾತೆರೆಗ್ಲಾ ದಿಂಜಿ ಉಡಲ್ದ ಸೊಲ್ಮೆ ಸಂದಾವೊಂದು ಈ ಪೊರ್ತುಡು ಮಾತೆರೆನ್ಲಾ ನೆಂಪು ಮಲ್ಪುವೆ. ಏರ್ನಾಂಡಲ ಪುದರ್ ಬುಡ್ಡು ಪೋತುಂಡ ಮಾಪು ಮಲ್ಪೊಡು, ಬರೆತಿನೆಟ್ ಅರೆಕೊರೆ ಇತ್ತ್ಂಡ ಅವೆನ್ ಬಂಜಿಗ್ ಪಾಡೊನೊಡುಂದು ನಟ್ಟೊನುವೆ. ಅಂಚೆನೆ ತುಳುನಾಟಕ ರಂಗಬೂಮಿನ್ ಮೆನ್ಕಾಯಿನ ಸೀತಾರಾಮ ಕುಲಾಲೆರೆನ ಇಸಯೊಡು ನನಲಾತ್ ಬರವುಲು ಬರೊಡುಂದು ದೇವೆರ್ಡ ನಟ್ಟುವೆ.
