ನಾಟಕೊಡು ಯಾನ್ ಹಾಸ್ಯ ನಟಿಯಾದ್ ಆಯ್ಕೆ ಆಯೆಂಡಲೇ ಅನಿವಾರ್ಯ ಕಾರಣೋಡು ಎನನ್ ಅಬ್ಬಕ್ಕ ರಾಣಿಯ ಕುಲಾಲೆರ್ ಆಯ್ಕೆ ಮಲ್ತೆರ್. ಎಂಕ್ ಬಾರಿ ಪೋಡಿಗೆ ಇತ್ತ್ಂಡ್. ಆಂಡ ಶರವು ಮಹಾಗಣಪತಿ ದೇವಸ್ಥಾನಡ್ ಎನ್ನ ಅಬ್ಬಕ್ಕ ರಾಣಿನ ಪಾತ್ರೆನು ಮಾತೆರ್ಲಾ ಮೆಚ್ಚಿಯೆರ್. ಶ್ರೀ ರಾಘವೇಂದ್ರ ಶಾಸ್ತ್ರಿಲು ಎಂಕ್ ಅಬ್ಬಕ್ಕನೇ ತೂಯಿಲೆಕೊ ಆಂಡ್ ಪಂಡೆರ್. ಉಂದೆಕ್ ಕುಲಾಲ್ ಸರ್ ಕಾರಣ. ಈ ನಾಟಕೊನು ಕತಾರ್ಡ್ಲ ಎಂಕುಲು ಮಲ್ತ್ ದ. ಉಂದು ಪರದೇಸೊಡ್ ಪ್ರದರ್ಶನೊ ಆಯಿನ ಸುರುತ ಚಾರಿತ್ರಿಕ ನಾಟಕೊ. ಬೊಕ್ಕ ಎಂಕ್ ಮಸ್ತ್ ನಾಟಕೊಲೆಡ್ ಎನ್ನ ಗುರುಕುಲು ಅವಕಾಶ ಕೊರಿಯೆರ್.
ಆರ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರಿಕಾರರಾದುಪ್ಪುನಗ ಶಾಲೆಲೆಡ್ ತುಳು ಕಲ್ಪಾವುನ ಮುಹೂರ್ತ ದೀಯೆರ್. ಇನಿ ಎನ್ನ ಗುರುಕುಲು ಎನ್ನೊಟ್ಟಿಗೆ ಇಜ್ಜೆರ್. ಆಂಡ ಆರ್ ಪಂತಿನ ಪಾತೆರೊ ಅರೆನ ಕರ್ತವ್ಯ ಪ್ರಜ್ಞೆನ್ ಯಾನ್ ಮರಪಯೆ. ನನೊಂಜಿ ಜನ್ಮ ಇತ್ತಂಡ ಅರೆನ ಮೆಗ್ದಿಯಾದ್ ಮಗಳಾದ್ ಪುಟ್ಟೊಡು ಪನ್ಪಿನ ಅಂಗಾಲ್ಪು ಎನ್ನವು.
ಶ್ರೀ ವಸಂತ ಶೇಣವ (ಅಭಿಮಾನಿ ಕಲಾವಿದೆರ್)
1980ಟ್ಟ್ ಸೀತಾರಾಮ ಕುಲಾಲೆರೆನ ನಿರ್ದೇಶನೊಡು ಎಂಕುಲು ಕೆನರಾ ಕಾಲೇಜಿದ ಹಳೆ ವಿದ್ಯಾರ್ಥಿ ಸಂಘದಕುಲು ಸೇರ್ದ್ ಒಂಜಿ ನಾಟಕೊ ಗೊಬ್ಬಾಯ. ಬಾರಿ ಕುಸೇಲ್ದ ನಾಟಕೊ ಅವು. ವೋಟ್ ಫೋರ್ ಗೋಪಾಲಯ್ಯಂದ್ ನಾಟಕೊದ ಪುದರ್. ಅಯ್ಟ್ ಎಂಕೊಂಜಿ ಪಾತ್ರ ಕೊರ್ದಿತ್ತೆರ್ ಕುಲಾಲ್ ಸರ್. ರಾಜಕೀಯದ ಸತ್ಯೋಲೆನ್ ತೆರಿಪಾವುನ ಕತೆ, ಮಾತೆರ್ಲಾ ಗೋಪಾಲಯ್ಯಗ್ ವೋಟು ಪಾಡುವೆಂದ್ ನಂಬದ್, ವೋಟದಾನಿ ಮತಪತ್ರ ಲೆಕ್ಕೊ ಮಲ್ಪುನಗ ಖಾಲಿ ನಾಲ್ ವೋಟು ಮಾತ್ರ ಗೋಪಾಲಯ್ಯಗ್ ಬೂರುನ ಕತೆ ಎನ್ನಿನಗ ಎಂಕ್ 42 ವರ್ಸೋದ್ದು ಬೊಕ್ಕಲ ತೆಲಿಕೆ ಬರ್ಪುಂಡು. ದುಂಬೇ ಆಜಿ ಪೂಟು ಎತ್ತರೊದ ಕುಲಾಲೆರ್ ಕೈ ದೆರ್ತ್ದ್ ನಾಲ್ ಬಿರೆಲ್ ತೋಜನಗ ಎಂಕುಲು ತರದೆರ್ತ್ ತೂದು, ಬೂರ್ದ್ ಬೂರ್ದ್ ತೆಲ್ತ್ ದಾಂದ್ ಶೇಣವೆರ್ ನೆಂಪುನು ಪಟ್ಟೊಂದೆರ್.
ಸಾಮಾಜಿಕ ಸೇವೆಲೆನ ವಿವರ
1.1964ಟ್ಟ್ ಕಲಾವಿದರು ಮಂಗಳೂರು ನೆತ್ತ ಸಂಚಾಲಕರಾದ್.
2.ಗಣಪತಿ ಪ್ರೌಢಶಾಲೆದ ಹಳೆವಿದ್ಯಾರ್ಥಿ ಸಂಘದ ಸಕ್ರಿಯ ಸದಸ್ಯೆರಾದ್.
3.ಯು.ಬಿ.ಎಂ.ಸಿ ಹೈಯರ್ ಪ್ರೈಮರಿ ಶಾಲಾ ಹಳೆ ವಿದ್ಯಾರ್ಥಿ ಸಂಘದ ಕಾರ್ಯಾತೆರಾದ್.
ಎಂ.ಕೆ. ಸೀತಾರಾಮ್ ಕುಲಾಲೆರ್ / 34
