ಎಂಕ್ ರಂಗಭೂಮಿಯೇ ಎನ್ನ ಬದ್ಕ್ ಚಪ್ಪೆ ಆತ್ಂಡ್, ಎನ್ನ ಒಡನಾಟದ ಮಲ್ಲ ಗುರು ಮದೆಯಾಯಿನವು ಎನ್ನ ಕಲಾ ಜೀವನೊದ ಸೂತಕ. ಆರೆನ ಆಶೀರ್ವಾದದ ನಾಟಕೊ ರಂಗೊದ ಬೆಪ್ಪುನು ತರ್ಕೊಂದ್ ಕಲಾ ಸೇವೆ ಮಲ್ತೊಂದು ಅರೆನ್ ನೆಂಪು ಮಲ್ಪುವೆ.
ಶ್ರೀಮತಿ ಜಯಂತಿ ಎಸ್. ಬಂಗೇರ ಮೂಡುಬಿದಿರೆ (ಅಕಾಡೆಮಿದ ಪದುಕೆರ್)
2005ಡ್ 2008ನೇ ಸಾಲ್ ದ ಅವಧಿ ಮುಟ್ಟ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆ ಆದ್ ತುಳು ಸಾಹಿತ್ಯ ಸಂಸ್ಕೃತಿದ ಸೇವೆ ಮಲ್ಪುನ ಯೋಗ ಎನ್ನ ಪಾಲ್ಗ್ ಎನ್ನಂದೆ ತಿಕ್ಕಿನ ಭಾಗ್ಯ. ಈ ಅವಧಿಡ್ ಅಧ್ಯಕ್ಷ ಸ್ಥಾನದ ಭಾಗ್ಯ ತಿಕ್ಕಿನವು ಶ್ರೀ ಎಂ.ಕೆ. ಸೀತಾರಾಮ ಕುಲಾಲ್ ಮೆರೆಗ್. ಯಾನ್ ಅರೆನ ಬಗ್ಗೆ ಮಸ್ತ್ ತೆರಿಯೊಂದಿತ್ತೆಂಡಲಾ ಅರೆನ್ ಪ್ರತ್ಯಕ್ಷ ತೂಯಿನಿ ಆರ್ ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರಾದ್ ಅಕಾಡೆಮಿಗ್ ಬತ್ತಿ ಬೊಕ್ಕನೆ. 13 ಜನ ಸದಸ್ಯೆರೆಗ್ ಸರಕಾರ ಆಯ್ಕೆ ಮಲ್ತ್ದಿದಿತ್ತ್ಂಡ್.ಅಧ್ಯಕ್ಷೆ ರಿಜಿಸ್ಟ್ರಾರ್ ಸೇರ್ದ್ 15 ಜನತ್ತ ತಂಡ ಮೂಜಿ ವರ್ಷದ ಅವಧಿ ನಿತ್ಯ ನಿರಂತರವಾದ್ ತುಳುತ್ತ ಬೇಲೆ ಮಲ್ತಿನವು ಕೈತ್ತ ಪಸೆ ಆಜಂದಿಲೆಕ ನಿತ್ಯ ನೆನೆಪಾದ್ ಒರಿದ್ಂಡ್. ಸೀತಾರಾಮ್ ಕುಲಾಲ್ ಮಾತಾ ಸದಸ್ಯೆರೆಡಲಾ ಪ್ರೀತಿ ವಿಶ್ವಾಸೊಡಿತ್ತೆರ್. ಬೇತೆ ಬೇತೆ ಊರುಲೆಡ್, ದೇಶೂಲೆಡ್ ತುಳುತ್ತ ಲೇಸ್ನ್ ನಡಪಾವೊಂದು ಬರೊಂದಿತ್ತ. 2007ಟ್ ದೆಹಲಿಡ್ ಸುವರ್ಣ ಕರ್ನಾಟಕ ಸಾಹಿತ್ಯ ಸಾಂಸ್ಕೃತಿಕ ಉತ್ಸವ ಬಾರೀ ಪೊರ್ಲುಡು ನಡಪಾದ್ ಕೊರ್ತ. ಶ್ರೀಯುತ ಕುಲಾಲ್ರೆನ ಪರಿಕಲ್ಪನೆಡ್ ಮೂಜಿ ವರ್ಷದ ಅವಧಿಡ್ ಲೆಕ್ಕೊಡ್ಡು ಮಿತ್ತ್ ತುಳು ಲೇಸ್ಲೆನ್ ನಡಪಾದಿನವು ಇತಿಹಾಸ. ಎಂಕುಲು ಡೆಲ್ಲಿ, ಬೆಂಗಳೂರು, ಪೂನಾ, ಭದ್ರಾವತಿ, ಮೀರಜ್, ಸೂರತ್, ಬರೋಡಾ, ಮೈಸೂರು ಇಂಚ ಬೇತೆ ಬೇತೆ ಊರುಲೆಗ್ ತುಳುತ್ತ ಲೇಸ್ ನಡಪಾಯೆರೆ ಪೋವೊಂದುಪ್ಪುನಗ ಎಂಕ್ಲೆನ ಪ್ರಯಾಣದ ಉದ್ದೊಗುಲಾ ಕತೆ, ಪದ, ತಮಾಷೆ, ಬೇತೆ ಬೇತೆ ವಿಷಯದ ಮಿತ್ತ್ ಚರ್ಚೆಲು ತಾದಿ ಉದ್ದೊಗುಲಾ ಒಡ್ಕ ದಾಂತೆ ಆಪೇದ್ಂಡ್.ಸೀತಾರಾಮ್ ಕುಲಾಲ್ ಏಪಲಾ ತೆಲಿತೊಂದು, ತೆಲಿಪಾವೊಂದು ಇತ್ತೆರ್. ಆಂಡ ಆತೇ ಕಟ್ಟ್ ನಿಟ್ಟಾಯಿನ ವ್ಯಕ್ತಿ. ಕರ್ತವ್ಯಲೋಪ ಆವರೆ ಏಪೊಗ್ಲಾ ಬುಡೊಂದಿತ್ತಿಜೆರ್. ಎನ್ನಿನ ಕೆಲಸ ಕೈಗೂಡಿನೆಟ್ಟ ಬುಡೊಂದಿತ್ತಿಜೆರ್. ನಗರಪಾಲಿಕೆದ ಕಟ್ಟೋಣೊಡು ತುಳು ಸಾಹಿತ್ಯ ಅಕಾಡೆಮಿದ ಸಂಸ್ಥೆ ಬಾಡಿಗೆಗಿತ್ತ್ಂಡ್. ತುಳು ಅಕಾಡೆಮಿಗ್ ಸ್ವಂತ ಕಟ್ಟಡ ಆವೊಡೂಂದು ಒಂಜಿ ಜಾಗ್ ತಿಕ್ಕರೆ ಬಾರಿ ಪ್ರಯತ್ನ ಬತ್ತದ್ ಅರೆನ ಪ್ರಯತ್ನ ಶ್ರಮದ ಫಲವಾದ್ ಉರ್ವಸ್ಟೋರ್ದ ಕೈತಲ್ 50 ಸೆಂಟ್ಸ್ ಜಾಗ ತಿಕ್ಕ್ಂಡ್.
ಎಂ.ಕೆ. ಸೀತಾರಾಮ್ ಕುಲಾಲೆರ್ / 30
