ಮಾತೆರ್ಲಾ ತುಳು ಸಿನೆಮೊಗು ಪದ ಬರೆಯೆರೆ ಸೀತಾರಾಮ ಕುಲಾಲೆರೆನ್ ನಾಡೊಂದು ಬರಿಯೆರೆ ಸುರು ಮಲ್ತೆರ್.
ಕುಲಾಲೆರ್ ಕಟ್ಟಿನ ಕಡಲನಾಡ ಕಲಾವಿದರು ತಂಡೊಡು ಮಸ್ತ್ ಕಲಾವಿದೆರ್ ಬುಲೆಯೆರ್.1964ಟ್ಟ್ ಕುಲಾಲೆ ಅಯ್ತ ಸಂಚಾಲಕರಾಯೆರ್. 51 ವರ್ಸೊ ಈ ಸಂಸ್ಥೆನ್ ನಡಪಾವೊಂದು ಬತ್ತೆರ್.ಕುಲಾಲೆ ಕೃಷ್ಣ ದೇವರಾಯ, ರಕ್ತಕ್ರಾಂತಿ, ರುದ್ರ ವೀಣೆ ಇಂಚಿತ್ತಿ ನಾಟಕೊಲೆನ್ ಬರೆಯೆರ್. ನೃತ್ಯರೂಪಕ, ರೇಡಿಯೋ ನಾಟಕೊಲೆನ್ ಬರೆಯೆರ್. ದಾವಣಗೆರೆಟ್ ನಡತಿನ ರಾಜ್ಯಮಟ್ಟದ ನಾಟಕೊ ಪಂಥೋಡು ಅರೆನ 'ಮಿನುಗೆಲೆ ಮಿನುಗೆಲೆ ನಕ್ಷತ್ರ' ಪನ್ಪಿನ ಸಾಮಾಜಿಕ ನಾಟಕೊ ಇನಾಮು ಗೆಂದ್ಂಡ್. ಎಚ್ಚ ಕನ್ನಡ ನಾಟಕೊಲೆನ್ ಬರೆಯಿನ ಕುಲಾಲೆರ್ ತುಳು ನಾಟಕೊ ಕ್ಷೇತ್ರೋಡುಲ ಎಡ್ಡೆ ಪುದರ್ ಮಲ್ತೆರ್. ರಕ್ಷೇಶ್ವರಿ, ಅಪಸ್ವರ, ಜಮ್ಮ ಜಮ್ಮದ ಬೆರ್ಮೆರೆ ಬರವು, ನಾಟಕದಾಯೆ, ಉಡಲ್ದ ತುಡರ್ ಇಂಚ ಮಸ್ತ್ ನಾಟಕೊಲೆ ಬರೆಯೆರ್. ಅಯ್ದ ಕೆಲವು ಸಿನಿಮಾಲಾ ಆಂಡ್. ಅರೆನ ನಾಟಕೊಲೆಗ್ ಅರೆನವೇ ಪದೊಕುಲು, ಆ ಪದೊಕುಲೆಗ್ ಅರೆನವೇ ರಾಗ ಸಂಯೋಜನೆ. ಕಡಲನಾಡ ಕಲಾವಿದ ಕಡಲಾಯೆರೆದ ಕತಾರ್, ಕುವೈಟ್, ದುಬೈಡ್ ನಾಟಕೊ ಪ್ರದರ್ಶನೊ ಮಲ್ತೆರ್. ಕುವೈಟ್ಡ್ ಕುಲಾಲೆನ ತಂಡೋ ರಡ್ಡ್ ಸರ್ತಿ ನಾಟಕೊ ಪ್ರದರ್ಶನೊ ಮಲ್ತ್ಂಡ್. ಅರೆನ 8 ನಾಟಕೊಲು ಜಿಲ್ಲೆ ಬೊಕ್ಕ ರಾಜ್ಯೋ ಮಟ್ಟೋದ ಪ್ರಶಸ್ತಿ ಪಡೆತ್ಂಡ್. ಕಲೆನ್ ಕಾಸ್ಗ್ ಮಾರ್ಯೆರೆ ಬಲ್ಲಿ ಪನ್ಪಿನ ನಂಬಿಕೆ ಇತ್ತಿನ ಕುಲಾಲೆರ್ ಒವ್ವೇ ನಾಟಕೊಲೆಗ್ ಪಣವು ದೆತೊಂದಿನಾರತ್ತ್. 2000 ಇಸವಿಡ್ ಅರೆನ 'ನಾಟಕದಾಯೆ' ಬೂಕು ಮುದ್ರಣ ಆಂಡ್. ಅವು ಮುದ್ರಣ ಆಯಿನ ಅರೆನ ಸುರೂತ ಬೂಕುಲಾ ಅಂದ್. ಈ ಬೂಕುಡು ಪ್ರೊ. ಅಮೃತ ಸೊಮೇಶ್ವರೆರ್ ದುಂಬುದ ವಾರ್ತೆ ಬರೆತೆರ್.
1970ನೇ ಇಸವಿಡ್ 'ಎನ್ನ ತಂಗಡಿ' ಪನ್ಪಿ ಸುರುತ ಸಿನಿಮಾ ಬುಡುಗಡೆ ಆಂಡ್. ರಡ್ಡನೇ ಜಾಲ್ 1971ನೇ ಇಸವಿಡ್ ಕೆ.ಎನ್. ಟೈಲರ್ 'ದಾರೆದ ಬುಡೆದಿ ಪನ್ಪಿನ ಸಿನಿಮಾ ಮಲ್ತೆರ್. ಅಯ್ಟ್ ಸೀತಾರಾಮ ಕುಲಾಲೆರೆಗ್ ಒಂಜಿ ಎಲ್ಯ ಪಾತ್ರ ಕೊರಿಯೆರ್. ಅವು ಓಡುದ ಕಾರ್ಖಾನೆದ ದನಿನ ಪಾತ್ರ, ಆ ಸಿನಿಮಾ ಕುಲಾಲೆರೆನ್ ಪಿಚ್ಚರ್ ಆಕ್ಟ್ರ್ಂದ್ ಜನಮಾನಿಲು ಪನ್ಪಿಲೆಕೊ ಮಲ್ತ್ಂಡ್. ಆ ಸಿನಿಮೊಡು ಸೋಮಶೇಖರ್ ಪುತ್ರನ್, ನಾರಾಯಣ ಪುತ್ರನ್, ರಾಮಚಂದ್ರ ಕೂಳೂರು, ಪುಗಾರ್ತೆದ ಕಲಾವಿದೆ ಲೀಲಾವತಿ ಮೊಕ್ಲೆನೊಟ್ಟಿಗೆ ಸೀತಾರಾಮ ಕುಲಾಲೆರ್ ಅಭಿನಯ ಮಲ್ತೆರ್.
ಎಂ.ಕೆ. ಸೀತಾರಾಮ ಕುಲಾಲೆರ್ / 16
