ಜಾಗೆಲೆನ್ ಪೂರ ತಿರ್ಗಿಯೆ. ಅಪಗ ಎಂಕ್ ತೆರೀಂಡ್ ಈ ತುಳುನಾಡ್ಡ್ ಇಂಚಿತ್ತಿನ ಒರಿ ಮಣ್ಣ್ ದ ಮಗೆ ಇತ್ತೇಂದ್. ಆಂಡ ಇನಿ ಆಯೆ ತಿರ್ಗಿದಿನ ಊರುಲು ರಂಗ್ ಮಾಜೊಂದುಂಡು. ಆಯನ ಕಾರ ಮುಟ್ಟು ಮದೆವೊಂದುಂಡು. ಅವು ಪೂರಾ ಮದೆವೊಡ್ಡ ದುಂಬು ನಮಡ್ ದ್ ಬೊಕ್ಕದ ಜನೊಕುಲೆಗ್ 'ಅಗೋಳಿ ಮಂಜಣೆ' ಏರ್ಂದ್ ತೆರಿಪಾವೊಡು. ಆಯನ ನಡತಿ ನಡಕೆ, ಬೆಂತಿ ಬೇಲೆ, ಉಂತಿ ಉಣ್ಣ್ಪು, ತಿಂತಿ ತಿನ್ಪು, ಮಲ್ತಿ ನುರ್ಕಟ್ಟಿಕೆದ ಕತೆನ್ ಪನೊಡುಂದು ಅಂಗಲಪ್ಪುಡುಲ್ಲೆ. ಪನ್ಪೆ ಕೇನಿ ನಿಕುಲ್ಲಾ ಬಲೆ ಎನ್ನೊಟ್ಟುಗು. ಕಟ್ಲಗಾದೇ ಪೋಯಿ.
ತಡ್ಯ 3 ಮಂಜಣ ಬರ್ಕೆದ ಕುರ್ಲೆ
ಇನಿಕ್ ನಾಲ್ ತರೆತ್ತ ಪಿರವುದ ಕತೆ. ಅಪಗ ಈ ತುಳುನಾಡ್ ತೋಡುತೋಕೆಲೆಡ್ ಗುತ್ತು ಬರ್ಕೆಲೆಡ್ ಬೂಡು ಬುಡ್ತಿನ ಕಾಲ. ಕೆಂಚಿ ನರಮಾನಿ ಅರತ್ತಾನ ಮಲ್ತೊಂದಿತ್ತಿನ ಕಾಲ. ತುಳು ಅಪ್ಪೆ ಪಚ್ಚ ರಂಗ್ನ್ ತೇತೊಂದು ಸಿಂಗಾರ ಮಲ್ತೊಂದು ಬಯ್ದಿನಂಚಿನ ಕಾಲ. ಇಂಚಿತ್ತಿನ ಸೊರ್ಕೆಲ್ ಕಾಲೊಡು ಪುಟಿನಾಯೆ ಮಂಜಣೆ. ಕುಡಲಗ್ ಕೈತಲ್ ದ ತೊರ್ತಲ್ ಪನ್ಪಿನ ಗ್ರಾಮ. ಈ ಗ್ರಾಮದ ಒಂಜಿ ಕೋಂಟುಡು ಕಟ್ಟ್ಲ ಪನ್ಪಿನವು ಎಲ್ಯ ಊರು. ಮುಲ್ಪದ ಬರ್ಕೆಡ್ ನಾರಾಯಣ ಶೆಟ್ಟಿ ಪನ್ಪಿನ ಒರಿ ಮಣ್ಣ್ ದ ಮಗೆ ಬೆನ್ನಿದ ಬೇಲೆ ಮಲ್ತೊಂದಿತ್ತೆ. ಅಳಿಯ ಕಟ್ಟ್ ವಾಡಿಕೆಡ್ ಇತ್ತಿನ ಕಾಲ ಅವು. ಇಂಚಿತ್ತಿನ ಪೊರ್ತುಡು ನಾರಾಯಣ ಶೆಟ್ಟಿಗ್ ಮದಿಮೆ ಆಪಿನ ಸಂದರಪ್ಪು ಕೂಡುದು ಬತ್ತ್ಂಡ್.
9
